بقيت في الشمبرة تاعي قاعدة مغزلة يمكن اكثر حاجة تقهرني كي يصدقو على ماما لبسة والماكلة وتجي هيا فرحانة بيها تعقدت من هاد الحاجة من لي كنت صغيرة كانت ديما تلبسلي القش لي يصدقوه عليها الجيران والبنات وقت لي نخرج يعايروني وكي نتعاارك معاهم يقوليلي رجعيلنا قشنا لي راكي لابساتوا .شفت الساعة وصلت الثلاثة ونص نضت نوجد في روحي باه نخرج ندور مع رؤيا لبست سروال تاع جلد سيري في النوار والطالوا مع فاست تاع فورير بيضة وطلقت شعري درت شوي مكياج هزيت ساكي وخرجت . لقيت ماما قاعدة في الصالة تتفرج قتلها ماما راني خارجة . بقات ساكتة عرفتها زعفانة مني . تنهدت ربي شاهد بلي نحبها وعلابالي بلي راهي دير في كامل جهدها باه تعيشني كيما نحب بصح منقدرش ننسا بلي هيا جابتني في الحرام بسبتها انا راني نعيش في الشئ هدا كامل قدمت بستها على خدها قتلها متزعفيش مني فطومة ياك علابالك انا لساني متبري مني . شافت معايا قاتلي مزعفتش. قتلها يا احلى فطومة انتي المهم انا راني خارجة مع رؤيا بلاك نطولوا راح نسهرو مع صحابنا . قاتلي وين راح تسهرو . قتلها في دار صحبتنا أسيا متقلقيش عليا ادا طولت . قاتلي روحي بصح كي نعيطلك هزي عليا . درتها براسي ايه انا خارجة تلاقيت بأسمهان داخلة قاتلي وين رايحة قتلها خارجة ندور مع صحابي . قاتلي صحابك السوفاج . قتلها مدخلكش فيا وفي صحابي اتلهاي بروحك برك .قاتلي خبارك عند ڨاع الحومة كل يوم طونوبيل تهز طونوبيل تحط راح تفضحينا بفعايلك بلا تبهديلا لي دارتهالك يمات عليلوا وتروح تقول بلي كليتي ولدها في صوارد من بعد مقبلتيش بيه . قتلها يهدرو على رواحهم انا راني ندير في مستقبلي هوما يقعدوا يحسبوا لجيجي لالاتهم وانتي اقعدي تبعيهم حتى تلقاي روحك رشيتي وشبتي كلاك شيب في هاد الحومة الزبلة . كملت مشيت وخليتها لقيت رؤيا تستنى فيا كملنا مشينا حتا. خرجنا من الحومة تعنا وحكمنا تكسي وصلنا للسونتر فيل بقينا ندورو حتى عيطتلي آسيا قاتلي بلي الشلة تاعنا رايحين يسهرو في صالون دو تي حل جديد .قتلها اوكي من بعد راني نجي كوبيت قاتلي رؤيا علاه راكي تخالطي في هادو الرطس راهم فور علينا هدوك جماعة المرفهين تروحيلهم لحمة يرموك عضمة .قتلها متخمميش انا كون ملقيتش مصلحتي عندهم راني مندورش بيهم وزيد راهم يقراو معايا وراني عارفة عقليتهم . قاتلي الله يسهل عليك انا راني قتلك وانتي دبري راسك . قتلها متنسايش شكون انا نديهم للبحر ونرجعهم عطشانين واحد فيهم ما يفوتها عليا ، ياك تروحي معايا .ضحكت قاتلي شي نهار خليتك وحدك باينة نروح معاك . روحنا دخلنا لقيناهم قاعدين ثلاثة بنات زوج دكورة أسيا ومينا ويسرى وخليل وعبدو . قعدنا معاهم طلبنا الجي وبقينا نتحاكاو نضحكو بصح غير طاحت الضلمة جابو الشيشة والدخان والدنيا بدات تتخلط قاتلي رؤيا جيجي هيا نروحوا برك راح الحال . بصح انا كانت عاجبتني القعدة ملڨري شفتها بدات تتخلط وبداو حتى يشربوا في الشراب قتلها نزيدو شوي ونروحوا . بقينا قاعدين والبنات لي معانا ناضوا يشطحوا ، حتى انا ورؤيا وقفنا نشطحوا معاهم كان غير الغنى تاع الملاهي والدنيا كاملة دخنة ومطفيين الضواو غير شوي تاع ضو احمر يعني كان جو تاع بار تاع الصح . كنت نشطح نورمال بصح كي درت على غفلة الطابلة وين كان عبدو مزال قاعد شفتوا هز الكاس لي كنت نشرب فيه بصح محطيتش مع الحكاية بزاف قلت بلاك راه غلط في الكيسان ورجعت نشطح حتى فضت الغناية رجعت قعدت مع كانت السخانة هزيت هداك الكاس تاع الجي وشربتوا على آخر قطرة وانا نشوف في عبدو يشوف معايا بنص عين توسوست منوا وشبيه يشوف معايا هكدا بصح قلت نورمال راه يخزر برك . غير فات شوي رجعوا لبنات قعدو بديت نحس في روحي مش نورمال حسيت روحي طايرة نضحك وحدي ، شافت معايا رؤيا قاتلي جيجي وشبيك تضحكي وحدك . قتلها خليني راني طايرة ناضوا كل يضحكوا عليا .وقفت نشطح ونشوف في الدنيا كاملة تدور بيا ورؤيا تقولي جيجي اقعدي يزي بلا فضايحك .قتلها أخطيني خليني نزها راني مغبونة . سمعت عبدو قالها خليها ووقف و بقا يشطح معايا ومرة على مرة يرمي يدو عليا بصح مقدرتش نمنعوا بديت نبكي وانا نتفكر في حياتي كاملة واكثر حاجة يمكن أثرت فيا هي بابا لي سمح فيا وهرب وخلاني وانا في كرش ماما ، علاش منيش كيف لبنات عندي بابا ويخاف عليا ويحميني ويوقف في كتافي وقت لي يحڨروني حسيت برؤيا جبدتني مبعدتني على عبدو قاتلي جيجي يزي وهيا نروحو قتلها اخطي جدي انتي حابة تروحي روحي انا مزلت قاعدة هنا . قاتلي يزي من العياط راكي فضحتينا شوفي كيفاه راهم يتفرجو هيا جيتي معايا ترجعي معايا . كملت نشطح بلا ما ندير البال مع هدرتها فاتت ساعة وانا مزلت على حالتي مرة نبكي مرة نضحك حتى قرب مني عبدو قالي جيجي هيا تروحي معايا .خزرت فيه وانا نضحك و قتلوا وين نروح معاك قالي لداري نديرو سهرية شابة نقلشك فيها من لي شفتك اول مرة وانا راشقتلي عليك . انا صح مكنتش صاحية بيان بصح هدرتوا ضربتلي في مخي وش قصدوا درك . قتلوا اسمع روح تلعب بعيد منيش بنت ليل حتى تقولي روحي معايا للدار . ضحك قالي مش بنت ليل بصح بنت حرام .طلعولي جنوني من الكلمة هادي هزيت يدي وخبطتوا بكف تسمع صوتوا للناس كل . قالي تضربيني ياكلبة يا بنت الحرام حكمني على شعري قالي ليوم موتك على يدي . قتلوا اطلق مني يا رخيس تفو عليك بزقت عليه في نص وجهوا . من وراها تخربطت ضربة فيه ضربة وضربة فيا ورؤيا تدافع عليا حابة تخرجني وهو حاكمني ما طلقني حتى خبطتوا بقرعة تاع زجاج تفتت على راسوا دم يجري من راسوا وهو داخ تحساب مات طاح ضربة وحدة . دخلوا سيكيرتي من وراهم دخلوا لابوليس والجدرمية وانا ماراني جايبة خبر لحتى حاجة درك وين فقت مع روحي وش درت .
