القصايد على مثلك صغيره مقام يلي اكبر من الشعار واقلامها

البارت 19

ضحكت وهي تنزل للأسفل مباشرة ، وإبتسمت بخفة من لمحته يلعب مع سيف سوني بالصالة : سيف عيني
عذبي وهو يميل شفايفه بهمس : تراها تقصدني بس ملخبطة ، سمي يا بنت العم وش وراك ..
ضحكت وهي تهز راسها بالنفي من لف لناحيتها : نبي منك لفتة وأخذناها ، كنت تبي شيء ؟
هز راسه بالنفي وكان بيتكلم لكنه إبتسم من لمح تركي وهو ينادي جدته : جاء تركي يمـه ..
خرجت بهية من المطبخ على عجل وإستهلت ملامحها مباشرة لأنها كانت تترقب مجيئه لكنها ما كانت تتوقعه لأن كل شيء من وقت الكويت كان يوضح لها إنه ما يبيهم أبداً ، إبتسمت نيارا وهي تسلم عليهم ، وسحبت سلاف مباشرة لجنبها يصعدون للأعلى : قبل لا نبدأ ، بينكم شيء شين ؟
هزت راسها بالنفي بإستغراب ، وإبتسمت نيارا وهي تفتح باب غرفتهم وضحكت سلاف مباشرة : تورثوني وأنا باقي حيّـة ؟
إبتسمت وجد مباشرة لكنها باقي ما تأكدت من كون الأمور على ما يرام وبأحسن حال لأن مافيه شخص أشطر من سلاف يخبي يلي بداخله وحتى لو كان بوقت عصيب ما يبيّنه ، تركت عبايتها وهي تمر من جنب الشباك ووقفت لثانية من لمحته بالحديقة بالخارج قدام الزرع ، ما حصلت لها فرصة كلام معاه ولا قدرت أساساً لأنه صحى وخرج مباشرة ووقت رجع كانت تنتظره لجل يجون بيت أبوها وهذا يلي صار ، بالمختصر ما كانت لها كلمة معاه أبداً ..
أخذت نفس لثواني بعدم إنتباه للبنات ولأن حواراتهم كانت موجهه لها : نسيت شغله بشوفها وأجيكم ..
سوار وهي تشوف تركي بالأسفل بهمس : عقلها معاه مش معانا ..
نيارا بإبتسامة وهي تتكي جنب الشباك لجل تشوفهم : بسم الله ..
وجد وهي تضربها : بكرا يراقبونك الناس مثل ما تراقبينهم ، قومي بسرعة !
رفعت نيارا حواجبها وهي تأشر لها تجي جنبها : تعالي لا تسوين فيها !
جلست وجد بجنبها وهي تميل شفايفها ، وضحكت سوار بالمثل وهي تجلس بجنبهم ..
_
بالأسـفل ، توجهت لناحيـته بهدوء وهي تعدل شعرها ونفسها وإرتباكها وهذا الشيء المهم بالنسبة لها ، كان واقف بالطرف الآخر ويتأمل بالورد يلي قدامه بدون ردة فعل لكن وقوفه بالنسبة لسلاف كان مخيف وكيف أكتافه ما ترتخي بهالوقت ..
توجهت لجنبه بهدوء ، وما لف أنظاره هالمرة لكنه تكلم قبل تبدأ بحكيها : إذا ودك تروحين المزرعة معاهم بكيفك
سكتت لوهلة وهي تشبك إيديها : ما بتجي ؟
لف أنظاره لها لكنه رجع يبعدها مباشرة من رن جواله وهو يرد ، وميلت شفايفها بهدوء وهي تشتت أنظارها ويحرقها هالتجاهل منه أكثر من إنها تعصب عليه لجله ..

رفعت حواجبها من مد إيده بدون لا يلتفت يعدلها خلفه لأن تميم ورياض دخلوا مع البوابـة ، رد السلام عليهم من بعيد وعرفـوا إن سلاف معاه ولهالسبب ما توجهوا له ..
سكر من سلمـان وعرفت إنه بيخرج معاه وهو يلف لناحيتها : عندك سؤال قوليه لجدك دام وثوقك كله بإجاباته وكلامه .
ميلت شفايفها بهدوء وهي كانت بتقول له إنها ما تاخذ إجابات من غيره ، وحتى وقت حاكاها محسن قالت له " لو ودي أعرف بتكون معرفتي من تركي " لكنها سكتت من شافت إن نظراته ما تبي منها كلام وبالفعل بمجرد سكوتها خرج للخارج بدون أي كلمة ، مدت إيدها لجوالها يلي رن بجيبها وهي تفتح المقطع يلي أرسلتها لها لتيـن ويلي كان عنها ، وعن تركي توه وقت دخّلها خلفـه وتحته كتبت " الغيرة عذروب خليّ محلا عذروبه" إبتسمت وهي تناظرهم وعرفت إنهم عند شباك غرفتها ويتأملونهم ، مّيلت شفايفها وكانت بتدخل للداخل لكنها جلست شوي وهي تستحي حالياً إنها تتأمل بهالفيديو لأنها مكشوفة من كل صوب لهم لكنها بنفس الوقت ما تنكر إن ودها تبوس رأس لتين من حلاوته وبنفس الوقت تخاصمها وتخاصمهم على حركاتهم ..
أخذت نفس بخفيف وهي تدري إن تركي هالمرة خاطره شايل عليها بشكل كبير ، وتدري إن رضاه ما بيكون سهل مهما كانت محاولاتها ..
زفرت وهي تدخل إيديها بجيب بنطلونها الخلفي ، ورجعت للداخل لأنها تعرف إنه ما بيرجع لوقت طويل والظاهر إنهم بيروحون المزرعة من الحين وبتروح معاهم ..
دخلت لعندهم وهي تشوف البنات بالأسفل ومباشرة توجهوا لها بطلب واحد وشرطهم إنها تقول " تم " فقط : أقول تم على شيء ما أعرفه ؟
نيارا برجاء : شيء بسيط ، بملكتي تسوينه وإلا ما بتسوين لي شيء ؟
ميّلت شفايفها بتفكير ، وإبتسمت : بما إنه لك سميّ
نيارا بإبتسامة : تلبسين الفستان يلي محد يستاهل يشوفه عليك !
ضحكت وهي تناظر وجد يلي رفعت أكتافها : سوار فضحتك مو أنا ، بس عيب ينقال للعروسة لا بأول طلب..
هزت نيارا راسها بإيه : عيب وكثير بعد ، ترديني ؟
هزت راسها بالنفي وهي تضحك : سمي وتم ما بقول غيرهم ..
_
« المـزرعـة »
ميّلت سلاف شفايفها بتأمل للمزرعة ، وللجو يلي أقل كلمة ممكن تقولها عنه إنه خيالي ، ميّلت شفايفها وهي تلف أنظارها لنيـارا : بما إن ودك بملكة مختصرة ، ليه ما تسوينها بالمزرعة هنا ؟ منها إختصار ومنها الجو حلو ..
ميّلت شفايفها بتفكير وهي تسكر من عذبي : تدرين ما كنت مقتنعة تكون هالويكند ؟ بس عذبي بيرجع الكويت بعد هالويكند وقال ماكو مجال غيره ووافقت ..
سلاف بضحكة : يعني لو ماكان بيروح الكويت ما بتوافقين ، بالنهاية يحبك وتحبينه ليه المماطل ؟