خلا بنتو والحاجة منهارين ومشا هو بسرعة لفين قالو ليه هو والشيفور، وقفات اللوطو بعيد على مكان الحادثة حيت البوليس حبسو الطريق وسيارة الاسعاف واقفة، نزل برجلين ثقال وفاشلين عليه، طار عندو عبد الرؤوف سندو ..
عبد الرؤوف : الحاج قوي راسك
الحاج : ولدي .. ولدي .. ولدي
كلمة وحدة ففمو وعينيه على سيارة ولدو لي واقفة جنب الطريق وبابها محلول والبوليس داخلين ليها تايقلبو، عبد الرؤوف تايدفع الناس خوا ليه الطريق تا وصل للحد ولقا الحديدات حابسين وجوج من رجال الأمن واقفين تما حابسين الناس مايقربوش، عينيه تصوبو نيشان لجنب السيارة فالأرض، آخر حاجة بانت ليه هي وجه ولدو قبل مايطلعو عليه السنسلة ويهزوه لسيارة الاسعاف ويمشيو تحت نظراتو، مال على الحديدة كان غايطيح كون مالقفو الشيفور لي غلبوه دموعو، دفع الحديدة بغا يدوز يلحق عليه وحبسو الشرطي ..
الشرطي : فين غادي ا سيدي
الحاج : ولدي .. ولدي
عبد الرؤوف : الحاج هو الأب ديال سي عادل
فصح ليه المجال يدوز وشدوه بغاو يسولوه ولكن حالتو ماكانت تسمح ليه ينطق بتا حاجة، وقالو ليه يلحق عليهم لمستودع الأموات وداكشي لي دار مشا ودخلوه يشوفو، كانت لحظة تاتقطع القلب وهو داخل يشوف ولدو لي قبل بساعات كان معاه فالدار تايضحك معاه ودابا هو مجبد فوق البياص مغطي كامل، طاح حداه تايبكي بكاء مرير والممرض شادو من ذراعو تايحاول ينوضو وهو مرمي على ولدو معنقو هاز ليه راسو حاضنو لصدرو وكايفيق فيه ..
الحاج : عاادل ولدي، فييق اولدي فيق الله يرضي عليك فيق اولدي ماتحرقنيش فيييق فييق خليني نموت انا وماتموتش ليا اولدي فيييق، نوووض اولدي تشوف بنتك، بنتك لي كنتي تسناها كل يوم، نووض فرح ببنتك وهزها الولدي نووووض، نووض عند مراتك وعندي وعند مك وختك اولدي، نوض عند صحابك نوض عند عائلتك وناسك اولدي نووووض
تايغوت ويبكي وماباغيش يطلقو، عينيه مسدودين وجنب فمو فيه دم وفوق حاجبو، والايزار باش مغطي تاهو فيه دم، جا ممرض ثاني فاش سمع البكا والغوات وعامل تما شدوه بثلاثة خرجوه من الغرفة فين كاين عبد الرؤوف تايتسناه، عنقو تايواسيه والممرضين مقابلينو بنظرات الشفقة .. صباح اليوم التالي تسلم الجثة ديال ولدو بحكم معارفو لي تدخلو باش يعطيوه ليه يدفنو ..
-فاق من سهوتو على صوت جميلة ..
جميلة : با الحاج عطيني يديك راه وصلنا
شد فيها ونزل وتبعاتو الحاجة لي تاتجر فجلابتها الكحلة، دخلو للمصحة الخاصة فين كاينة عروستهم وطلعو نيشان للشومبر، حلو الباب ودخلو لقاو سهيلة جالسة فالكنابي هازا رجليها عند صدرها وخاشيا وجهها وسطهم وجسمها تايتهز اثر بكاءها، زادت عليهم تاهي، مشات عندها جميلة جلسات حداها وجراتها عندها عنقاتها تاتسكت فيها ..
جميلة : ششش سهى يهديك الله اختي، باراكا عليك من البكا الله يرضي عليك
سهيلة (تاتنخصص) : بغي غ يت خ خويا اهئاهئهئ
جميلة : دعي معاه دعي معاه
سهيلة غير مازادت فالبكا، خوها لي كان فيه كلشي وعلاقتهم وطيدة ومتعلقة بيه لدرجة كبيرة بين ليلة ونهار مابقاش ليه وجود فحياتهم ووسطهم، الحاجة قربات للسرير فين ناعسة راندا على جنبها جلسات فكرسي حداها ومدات يديها لشعرها تاتملس عليه ..
جميلة : سهيلة، راندا فاقت؟
سهيلة : اه فاقت وبدات تغوت ثاني ورجعو عطاوها مهدئ هئهئهئ مابغاتش تقبل هادشي
جميلة : والبنيتة؟
سهيلة : غير قبيلة طليت عليها فالحضانة هئهئهئ شوفتها زادت شواتني
جميلة : لا حول ولا قوة إلا بالله، ياربي تعاونا ياربي وتقوينا ..
أنت تقرأ
عشق البدر
Romanceقصة درامية بامتياز .. تحكي عن فتاة يتيمة عاشت المعاناة حتى دخل حياتها من أرجع النور لها أحبها دللها وعطف عليها قبل أن يفقد حياته في حادثة غريبة غامضة وترجع أرملة تعيش في ظلمة وتفقد الأمل من كل شيء فهل الأمل سيعود لحياتها من جديد؟؟ تابعو القصة لتجدو...
