شارع ال60

١٠١

حبيباتي مساء الورد
بتمنى التسجيل السجلتو ليكم في القناة يكون فيهو رد كافي لي كل كلمة قلتوها لي و لي كل تقصير .. سعيدة بيكم 🌷 شكراً 🙏🏻🌷

#زنوبيا :

سلوان بتقول :
فجأة وقفته بعيد من الجهاز و هو لسه شغال ! و وقفته من حركتي التلقائيه (ردة فعل)  ، بقيت بعاين و خاته يديني في خشمي و عيوني مرقرقه !!
بتفرح و بشب و بتهز بي امشاط رجلي " حركة من حركات التوتر التلقائيه "
حرفياً انا وقتها ما كنت حاسه بحاجة حوليني و مترقبه التفاصيل [ حركة اليد اللي كانت بتتكتب لي على مر اربعه شهور و خطو الحفظتو بي نقاطو العشوائيه ] القدامي بي لهفه شديده .. لمن الفيديو وقف !
رجعته قعدت " خاته يديني على عيوني بتكتك بي امشاط رجولي في الارض ، و بعاين في الشاشه اللي اصلاً مافيها حاجة غير { The End} اللي مكتوبه في نهاية المقطهع اللي في ال CD "

وقتها اول سؤال جا على بالي بعد المقطع انتهى !
انه : ليه المقطع الاول من الفيديو ابيض و اسود ؟؟
ما عايزني اعرفو ؟؟

اريج " بي خوفه علي و خلعه ":

سلوان ! انتي ما كويسه صح ؟؟ تحبي تمشي البيت ؟؟
اطلع اكلمهم فوق ؟ في قاعدين كلهم فوق حتى مُهيد م عدا استاذ حسن ! 

سلوان : " هزيت ليها راسي شديد بالنفي مصحوبة بي تعبير هــئـا ، نزلت يدي في الكيسه و طلعت القرص ، رجعتو في علبتو و غلفتو بالظرف و دخلتو شنطتي و شلت الكيس رميتو في الباسكت لاني كنت مشرطاهو "

اريج : طيب ممكن اعرف فيهو شنو الـ CD دا ؟؟

سلوان : " دعكت يديني بي عيوني المرقرقات و اتنهدت بي قوة و قلت ليها مبتسمة من قلبي : اسفه يا اريج ، حاجة خاصه شويه لو ينفع اكيد كان وريتك ..  ، انا حا اقوم اغسل وشي !

" اثناء ما قمته مشيت لي جوا ، سمعت صوت تلفون المحل رنَ ، رجعته ، فا لقيت اريج رفعت السماعه .. فا دخلت جوا تاني على المغسله"

{ بعد 7دقايق ، جيت راجعه ، شايفه في ناس شكلهم ما قاعدين في السودان ، فا كانو بيعاينو في البترينه و ملامح وشهم ما بتوحي بي اي حاجة ، فا مع وصولي لي مكاني ، اريج قامت لي بقت واقفه معاهم ، فا ولد صغير عمرو حوالي من 7 لي 8 سنوات كان ما خاني التخمين ، قال لي ابوه ..}

" دا شنو دا يا بابا ! ديل جعانين ساي ، حاجاتهم دي انحنا هناك بنشتريهم من الماركت الجمبنا ، و ما تفكر تشتري لي كيكة عيد ميلادي من هنااا هزعل منك والله و بكلم ماما ... و بقى يعمل حركات بي وشو و صوتو و يشد في ابوه انه لازم يمشو و بيعاين في المحل داير م يدور "

ابو الولد " ابتسم " : شكراً " ساق ولدو و طلع "

اريج : شافع قليل ادب ! عيب ساي ما قالها ليهو جني و جن الابهات و الامهات الزي ديل !
بعدها فجأة سكتت " احساس اتذكرت حاجة "
" عاينت لي مستغربه "
انتي صحي في زول حجز كيكة ايسكريم عندنا مفروض يستلما الليله ؟؟  المهم قلت ليهو لا ما عندنا كيك زي دا،  و شكلو كان متصل غلط !!