شارع ال60

2

انا سلوان دي ما بكضب عليكم كنت قمة في قلة الادب والقطامة وطولة اللسان ما عندي كبير الا ربنا ..

بالواضح كان لا بحترم صغير لا شايب البفتح خشمو معاي بجيه الما برضيه..

ما جبتو من بعيد أمي هي شخصيتها كدا في الاخر ابوي عرس فيها وسكن مع التانية..

ما تستعجلو لقدام حا تعرفو الحصل شنو
وان ممكن الانسان بين يوم وليلة يتغير.
........

"بصلة واحدة بتوسخ الشوال"

*الجملة دي مع إنها إتقالت لي من قبل سنتين الا انها معشعشة في قلبي دا وكل ما أتزكرها بتعب شديد وببكي قدرتي رغم اني زولة شدة ما بالهين دمعتي تنزل ...

" طق طق جات صفقة"

-هييي انتي رجعتي تااااااني تسرحي ما قلنا بلاااااش ننكت القديم يا سلوان ولا شنو...

*خلاص انسينا من دي سيرة انا ماشة نتلاقي
مع السلامة.

-سلواااان سلوااان انتي زعلتي والله ما قاصدة عارفة الجواك طيب انتظريني سلوااان اوووف منك يا سلوي...
طيب عندك...!!!

"ما وقفته عشان اسمع"

*" طلعته طابة شنطتي قوي كأني بلجأ ليها حضن يطبطب علي وبقيت ماااااشة بس محل توديني رجليني وورجعت بي الزاكرة محل وقفنا"

__ يارب يارب ... البص دا مالو لف بينا كتير كدا !

** خش من وين هو زاتو انا مع الكلام معاك لمن سرحته ! اقي ... اقيف هنا يا ... اقيف اقيف !!!

-واااي سلوي نحن وين يابت الليلة كان رحنا نصل ل متين و كيف والمشرفة كان ابوي ضرب ليها ح تكلمو اننا طلعنا قبيل والليلة يا سلوان دي براها مشكلة باقي اليوم دا ما حا نبيتو في الخرطوم..

* رقية انتي ليك كم سنة ف الجامعة ؟!!! برلومة انتي؟!!
ولا اقول ليك ممكن تسكتي شوية وتبقي مرا وترتيني بجرستك دي كل  مرة ياخ اسكتي خلاص..

"الراكبين في البص كلهم بقو مركزين معانا"

"وبدون احس لقيت نفسي هجته"

*نعم في شنو خيير اخوات وبنتشاكل افتكر عادي الموضوع ما خطير الاحسن كل زول يركز في ورقو..

"سمعت همسات جانبية من بتين"

"المنفسنة دي مالا خلاص قايلة روحها رهيبة كدا غااااايتو"

"وبصوت واطي من راجل كبير"
"بنات قليلات ادب الله يهدي"

ما لحقت ارد من الاستعجال وبنرفزة
"طق طق للكمساري بأصابع يدي"

*انت يا اخ نزلنا هنا ما من قبيل بنكورك ليك اقيف اقيف مالك اطرش ما بتسمع

-يا بتنا انتي مالك من قبيل تكوركي والله كان ما مرا ما كنا سكتنا..