شارع ال60

1

#قصتي ، خلتني اقتنع تماماً ان مافي مرتين حيقبلو يتشاركوا في راجل واحد !

ملوحظه :
ما تنحاز لي اي طرف من اشخاص القصة !!! و بعدها قوي قلبك و اقرأ للنهاااية !!

ملحوظة تانيه :
مواعيد الحلقات كل يوم الساعه 8:00pm بتوقيت السودان + مافي عدد معين للحلقات .

متابعه ممتعة للجميع  |☕️
#فاطمه_قسم_الله
#سحر_سمير
و دعوة حلوة بتسسسعدنااا ♥️

بسم الله الرحمن الرحيم

قصتي دي علمتني ان مستحيل مرتين يقبلو يتشاركوا في راجل واحد !

.
.
.
.
.

لي لحظة لقيت نفسي في نص البكى و السكاليب ما فاهمه حاجة !
لقيت يد مسكت في رقبتي من وراي و بتقول لي : ليه تقتليها ؟ حراااام عليكي !
انتي القتلتيها انتي القتلتيهاااااا و كمان بي كل وقاحه و قلة ادب جايه في نص بيتها ! انتي القتلتيها !
و بقيت ما سامعه غير اصوات الحريم دي حوليني و كاتمين علي و الماسكاني من يدي و الماسكاني من عبايتي لمن شرطوها لي و كل وحدة تلبع فيني بي اتجاه ، و بقولو لي انتي القتلتيها ولازم تتعاقبي ! انتي القتلتيهااااا !
قلت ليهم : انا ما قتلت زول انتو ليه بتقولو لي كدا !
فجاة جاني صوت من وراي بقول لي : ( انتي القتلتيها )!
و مجرد ما اتلفته لقيتـ.....

#جزئية_معلقه

(مدخل أول)

كل يوم كنت بجي داخل البيت دا كـ ختام لي يومي الطويل ! ما كان بفرق معاي ادخلو الساعه 10 و لا 12 بليل ولا حتى الفجر !
كنت غير مبال بي مسؤلياتي ! او بمعنى اصح !ما
قادر اعترف بيها و اتصالح مع وضع اتفرض علي من مدة طويله !
و كعادة كل يوم ، بس ما بنفس احساس كل يوم !
لاول مرة اقيف قدام الباب و ما عندي جرأءة ادخل بيتي ! عشان خايف من المواجهه !

اختار منو فيهم ؟

#قبل_سنتين

** يا زوووول يا زووول ! ووووين يا جميل خش بالحضن ياخ والله شوق شووق ! الخبر الامور الاهل طيبين و رايقين ان شاءالله  ..
__ صحبي واخوي ياخ ، ورب البيت شوقات لمن مدفقه عديل يا معلم ! كيف عامل بالله !
** نحمدالله ! شنو انت يا اخوي لقيت السودان و اللمات و الاجواء الظريفه ديك و نسيتنا يا صحبي!
__ ما صدقته ارتاح من جو الشغل والاستريس الحاصل دا و بيني و بينك شوفة الاهل براها بالدنيا !
** كدي عيني في عينك كدا متأكد شوفة الاهل هه والله كان ما اخاف الكضب الظاهر في وحدة بهناك قدرت عليك ههههه حركاتكم انت و مالك دي بعرفا ليكم كويس انا  .
__ النصيحه هو من نحية لقيت فا هو لقيت هههه
** ايوا ايوااا الله عليوووو هههههه تتهني ، اها يلا خلي لي اجواء السودان دي على جمب لحد المساء و تحكي لي بالتفصيل بعدين و دكتوي فااهم دكوتي يا الطيب على الله القاك نسيتا لي !
و استلم الشغل يا صحبي انا طالع على المدير دا حأقدم طلب الاجازة مرة تانيه !
__ يا زول اجازة شنو ؟ يعني انا جيت و انت ماشي ؟
** و الله يا الطيب الحجةة دي ليها فترة بي عافية شويه و انا قاعد هنا مكتف بما فيه الكفايه ، و بي هنا دا مجرجرني في الاجازة ، لكن المرة دي والله كان انزل السودان نهائي ما عندي مشكله !
__ لالا ياخ سلامات ما تشوف شر ان شاءالله ! لا كان كدا لازم تسافر ، يا زول الغربه و القروش دي ما بتعمل لينا اهل ، م عندنا غيرهم ، الشغل يطير يا زولي و انا م عندي مشكله امسك جزء من دوامك ، خلاص يا صحبي ! حرك انت و على تلفون !
** حال الدنيا كلها مسؤليات لاحقة بعض ، الحمدلله ! خلااص ظريف يا زولي ، يلا لقداااام !
__ يلا يا عزيزي ربنا يطمنك !