شارع ال60

٢٩

#تاني_يوم

#سلوان_بتحكي

امس رجعته البيت الساعة 8:00 تعبانة ومرهقة شديد من الشغل الكان ضاغط والطلبات الكتيرة..

 لقيت امي نايمة جمب رقية اقرب سرير جمبهم رقدته ونمته طوالي من العلي.. برغم تعبي بالي مع رقية الكل ساعة والتانية بتقوم تبكي بديها رضعتها وبترجع تنوم..

صحيت بعد مجاهدة فتحت عيوني وحاسة رجولي وجسمي واجعني..

لا لقيت امي ولا رقية جيت طالعة 

*يمة اصبحتي كيف 

"جيت عليها بلاعب في البت "

وحلاتي انا واسكري قلبوشتي ياناس العسل دا صاحي ..

يمة مالك في شنو؟!!

ومدثر وين؟!!

—ترا نايم جوه وقافل الباب صحي بدري وتاوق ليك وشال كباية الشاي ودخل ياهو ما طلع تاني!!!

*اها طيب مالك انتي حاسة في حاجة ما مدثر بس!!!

—اخوك امس هرج في تأخيرك بالليل واتكلم معاي قلت ليه طلعت تفتش ليها شغل

 قال ما جيتي شاورتيه ولا كلمتيه..

وانا انتظرتك تاني وحاولت اتصل بيك بالداهية دا ما عرفت كيفن بستخدموه.. بقيت شايلة رقية بنوم فيها نعسته ورقدته جمبها نمت تاني ما صحيت بجيتك..

*امممم اي جيت لقيتكم نايمين ما حبيت اصحيكم رقدته نمته من الارهاق..

 انا لقيت شغل في محل حلويات ونزلوني طواالي وما صدقته وافقت في لحظتها!!! خصوصا المحل ما بعيد ..

—سمح طبيعة الشغل شنو ومواعيدو كم؟!!

*محل حلوياات يا امي قلت ليك طلبات وكدا من الساعة ١٢ ضهر ل ستة .. بس انا امس اتأخرته عشان يادوب نزلته كنت لازم اشوف طريقة شغلهم وافهمها كويس..

 معليش يمة انا مفروض وقتها اتصل بيك واوريك بس مع الضغط وكترت الناس قلت ما من اول يوم انشغل بالتلفون وانا محتاجة للشغل دا ..

ختيت في بالي بعد ارجع بوريك الحاصل..

وقت هو بعرف اتكلم مالو ما اتصل بي.. ولا عشان عارف حا اقول ليه شنو..  

—لا لا يا سلوي عارفة مدثر انتي اوعي يابتي تسمعيه كلامك الحار دا اخوك موتت مرتو لسه فيه ما شايفة شكلو وحالتو .. الله يهديك انتي..