لقا كلماتو عليه بنظرة كلها تحدي وكره وحقد وشماتة .. لا نعيمة بقات غير تاتشوف فيهم مامثيقاش شنو تاتسمع وبدر ساكت وتايسمع ليه تا كمل لاخور كلامو وختمها بتهديدو المعتاد ورجع باللور ناوي يغادر عاد بدر فاق ..
بدر : تسنا
سفيان : شنو؟ مازال بيتي نزيدك شي حاجة
بدر : نتا دويتي وأنا سمعت ليك وماتحسبوش خوف مني ونتا عارفني مزيان وعارف شنو تانسوى ولكن ماغانتصرفش معاك بطريقتي حيت غانكونو بجوج خاسرين
سفيان : بصح عارفك شنو تاتسوى .. مجرم قتال
بدر : أنا ماقتلت حد، خوك ماقتلتوش، ماغاننكرش انه عندي علاقة بموتو ولكن ماقتلتووش وعمري فكرت نقتل شي حد
سفيان : ويحسابك غانثيقك؟؟ تاتسطى عليا ولا شنو كيفاش عندك علاقة بموتو ونفس الوقت ماقتلتيهش مريض فمخك ولا
بدر : يلا جلستي ودرتي عقلك وطلقتي معايا وذنيك غاتفهم كلشي، نتا دابا تاتحارب الشخص الغلط والقاتل الحقيقي عايش بيخير وماكاين لي يلومو
سفيان : هضرة خاويا، ماغادوزهاش عليا بهاد دور البريئ لي تاتلعب عليا، وواخا تجيب ليا شي حد أكيد غاتكون نتا مخلصو باش يهز عليك التهمة وتبان نقي قدام مراتك، هي شافت وسمعات الحقيقة مني ومن صفاء وهادي تاهي كذبها
بدر : وهي قالت ليك غير عليا انا؟ ماجبداتش ليك شي حد آخور غيري؟ هممم
سفيان : نتا وباك واحد، مجرمين بجوج ماغانستغربش أنه يكون مشارك معاك فهادشي
بدر غمض عينيه مزير عليهم وكارز على سنانو باغي يهدن راسو ومايصدق مرتاكب جريمة بصح وديك ساعة غايثبت عليه صفة مجرم ديال بصح .. بغا يتحاور معاه بالتي هي احسن ويوصلو لحل ويرجع مراتو وولادو ومايبقاش يضيع الوقت خاصة انها داخلة لشهرها وبغاها تولد فظروف عادية ويكون معاها .. هادشي كامل مخليه يتحكم فراسو ويبدا يرطب مع سفيان تا يوصل لشنو بغا ولاخور مقصح راسو وماباغيش يسمع ليه ولا يفهم ..
سفيان (باستهزاء) : مالك سكتي ابنجلون ولا تقاداو ليك مابقا عندك ماتقول الحقيقة تاتوجع ياك
بدر : با لي خطط لهادشي اسفيان، علاش غانبغي نبرر ليك كون كنت فعلا انا لي قاتل؟ غانجيك من اللخر ونقوليك يلا عندك شي دليل بينو وسير جري طوالك وماغاتصور من ورايا والو، ولكن حيت ماداير والو وحيت عرفت شكون داير هادشي وواخا يكون لي والدني غانبغيه يتعاقب، علاش نكذب ونفتري عليه؟ علاش نخرج راسي ونخليه هو حاصل؟ كاين شي حد يدير فباه هاكا؟ سفيان سمع أنا فعلا سيفطت رجالي يجيبو ديك البنت ولكن عطيت امر أن تاحد مايتآذى، درت هادشي باش نعاون با، با لي صدق عدووويا وتايخطط باش يوقعني ففخو ونجح للأسف، دور عليا واحد من رجالي وخلاه يغدرني، قتل وحصلها فيا انا وخرج هو منها وهادشي كامل حيت قررت نبني مستقبلي بعيد عليه ومانتجرش لوسخو وها نتيجة قراري
سفيان : قصة جديدة هادي؟ (تايصفق) برااافو تاتعرف تألف ابنجلون
بدر (زفر بغيظ) : الحقيقة هادي
نعيمة راودها احساس ان بدر تايقول الحقيقة واخا مازال مافهمات القصة مزيان ولكن حساتو صادق فكلامو وسفيان ماعاطيهش فرصة يدافع على راسو وقررات تدخل ..
نعيمة : ولدي سفيان شنو خاسر يلا جلستي وسمعتي ليه؟ خليه يدافع على راسو ماتعرف يكون بصح مظلوم واش ترضاها لنفسك؟ ترضى تظلم شي حد
سفيان : ماظلمتوش ا لا نعيمة، كاينين شهووود لي حضرو لهادشي ماغايجيوش وينعتو فيه
نعيمة : ماشي أي حاجة شفناها ولا سمعناها نثيقوها، بعد المرات عينينا تايخدعونا ووذنينا تاهوما وباش ماتندمش اولدي تانقوليك جلس وسمع ليه، قنعك بكلامو تبارك الله ماقنعكش صافي دير بحالا ماسمعتي والو
تردد شحال قبل مايحسم أمرو ويمشي للسداري جلس فوقو، وبدر شاف فلا نعيمة بنظرة امتنان وتبعو وهي خلاتهم بوحدهم ودخلات للبيت عند بنتها ..
سفيان : يالاه دوي وقول شعندك
بدر : شوف ..
بدا يعاود ليه من الأول كيفاش جاتو الاخبار من مساعد باه ويدو اليمنى انه فالسبيطار جاتو ازمة وقاليه السبب هو شي وحدين تآمرو عليه وبغاو يدمروه وكيفاش ناض ومابغاش هادوك يحگرو باه وقرر يتدخل فهادشي وفهم الموضوع وقلب على البنت ومن بعد رجالو صدموه بموت عادل ...
سفيان : هادشي عارفو فين الجديد؟
بدر : الجديد عرفتو غير مؤخرا، واحد من دوك رجال لي كلفتهم يجيبو البنت تقتل فالحبس وقبل مايموت خلا ليا رسالة (جبدها من جيبو) هاهي قراها
شدها من عندو سفيان وبدا تايقرا فيها تا سالاها ورماها ليه فوق الطبلة ..
سفيان : شنو غايثبت ليا ان هاد رسالة ماشي نتا لي كاتبها وجايبها ليا تضحك عليا بيها
بدر : واش انا مسالي نتبرهش معاك؟
سفيان : هاد الورقة بوحدها ماشي دليل ابنجلون
بدر : عااارف، يلا قريتي تما شنو مكتوب فاللخر جمال مراقب جميع تحركاتي وعارفني فين تانمشي وعلاش هادشي لي رابطني ومامخليني ندير تاحاجة وماقادر نثيق فتاحد، تا السيد لي خدام معايا غايكون حاضيه، ويلا نتا درتي يدك فيدي غانوصلو لداكشي لي تانقلبو عليه
سفيان : وشنو غاندير ليك مثلا؟
بدر : نتا ماغايشكش فيك، غاتكون يديا ورجليا ..
--------------------------------------
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
