شارع ال60

٧

"وطلعت خلتني في حالة خلعة من كلامها الما اتوقعتو منها نهائي"..

رقية !!

 رقييييةً! اقيفي ... اقيفي هنا بتكلم معاك انا ! دا كلام شنووو القاعده تقولي فيهو دا ! 

رقييية !! 

( في جوا نفسها بتتكلم )

معقول ! رقية دي الليله اصلو ما براها في حاجة غلط لا دا كلامها لا هو اسلوبها ! من قمنا مع بعض عمرها م اتكلمت معاي كدا حتى لو اتشاكلنا و اتماعطنا عديل م حصل زعلت مني مهما اكون غلطانه عليها و في حقها هي البتجي تصالحني ! 

لالا انا لازم امشي ليها !! 

( اتناولت توب امي و طلعت ) 

و انا طالعه لاقتني امي في وششي ! قالت لي : 

__ جابت ليها حوامة انصاص الليالي ! 

 يمة الله يرضى عليك انا فيني من المغسه البكفيني عليك الله لو عندك شكله و لا نقاش اجليهو لي اي وقت تاني ، و عشان اريحك كلو كلو انا ماشة لي رُقيه !

__ رقية دي مش كانت معاك اسسسي دي !! 

سلوى ! سيرتك فاحت في الحلة و خلاص انا بعد دا قلت الروووب انا ما عارفه القاها منك و لا من ابووكي ، امُلصي التوب دا و انجري ل جوااا ، و رقيه دي 24 ساعة خلقتها في خلقتك ، الصباح امرقي عليهاا ! 

 يمممة انا بقول ليك الله يرضى عليك ، و انتي بالذات انا عمري ما زعلتك كان قليت ادبي على امة محمد دي كلها بجي عندك و بقيف ، عليكي الله م تخليني ازعلك الليله في اني اكسر كلمتك و خليني امشي ليها ضروري ! 

__ مرقه مافي ! اكان دايراها جد يديك ليها الحيطه ، ناديها !! يلااا 

 ( بقيت بطنطن والعبرة سدت حلقي كلو كلو ) ' يمة طيب كان قلت ليك رُقية زعلانه مني حتخليني امشي ليها ؟!

 لا يا سلوان !!! و ( فاتت) !! 

بجد ما عارفه امي دي مالها متشددة علي كدا ! انا عارفه انها متضايقه من الوحدة لكن كمان انا اسوي شنو و اليوم دا بالجد كمل ضيقي كلو و بقيت ما عارفه القاها من منو و لا منو !! 

دخلت الاوضه و مرقته التوب و طلعت تلفوني من تحت المرتبه على امل القى تلفون احمد فاتح !! 

بس كل مرة كنت بلقاهو مقفول ! 

اول مرة اقلق و احس دمعتي في طرف عيوني كدا ، اول مرة اهتم لي احمد ، كل مرة كنت الآمر و الناهي و كان ما اخاف المبالغه كنت بمشي كلامي عليهو لاني واثقه من انه متمسك بي و بريدني شديد و شهادتي مخليه نخرتي في السما و حرفياً ما فاضيه لي زول و خصوصاً بنات القرية !