بقا شحال تايشوفيها ويتنهد وهي تاتسوط بنفاذ صبر تاعيات وتقابلات معاه ..
راندا : غاتبقا غير تشوفيا؟ دك الساعة قوليا نعطيك تصويرتي بلا ماتعذبني تا لهنا
بدر : بغيت ماحسن من التصويرة .. بغيت الأصل
راندا : عافاك جي نيشان ودوي بلا هاد التخربيق
بدر : كلامي ليك ولا تخربيق؟ واخا الالة مقبولة منك .. وهانا غانجيك من اللخر .. راندا كانبغيك والمدة لي جمعاتنا بجوج كافية باش نتأكد من هادشي باش ماتقوليش هادا حماق وغير تايرون ومايمكنش وديك الهضرة .. انا بصح باغيك وتانتسناك غير نتي تقبلي ونكملو بجوج، اش ضهر ليك؟
راندا : وتانا راه جاوبتك وقلت مانصلاحش ليك والسلام
بدر : قنعيني .. عطيني سبب مقنع لجوابك
راندا : سبب كثر من أنني مرا أرملة وأم لبنت؟
بدر : ومن بعد؟ أنا تاتهميني نتي فقط .. شي حاجة خرى ماهامانيش
راندا : ولكن أنا تاتهمني، مايمكنش ندخل فتجربة خرى
بدر : علاش هاد الرفض من اللول؟ عطينا فرصة وحكمي دك الساعة
راندا : مايمكنش .. انا ماتانفكرش وعمري نفكر فهاد الحاجة زائد الناس شنو غايقولو هاا؟ نتا عازب عمرك تزوجتي وأنا أرملة وعندي بنت من الفوق شفتي الوضع كي داير؟
بدر (قرب منها وشد وجهها بين يديه) : حنا مالنا فالناس اراندا هااا؟ يكفي أنني باغيك والباقي ماعلى باليش بيه .. أنا بغيتك كيما نتي وبنتك غاتكون بنتي وكانواعدك غاندير كل مافجهدي باش تعيشي نتي وياها بيخير ومايخصكم والو معايا وتا حاجة ماتخسر خاطركم غير وافقي الله يخليك
بلمسة منو قلبها بدا يضرب بجهد والتبوريشة طلعاتها وعينيها علاين يدمعو .. حطات يدها على يديه وهبطاتهم من على وجهها وحدرات عينيها للتحت ..
راندا : مانقدرش ابدر مانقدرش
بدر (بالغوات) : علااااااااش ماتقدرييييييش علاااااش؟ شنو كاين من غير هادشي هااا شنو مانعك
راندا (الصمت)
بدر : راندا واش ماتاتحسي بوالو من جهتي هاا؟ جاوبيني بصراحة واش أنا والو بالنسبة ليك؟
سكتات وماقدراتش تجاوب ولا تقول مالقاتش جواب مناسب لسؤالو، بصح هي شنو معتابراه؟ وواش هو مهم عندها ولا زايد ناقص كي والو؟ سؤال هي براسها ماعارفاش جوابو .. شافها سكتات وسهات قدامها وعرفها مترددة وحايرة وتالفة ومافاهماش راسها وماعارفاش شنو بغات وشنو لي لا .. فكر يعطيها شويا دالوقت تفكر فيه ومايزيدش يضغط عليها حيت ماغايربح تاحاجة .. بقاو مدة فالسيارة وكل واحد تايخمم فجيه تا صونا تيليفونها هو لي رجعهم للواقع .. هزاتو ولقاتها عيشة .. عرفات راسها تعطلات عليهم وغايكونو تشوشو عليها وهي تجاوبها ..
راندا : ألو عيشة
عيشة : راندا فينك؟
راندا : أنا جايا للدار
عيشة : تعطلتي وتشوشت عليك زعما الحانوت غير قريب
راندا : احم تا نرجع اوك .. شيماء عندك؟
عيشة : هاهي تاتلعب مع ولد خالها
راندا : اوك ردي ليهم البال
قطعات معاها ودوات معاه بلا ماتشوف جهتو ..
راندا : عافاك رجعني تعطلت
بدر : غانعطيك وقت تفكري فيه وتعرفي شنو بغيتي وجاوبيني .. وكيما كان جوابك غانتقبلو وماغانبزز عليك والو .. كانبغيك اه ولكن بالخاطر ونتي لامابغيتيش بخاطرك ابنت الناس
كلام قالو وفوق قلبو وعارف أنها يلا رفضات ثاني غاتجيه صعيبة ومستحيل يتقبلها لأنه أصبح مهووس بيها وفكرة ماتكونش ليه ماداخلاس لراسو نهائيا .. يا تكون ليه يا تكون ليه خياران لا ثالث لهما .. دور السيارة ورجع للبلاصة منين هزها .. تما حطها وهبطات بلا ماتنطق بحرف واحد خلاتو متبعها تا غبرات ورجع تاهو لدارو ..
غير دخلات مع الباب ووقفات ليها مينة ..
مينة : هادي هي لي بات تسخر غير من الحانوت صدقات جالسة نص نهار .. ياكما حولوه وحنا مافخبارناش
ماجاوباتهاش وعطاتها نخال وأصلات ماعندها ليها الگانة، دازت فيها لعند بنتها هزاتها تاتبوس فيها ..
مينة : وفينها هاد السخرة لي مشيتي تجيبي؟ شتك دخلتي خاويا كي خرجتي
راندا : واش دايرا معايا تحقيق ولا؟ نتي اش مشا ليك نخرج ولا ندخل سوقك؟
مينة : هأ مالك طرتي فيا هاكا؟ سولتك عادي مالي قلت شي عيب
راندا :الالة ماتسولينيش وخليني عليك
مينة : هانا مخلياك، شتيني غير لاصقة فيك يخ على گنس
طلعات فحالها تاتنگر وتاتحلف فيها .. عيشة سمعات صوتهم وخرجات تشوف اش كاين ..
عيشة : مالكم؟
راندا : مانعرف هاد بنادمة علاياش تاتقلب .. رجعات وبغات تحكم فيا ثاني يحسابها مازال ديك راندا البنية النية والضعيفة لي كانت دايرا فيها مابغات .. تجمع راسها ماتجمعوش نخرج فيها طول وعرض وفينما بات توصل توصل ويلا سميتها لالة ومولاتي تدير نفسها وتخرج ليا من داري تعطيني غير تيساع يخخخ تقول ناقصاها أنا دابا .. دير خير مايطرا باس ومالي أنا گاع على هاد القرع نمشط ليه راسو .. شدو حقهم اش مازال بغاو عندي
عيشة : صافي كالم اصاحبتي .. ماتستاهلش تعصبي على ودها
راندا : بنادم تايخرجك على طوعك
عيشة : راندا نعلي الشيطان ماوقع والو دابا وزعما نتي عارفاها كي دايرا وصبرتي على ماكثر من هادشي .. شنو وقع ليك دابا؟
راندا : الله ينعلو ويخزيه
جلسات عاقدة حجبانها تاتسوط وعيشة تاتشوفيها ومتأكدة أن شي حاجة بيها وهي لي معصباها ماشي مرات خوها وهادشي واضح وباين خرجات فشكل ورجعات فشكل خور والتعطيلة لي تعطلات من وراها شي حاجة ومابغاتش تسولها اكتفت تهدنها وصافي ..
عيشة : نتسناو خوك يرجع ونحطو الغدا .. دابا غانوكل هاد الملائكة ونطلعهم ينعسو غايكونو عياو باللعب
راندا : واخا ختي .. تانا غانطلع لبيتي نشرب شي كينة ونريح شويا حاسا براسي غاينفاجر
طلعات لبيتها وغير سدات عليها الباب وطاحت للأرض تاتبكي شادا فصدرها مزيرة عليه حاسا بالنار شاعلة فيه .. تاتبكي وتنوح وماعارفاش السبب .. لي عارفا هو محتاجة تبكي باش ترتاح ..
النهار كامل وهي سادا عليها وتا الغدا مانزلاتش ليه ودارت السبة براسها ضارها ..
-ودازو الايام .. وهي على نفس حالتها مابقات تا حاجة عاجباها والضحكة غير بزز باش تاتخرجها فاش تكون مع عيشة ولا مع بنتها .. من داك نهار مابقاتش شافتو ولا هضرات معاه مازال وهادشي زاد أزمها وحاسا بشي حاجة ناقصاها، فكرات وفكرات وفكرات وماوصلاتش لقرار أخير خايفة ومترددة .. وتاهو ماحكرش عليها وخلاها على خاطرها واخا تاهو حالتو ماتقلش عليها وكل نهار تايتسناها تسيفط ليه ردها ووالو ..
اليوم السبت وعيشة خاصها تمشي لدارها .. ومينة منين صبح الحال وهي عاسا عليها فينما دارت تاتبعها .. وهوما جالسات بثلاثة فالكوزينة تايطيبو عيشة حسات بشي حاجة فشكل ومنين فاقت وهي ماشي على برجها وشكات تكون مريضة خاصة راسها صابح ضارها ومعدتها مقلوبة ودابا كملات فاش شمات ريحة الطياب وهي طلعها الترويعة وناضت من حداهم تاتجري نيشان للدوش وبدات تستفرغ .. راندا تخلعات وتبعاتها ولحقات عليهم تا مينة مضيقة عينيها وقفو عند الباب تسناوها تا خرجات تاتمايل وشدات فيها راندا ..
راندا : عيشة مالك اختي؟ واش مريضة
عيشة : م ماعرفتش قلبي نايض عليا اختي وراسي داايخ
راندا : غاتكون المعدة لي دايرا ليك هادشي
مينة (نقزات) : وباش عرفتيها المعدة؟ تقدر تكون حاجة خرى وهاد الاعراض انا تانعرفهم مزيان .. شوفي فيها مزيان كي لونها مخطوف وماشاداش فراسها
راندا : شنو زعما؟
مينة :باينا للعمى حاملة
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
