القصايد على مثلك صغيره مقام يلي اكبر من الشعار واقلامها

البارت 14

أخذت نفس من أعماقها لأنها عرفت إنها جابت العيد فيه وبشعوره وقت تحسسه إن خوفها أكثر من ودها له وهالشيء يرده عن راحته معاها : عـذبي ..
تنهد وهو يشتت أنظاره لبعيد : ما ودك تغيرين نظرة الخوف مني ؟ ما ودك يصير الود بيننا أكثر لأني ما عدت أدري مع هالخوف وش بيصير بالشعور يلي أتوقعه منك وكنت متأكد منه بعد كل هالخوف..
هزت راسها بإيه بتردد : ودي ، وتعرف إن الود مني ما يختلف بس مو بيدي باقي الأمور ويكفي إنك تشوف الود مني وما يحسسك بشيء غير ..
أخذ نفس بخفيف ، وضحك وهو يشتت أنظاره : أشوف الود فعيونك ولكن يرد الود خوفٍ فيك مني يانيّـارا ..
إبتسمت وهي تشتت أنظارها : ما ودك تكملها ؟..
هز راسه بالنفي : ودي تسمعينها معي وترا الليلة قمرا..
رفعت حواجبها بإستغراب ، وأخذ مفتاحه : بطريقة ثانية يعني تعالي معي ..
إبتسمت بخفوت : جاء ببالك إني بقول لا صح ؟ بس ما بقول ، بجهز أغراضي ولعلمك لازم تستأذن من أبوي ..
ضحك وهو يهز راسه بإيه : طبعاً ، بكلم عمي وأنتظرك
سكّرت منه وهي تجهز أغراضها ، ووصلتها رسالة منه إنه ينتظرها بالممر ..
_
« عنـد تركـي وسـلاف »
شدت الجاكيت على إيدها من برد الجو وهي تفكر بصمتهم من وقت وصولهم قدام البحر لحد هاللحظة ، توترت لوهلة من حست فيه يترك فروته على أكتافها ورفعت أنظارها له : جاكيتك ، وفروتك وبعدها ؟
تركي بهدوء : لو هالإثنين ما ردّوا البرد عنك حضني يرده صدقيني ..
شتتت أنظارها بعيد عنه مباشرة ، وتمدد وهو يترك راسه على فخذها وقررت تتكلم بعد تردد : لو بتحاكيني عنك وعن محسن وعن كل هاللعبة ، بسمعك ..
غمض عيونه بهدوء وهو يهز راسه بالنفي : كله بتعرفينه لكن المهم الحين ، تقولين لي وش غيّر رأيك وكلامك ..
رفعت أكتافها بعدم معرفة : إنت ، واللحظات يلي تكون مألوفه لي ولا أميزها ولأني عرفت بعد وقت إني مو على حق ، وما يحق لي أكلمك بهالطريقة ..
ميل شفايفه وهو ما وده يكمّل بالموضوع أكثر خصوصاً إن إعترافها بخطأها ومحاولتها إنهم ما ينتهون تكفيّه هالوقت ، إبتسمت بعد تردد وهي تشتت أنظارها : الشيء يلي أدركه منك إنك كنت الغريب يلي بكل الأوقات حولي ، الغريب المُستفز ويلي يحيّرني بكل موقف وبعد ما عرفت إنك إنت ، ما أتمنى أخسرك ..
رفع حواجبه بتعجب وهو يناظرها : لو كان لجل تجبرين خاطري يلي تظنينه مكسور منك لا تقولين هالحكي ..
هزت راسها بالنفي : ماهو لجل الجبر ، لجل إنه حقيقة..
هز راسه بزين وهو يغمض عيونه ويعرف بهاللحظة إنها تميل له من أول وجديد لكن هالشيء بيصعّب عليه أشياء كثير ، وغير هالشيء كله هي إنها تحاول تخفي كل كلامها تحت عقد صداقتهم السابق ويلي كان من إقتراحه لأنها بأول جلوسها معاه قالت له جملة وحدة فقط " قلتلي إعتبريني صديق ويلي بيننا صداقة وهالشيء طغى بتفكيري الأيام الماضية ويمكن لهالسبب ما ودي تكون أول خسارتي معك هالصداقة" ..

_
« بيـت فهـد ، العشاء »
إبتسمت بهية من إنسجام نيّـارا الكثير مع عذبي وخصوصاً الموقف يلي توها شهدته من كانت نيارا بتبعد عنه ورجع يسحبها لناحيته ويلفها للجهة الأخرى ، كانت ضحكاتهم واضحة لبهية بشكل ترك إبتسامتها تتوسع أكثر من قبل : سوار يمـه تعالي ..
إبتسمت سوار يلي توها دخلت من الخارج وهي تتوقع سؤال جدتها : يلعبون وخسرت نيارا وكان ودها تهرب منه بس رجّعها ، أمي تصدقين أول مره أشوفهم يضحكون كذا ! وتدرين عذبي وده يملكون بهاليومين كمان
هزت بهية راسها بإيه وهي تحاوط سوار بإبتسامة لأنها كانت شايفة التوتر بعلاقتهم قبل ، واليوم لمحت إنه ماعاد له وجود بينهم أبداً : نشوف الكبار وش يقولون
إبتسمت سوار وهي تتوجه للتين وسلاف يلي متمددين بالطرف الآخر ، وميلت شفايفها لثواني : سلاف بعالمنا؟
هزت راسها بإيه وهي ترفع نفسها : ويـن سيف ؟
رفعت لتين أكتافها بعدم معرفة ، وميلت سوار شفايفها : ما شفته من الصباح يصحى ويخرج للجيران على طول
رفعت حواجبها بتعجب ، وأخذت نفس بخفيف من صوت محسن يلي يناديها وهي تتوجه للمجلس ..
رمى الملف قدامها بسخرية وهو يناظرها : زوجك الغالي وينه ؟
رفعت حواجبها بتعجب وهي تناظر الملف لكن بدون لا تنحني له أو تاخذه لأنه رماه وما مده لها : تقنعني ما تراقبه وتعرف مكانه ؟
ضحك بسخرية وهو يناظرها : ولأني أعرف مكانه هالملف قدامك الحين ، قولي له ينتبه لأن صبري عليه ما يطول .
جلست بهدوء وهي تناظره ، وميل أنظاره لها بهدوء : الرجال يلي ما تعرفين أرضه من سماه لا توثقين فيه كثير ، تركي له علاقات وبكل موطى رجل لو ما تدرين ..
ناظرته لثواني بإستغراب : وأفهم من كلامك ؟
محسن وهو يمد إيده للملف بهدوء : إن تركي يسوي أي شيء لجل يكون به أحد بصفه ، خصوصاً من مكتب المحاماة وإنتِ أدرى .
مده لناحيتها ، وأخذته من إيده وهي تتوجه للخارج بدون ولا كلمة زيادة ، توجهت للأعلى وهي ترمي الملف عالسرير ورجفت إيدها وهي تمسح جبينها بتوتر : يعني وش المفروض مني أسويه بهاللحظة ؟