Rebirth of Chen An【Zaw + uni】

အခန်း (၁၃၄) ဘိုင့်ဘိုင်

အခန်း (၁၃၄) ဘိုင့်ဘိုင်

တင်းရှန်းမနေ့ကကောင်းကောင်းအိပ်မပျော်ပါ။အတိအကျပြောရလျင်လုံးဝမအိပ်လိုက်ရပါ။
သူ့ရဲ့အထူးလေ့ကျင့်ရေးအတွေ့အကြုံတွေအရသူဟာသာမန်သူတွေထက်နိုးနိုးကြားကြားရှိတာလည်းပါသည်။ ညရဲ့ပထမပိုင်းကတော့သိပ်မဆိုးလှဟုပြောရမည်။နောက်တစ်ပိုင်းမှာတော့တစ်စုံတစ်ယောက်ကသူ့ဘေးကိုကပ်ကပ်လာပြီး တို့တိတို့တိလုပ်လာသည်။

ကြီးမြတ်လှတဲ့မြေခွေးအိုကြီးဟာအိပ်တဲ့အချိန်မှာတော့ သိပ်မကြီးမြတ်လှပေ။ ရိုင်းပြလွန်းတာတော့မဟုတ်ပေမယ့် သူ့ကိုယ်သူတင်းရှန်းဘက်ကပ်ကပ်လာတာတစ်ခုပါပဲ။
ပထမတော့ချန်အန်းကကျောပေးအိပ်နေပြီးသူ့ဘက်ကိုကျောနှင့်သာတိုးလာသည်။ဒုတိယပိုင်းမှာတော့ တစ်ဖက်ကိုပြန်လှည့်လာပြီးတင်းရှန်းကိုရေဘဝဲတစ်ကောင်လိုဖက်ထားလေသည်။

တင်းရှန်းအနေနဲ့ကအဖက်ခံရတာလောက်ကိုမမှုပါဘူး။ဒါပေမဲ့ ချန်အန်းကဒီတိုင်းမရပ်ဘဲဆက်ပွတ်သီးပွတ်သပ်လုပ်နေတယ်လေ။ဒီတစ်ခါကကျောပြင်နဲ့မဟုတ်ဘဲပါးနဲ့ပွတ်နေခဲ့တာ။ ကျန်းမာသန်စွွမ်းတဲ့လူငယ်လေးမှာ စိတ်ကိုဘရိတ်ကုန်နင်းပြီးအိပ်မပျော်နိုင်ခဲ့ပါချေ။ အိပ်ပျော်လုနီးပါးအချိန်ရောက်တော့လည်းမိုးကလင်းနေပြီ။

'' မင်းမျက်ကွင်းတွေညိုနေရအောင်တစ်ညလုံးဘာလုပ်နေတာလဲ''

တရားခံကြီးမှာတင်းရှန်းဘာကြောင့်အိပ်ရေးပျက်ရတယ်ဆိုတာကိုမသိရှာ။ အစားကောင်းအအိပ်ကောင်းနှင့်သခင်ကြီးချန်ကတော့အကျောဆန့်လျက်အားရပါးရသန်းကာနိုးလာသည်။

တင်းရှန်းကတော့ဘာမှပြောနိုင်ဘဲနှုတ်ဆိတ်နေသည်။ တကယ်လို့ချန်အန်းမှာအိပ်နေတုန်းသူများကိုဖက်တတ်တာ ပွတ်သီးပွတ်သပ်လုပ်တတ်တာတဲ့အကျင့်တွေရှိမှန်းသူသိခဲ့ရင်ကြမ်းပေါ်မှာပဲနှစ်ခါမစဥ်းစားဘဲအိပ်ခဲ့မှာ။

ပေါ့ပေါ့ပါးပါးနံနက်စာလေးတစ်နပ်စားပြီးနောက်မှာတော့ ချန်အန်းကဟယ်ဟွာကိုအဝတ်နှစ်စုံရှာပေးဖို့ပြောလိုက်သည်။ ယူလာပေးတဲ့အဝတ်တွေထဲကသာမန်အဖြစ်ဆုံးကိုလဲဝတ်လိုက်ကြသည်။ ဆံပင်တိုနေတာကလွဲရင်သူတို့ပုံစံကသိုင်းကားထဲကလိုကြည့်ရအဆင်ပြေသည်။