دخلت للشمبرة تاعي بدلت حوايجي لبست بيجامة وقعدت سمعت صوت المطر يا حالة فرحت وش نحب نرقد على صوت المطر وليت رقدت في سريري وتغطيت غفيت شوي حتى سمعت فيبرور تاع تلفوني فقت شفت لقيتها تسعة تاع ليل اي فاتني العشا .شفت نميرو لي قاعد يعيط لقيتوا اصيل عرفتها يكون يعيطلي على خاطر مهبطتش نتعشى .هزيت عليه سمعت صوتوا لي فيه بحة سبيسيال يمكن من الڨارو . قالي اهبطي راني نستنى فيك . قتلوا راك دايخ وبن نهبط . قالي هيا راني نستنى .قتلوا كيفاش نخرج لاجوا ميخلينيش قالي اهبطي هيا راني نستنى كوبا عليا . بقيت نشوف مع تلفون حايرة في خلق ربي . من بعد لبست الفاست تاعي فوق البيجامة مع بنتوفل وخرجت المطر خيط من السما وسكات البنات كل وحدة حاكمة شمبرتها من البرد . بقيت ندعي عليه غير انا لي خارجة في هاد المطر والبرد ما جيت نوصل للباب حتى تشمخت خاطر معنديش سيوانة . غير شافني لاجو جيت راح نهدر فتحلي الباب قالي روحي . محبيتش نستفسر بزاف خرجت لقيتوا في الطونوبيل تاعو مشعل الضو غير شافني خرجت فتحلي الباب تاع الطونوبيل رحت ديراكت ركبت . وغلقت الباب. قتلوا علاه عيطتلي . بقا ساكت يشوف معايا من مد يدو وهبطلي الكابيش تاع الفاست على شعري . قالي تشمختي . قتلوا بسبابك قولي علاه عيطتلي . ديمارا .قتلوا وين رايح وين دايني .قالي وين روحتي انتي ومسلم ليوم . قتلوا على هاد الهدرة مخرجني في هاد البرد .قالي اهدري وين روحتوا قتلوا خرجنا دورنا وتغدينا برك. قالي وانا وش وصيتك على مسلم مش قلت ميكونش بيناتكم اي تواصل . شفت معاه بخوف من بعد شفت مع الطريق الضلمة و المطر والبرد كون ينوضولوا جنونوا يقتلني ويطيشني وواحد ما يجيب خبري يا ربي كيفاش طاوعتوا وخرجت عندو . قتلوا وين دايني . شاف فيا وتبسم قالي خفتي وقيل ، علابالك هنا ندير فيك وش نحب وواحد ما يعلم . سكتت نشوف بخوف . قالي آخر مرة تتلاقاي مع مسلم ولا تخرجي معاه . درتلوا براسي ايه غير يرجعني برك . نشوف فيه باقي يدور يدور بلا حتى فايدة أصلا كلشي مغلوق و المطر واحد ما كاين برة مفهمش علاه خرجني كان قادر هاد الهدرة يقولها في التلفون . كي شاف سوبيرات مفتوحة حبس عندها . شاف معايا قالي نشري ونجي . قتلوا في قلبي روحة بلا رجعة. خرج يمشي ويزرب على المطر بقيت نثبث معاه لابس فاست كوير نوار مع سروال نوار والكوديوس في رجلوا كيما عادتوا هاد المرة غير زايد عليها الكسكات في راسوا . شوي وشفتوا خرج وجا فتح الباب وركب رمى روحوا حتى الطونوبيل تحركت غلق الباب رمالي صاشي في حجري . قتلوا وش هدا قالي علابالي متعشيتيش جبتلك تصبري بيها روحك . فتحتها لقيت فيها هدوك صقايط شيكولا وشيبس وحلوة وعفايس اخرين . قالي كولي راح تبقاي تتفرجي فيهم . بديت ناكل وهو باقي يدور بالطونوبيل بلا فايدة قتلوا وانا ناكل في المصاصة وين رايحين . قالي حتا بلاصة قتلوا ملا رجعني راح نرقد راني نعسانة غدوة نقرى . قالي ارقدي شكون لي حاكمك . قتلوا لا رجعني ديجا راني مشمخة . قالي تفوتي معايا الليل هنا انا منقدرش نرجع دوك ومدام جيت علاجالك لازم تبقاي معايا تونسيني . كملت ناكل قتلوا وعلاش جيت علجالي . شاف معايا وتبسم نص تبسيمة قالي جيت باه نشوفك . علابالي راه يتمسخر ويستهزا بيا قتلوا اممم علابالي من كثر ما راك تحبني جيت تشوفني . سكت وباقي يسوق قتلوا جيت غير باش تهددني باه مندورش ومنهدرش مع خوك خاطر خايف عليه من بنت لحرام تتمسخر بيه وتلعب بيه وتجرو معاها للحرام ولا تسرقلوا دراهموا كيف عملت مع لي قبلوا . شاف معايا ڨارن حواجبوا ضحكت قتلوا شفت علابالي كيفاش راك تخمم ،بصح متخافش مسلم مش من نوعي المفضل انا نحب . كنت راح نكمل نهدر ونستفزو من بعد خفت سكتت قتلوا خليني نسكت خير علابالي كون نكمل هدرتي ترميني من الطونوبيل نورمال . دورت وجهي نتفرج على مطر والظلمة ، حتى حسيت بيدو تحطت على يدي لي كانت في حجري . تخطفت من بلاصتي وشفت معاه . قالي وشبيها يدك هنا كان يشوف مع الجرح لي في يدي . قتلوا قست روحي بالمقص. قالي بصح هادي تبان تخبيشا بالضوافر ، شكون لي خبشك قولي . علابالي مجاش في بالوا بلي أنا لي خبشت روحي أصلا واحد ما يقدر يجي في مخوا حاجة كيما هادي . قتلوا راني قتلك قست روحي ، شكون زعما لي راح يجرحني ديجا انت وش يهمك . بقا يشوف معايا بشك بصح مهدرش . وصلنا لوحد لبلاصة كيما جبل و تحتها بحر ڨارا الطونوبيل مع الحافة . بقيت نشوف مع البلاصة قتلوا تصلح واحد يرمي روحوا منها . جبد قارو يتكيف فيه كانت حبست المطر شوي فتحت الباب قالي وين. قتلوا نتفرج على المنظر هيا باينة مش راح ترجعني خلي على الأقل نتمتع . قالي واحد ما قالك بلي راكي تهدري بزاف . شنفت وكملت خرجت قدمت شفت لتحت بعيدة بزاف والموجة تاع البحر تضرب عالية تخوف ، بصح بلاصة تسحر بقيت نقدم وانا مغمضة عينيا رجعت المطر تصب ، طلعت راسي الفوق نستقبل في المطر حتى حسيت بيدو جبدتني لور فتحت عينيا فيه قالي متقدميش اكثر لرض رطبة تزلقي . شفت لقيت روحي قربت اكثر من الحافة . قالي هيا اركبي على المطر . ركبت انا وياه قتلوا مترجعنيش . قالي لا واسكتي . وليت نحيت الفاست تاعي وهبطت الكوسالة ورقدت فيها . قتلوا اصيل نسقسيك . قالي اممم . قتلوا تعرف انا وش لقمتي . شاف معايا قالي #### حكمك زهيمر . قتلوا نهدر على لقمة بابا . قالي علاش تسقسي عليها . قتلوا حبيت نعرف برك . قالي معلاباليش . قتلوا علابالي بلي علابالك انت أصلا تشفا على كلشي خاطر كنت كبير وقت صرا لي صرا . مرجعليش وكمل يتكيف . شفت لبرا مع المطر قتلوا زعما مزال عايش ولا مات ،زعما ندم لي خلانا . قالي مندمش ومزال عايش لاباس عليه مع ولادوا . حسيت دموعي راح يخونوني ويهبطوا وليت غمضت عينيا ورقدت .
