فاتت سمانة مور ما دارت ماما العملية وخرجت الشومبرة نورمال باه فاقت بصح مزال متقدرش تخرج من السبيطار حتى يفوت عشرين يوم على العملية .كل نهار يجوز نفس الروتين نبقاو مع ماما حتا لليل من بعد نروحو للدار ومن نهار لي دارت ماما العملية ماجا لا مسلم لا خوه واحد فيه لا تفكرنا ولا سقسا حتى نهار روحنا انا واسمهان للدار وخليناها راقدة ، كي رجعنا لقينا مسلم واقف في الباب ، تاع الشمبرة حيرت كي شفتوا خاطر من لي كملت العملية تاع ماما وراح مزادش رجع . صافح معانا قالنا لاباس قتلوا لاباس ، غير الخير لي جابك عندنا وفكرك فينا . غمزتني اسمهان قاتلي علاه راكي تهدري معاه هكدا .قتلها اسكتي مدخلكش . عاودت شفت معاه لقيتو تبسم قتلوا كيفاش حتى تفكرتنا وش سبب الزيارة . قالي علابالي بلي راكي زعفانة كي ماجيت وماسقسيت عليكم بصح الله غالب كانت عندي ظروف وماكنتش هنا . قتلوا ايه الله يسهل وجيت راح نفوت للشمبرة عند ماما. قطعلي الطريق قالي راهي عندها ضيف وحابين يبقاو وحدهم .قتلوا شكون هدا الضيف بعد خليني نفوت عند ماما . قالي اصبري شوي من بعد ادخلي وشبيك مزروبة راني قتلك عندها ضيف . قتلوا شكون هاد الضيف انطق ولا خليني نفوت . قالي بابا لي راهو عندها . تشوكيت قتلوا شكون شكون باباك وش جابوا هنا .قالي انا لي جبتوا شكون لي راح يجيبوا. قالتنا اسمهان وش راكم تهدرو شكون باباك ومين يعرف ماما حتا يجي لعندها . قالها بابا يكون خالك يعني هو يماك خاوة . ضحكت وهيا حايرة قاتلوا لا راك تتمسخر وش راك تخرط انت. شافت معايا قاتلي راه يهدر بصحوا هدا .درتها براسي ايه .قاتلوا وين كان هدا باباك كي كنا قريب راح نموتوا بالجوع . قالها الظروف هي لي تحكم من بعد وتعرفي خلي دوك يصفيو لقلوب بيناتهم . قتلوا كيفاش حتى عرف بلي ماما هنا .قالي منعرف شكون لي قالوا بلاك واحد من معارفوا . منكدبش بلي فرحت وتحمست شوي نعرف واحد جديد من عايلتي مهما نكروني يبقاو عائلتي وعندي فضول نتعرف عليهم سيرتو خاوت ماما يعني خوالي كانت ماما ديما تحكيلنا عليهم بلي هما كانوا مدللينها بزاف وحنان عليها وبلي انا نشبهلهم بزاف . قاتلي اسمهان انتي علابالك من قبل وماقولتليش ، علاه مش انا اختك الكبيرة . كنت راح نرجعلها شفت اصيل جاي من بعيد بنفس الستيل تاع اللبسة كلش نوار وكوديوس في رجليه . وصل ديراكت شعل في مسلم قالوا وش قلت ### انت راك تكسر في كلمتي .قالوا والله ما انا لي قتلوا هو لي عرف وحدو ياك علابالك بيه من لول مكلف واحد يحوس عليهم . قالوا من بعد ونتفاهموا عليها وين راه دوك . قالوا راهو لداخل مع عمتي. فات ديراكت فتح الباب ودخل . شوي حتى انا لحقت فتحت الباب ودخلت لقيت راجل يبان في الستينات بلاك خمسة وستين قاعدة فوق كرسي متحرك مقابل ماما لي راقدة في السرير ودموع في عينيهم وهداك واقف ويشوف معاهم . داروا شافوا فيا ثبتت في ملامح تاع الراجل لي هو خالي لقيتوا تاع الصح عندي نفس ملامحوا نفس العينين والنيف . بقا يشوف معايا ويتبسم من بعد قال لماما هادي بنتك شكون فيهم . قاتلوا هادي جوليا شاورلي بيدو قالي ارواحي عندي بنتي . دورت عينيا عند اصيل لقيتوا يشوف معايا ومخنزر مشنف مش عاجبوا الحال أصلا وجهوا من هداك النوع حتى وهو نورمال يبان راه يشنف شايف روحوا متكبر تحساب حاكم السما على الناس . مشيت عندو وانا مترددة غير وصلت عندو فتحلي يديه عنقني بيديه . حسيت احساس مستحيل نقدر نوصفوا خاطر جامي جربتوا احساس الاحتواء يمكن . مسحلي على شعري قال لماما بنتك عادت مرا وحنا ما تلاقينا. شفت مع ماما غير تبكي قاتلوا الله لا يسامح لي كان السبب. عرفتها تهدر على بابا لي منعرف لا إسموا لا لقبوا لا راطستوا من جات كل ما نسقسيها عليه تقولي انسايه انا ماماك وانا باباك هو سمح فينا انا وياك انسايه . قالها خالي من ليوم داري هيا دارك منزيدش نفرط فيك لي صرا بكري مكانش لازم يصرا يما وبابا كي كانوا راح يموتو وصاوني عليك بصح مقالوليش بلاصتك وين بقيت نحوس عليك ملڨري حتى انا تضررت من لاكسيدو معاهم وخسرت رجليا لزوج وعانيت بزاف بصح بقيت نحوس عليك وكي لقيت بلاصتكم لي كنتوا ساكنين فيها لقيتكم مكانش رحلتوا وبدلتوا الدار قبل ما نلقاك وهكاك ميأستش خصصت وحايد باه يحوسوا عليكم حتى اصيل كان معاهم بصح مكتوب ربي باه نلقاكم في هدا لوقت ، واحد يخدم هنا في هاد الكلينيك هو لي قالي كي بعث مسلم باه يسقسي ظهرت الحكاية صحيحة وربي فرحلي قلبي ونفدت وصية والديا .شفت مع هداك لي واقف في الباب كي ڨارد كور ويشوف فينا ما نطق حتى حرف .هاه باباه لي هو نورمالموا يكون زعفان من ماما وميقبلناش راه فرحان بينا وهو علاه راه ياكل في روحوا وزعفان وهاز شنايفوا تقول قاعدين فوق راسوا . شافني نخزر معاه تخنزر فيا ضحكت بأستهزاء بمعنى ڨاع التهديد لي قولتهولي بلوا واشرب ماه . دورت لخالي وهبطت زوج دمعات باه نغيضوا وانا معنقاتوا .قالي متبكيش بنتي علابالي شحال تعدبتوا في حياتكم وحدكم من اليوم انا في مقام باباك وانا راح نكون في كتافك من ليوم راح نعيشك اميرة .شحال فرحت هادي هيا الهدرة لي نحوس عليها نعيش كيف الاميرة . سمعت الباب تخبط عرفتوا خرج معجبتوش هدرة باباه بناقص منو أصلا وجهوا برك ينقص لعمر . دخلت اسمهان غير شافها قال لماما هادي اسمهان ياك . قاتلوا ماما ايه جات سلمت عليه اسمهان . بقينا معاهم ماما تالموا مشوكية غير تبكي وعندها الحق يعني 19 سنة كاملة ماشفتش خوها .
