فاتت عشرين يوم على موت ماما بدينا نتأقلمو ونتقبلو الواقع ونعيشوه بمرارتوا . باه نقول نسيت مستحيل ننسى بصح الحزن نقص بعد ما كان حزن ميتحملش يقولوا ربي بعد رابع يوم يهبط الصبر على عايلة الميت وهداكا لي صرا صح بعد ما فوتنا الرابع تاع ماما . كنت من شمبرتي منخرجش سيرتوا من كانت الدار معمرة بالعزاية أصلا منعرفهمش غير كي نشوفهم يزيد عليا الحال وليت حكمت شمبرتي حتى بداو. يتفرقو وفرغت الدار بقاو فيها غير ماليها ليوم قررت ننزل فديت من قعدة الشمبرة وحدي على الأقل نلقا حتى ريمة ولا مسلم نتونس معاهم بدلت حوايجي كنت لابسة بيجامة وليت لبست سيرفات في روز وحكمت شعري كوتشوفال ولبست بليغة وخرجت هبطت في الدرج وحدة وحدة كارهة حياتي القلقة تقتل وصلت للصالة ما لقيت حتى واحد كل واحد لاتي في شغالاتوا بصح سمعت هدرة في الكوزينة مع جيت باه ندخل سمعت مرت خالي المتوسط تهدر مع مرت خالي لكبير قالتلها وكي هيا ماتت ربي يرحمها حنا نحصلوا في بناتها . قالتها مرت خالي لكبير علاه حتا نحصلو فيهم ياك كبار يعرفو صلاحهم كلش يديروه وحدهم . رجعتلها قالتلها على هديك راني نهدر زوج صبايا جادورات يعيشوا معانا والله يدورو على الولاد وتصرا مشاكل كبيرة وقولي ماقلتش . قالتها وش من مشاكل مفهمتكش على واه راكي تهدري .قالتلها بوه عليك انتي هكدا تقعدي ديما بوهالية افهميني دوك كيفاش زوز صبايا كيما هوما يعيشوا وسط لولاد وحنا لا نعرفوا لا تربيهم لا تخمامهم وابداي خالي على ولادك لولين يلصقو فيهم من بعد نعاشيو حاصلين غير مسلم برك راكي شفتي من شاف جوليا وهو جوليا جوليا تقول جامي شاف طفلة تقعد معاه شهر يقولك اخطبيهالي وانتي ترضايها تزوجي ولدك لوحدة كيما هاديك مش معروف اصلها من فصلها والله اعلم كيفاش كانو عايشين ومنين كانو يجيبو في دراهم نزيدك بالزيادة والله غير اسمهان ما تعيا لاصقة في اصيل وقولي ما قلتش . قالتها مرت خالي وشبيك تقولي هكدا راكي غير تخلطي مسلم حاطهم خاوتوا سيرتو جوليا يعزها بزاف منين عادت صغيرة وحدها مسكينة . ضحكت قالتلها هديك صغيرة يا مرا هاديك سوسة كبيرة يقدرلها غير ربي راهي دور بولادك . قالتلها مسكينة من لي شفتها ما شفت عليها حتى حاجة تاع شر .قالتلها راح دير كيف امها كاش نهار تخرجلنا خرجة من لقصب حتى امها كانت تبان عاقلة وخاطيها حتى جاتنا مكرشة في الحرام ولا نسيتي كب البرمة على فمها تطلع طفلة لمها . دخلت عليهم.شافوا فيا وسكتوا . شفت مع مرت خالي لمتوسط قتلها علاه سكتي كملي اهدري وش كنتي تقولي يا شيبة النار مرا في قبرها ماعندهاش شهر من لي ماتت راكي تهدري علاها ، قاتلي ترباي لي متحشميش اعدلي هدرتك معايا راني كبيرة عليك . قتلها انتي لي ترباي كبيرة ولادك قريب قدك و مزلتي جايحة فتانة نمامة خايفة على ولادك المعوقين يقعدو غير هوما ومنشوفش فيهم ، غير متخافيش عليهم مني انا لي نشاور بصبعي يجيو وحدهم يركعو عند رجلي فهمتي . مرت خالي لكبير بقات غير تسكت فيا ولوخرا هاجت ناضت تعيط انا تسبني وحدا كيفك لا عندها لااصل لا فصل لا والي لا تالي الهدرة مش معاك الهدرة مع لي رباك . من بعد ضحكت قاتلي أصلا لي رباتك مش متربية جاباتك في الحرام. غير سمعتها وليت نشوف الظلمة في عينيا تلحت ليها ديراكت مرت خالي لكبير في نصنا ، انا حاكمتها من خمارها زعما مدينة دير لخمار في الدار حكمتها منو ونجبد مع الشعر وهيا تعيط ومرت خالي وحيد تعيط على البنات وعلى اسمهان مقدرتش تفكها مني انا مبقيتش لا نشوف فيها كبيرة لا والوا لصقت فيها وهيا ترغيي وتقول انا قد يماك تتلاحي فيا وتضربيني بعدوها عليا راح تقتلني راني مريضة بالسكر بعدوها . حتى جاو لبنات وفكوني منها وبنتها نجمة طارت فيا حابة تضربني زدت لصقت معاها المهم واحد مقدر يفرقنا هيا تضرب وانا نضرب شبعت فيها خبط مستحيل تقدرلي انا أصلا تربيت هكدا محسوب كنت كل يوم عركة مع البنات على الشعر حتى والفت وعاد واحد ما يغلبني .
حتى دخل مسلم جا يجري يفك بيناتنا بسيف ومرت خالي داخت خليتهم وطلعت لشمبرة تاعي نهار ما نزيدو هنا معاهم امبوسيبل نعيش مع عباد يكرهوني ويطيحو في ماما وهيا ميتة قبرها مزال منشفش . دخلت للدوش بكيت حتى شبعت من بعد خرجت جبدت فاليز تاعي ونهز في قشي ونحط دخلت عندي اسمهان جوليا وش درتي مهبولة انتي تضربي مرا كبيرة و تحكماها من شعرها راكي في عقلك انتي . قتلها لي راكي دافعي عليها هديك راهي سبت ماما وطيحت فيها فهمتي طييييحت في ماما كي مقتلتهاش عندها الزهر الشارفة شيبة النار . قاتلي ولكان هدرت تروحي تضربيها تضربي مرا كبيرة خلي تهدر على روحها ششش . قتلها نقتتتلها فهمتي لي يقول كلمة على ماما نقتلو ما يهمني لا كبير ولا صغيرة وانتي براكاي ما راكي مذلولة تسمعيهم يضحكو ويطيحو فينا في ماما وانتي ساكتة خسارة فيك كلمة اختي لكبيرة . قاتلي انا لي متشرفش بأخت كيفك مافيا مرة نلقاوك عند الرجال مرة تضربي في مرا كبيرة مرة تسكري ، أصلا وش راح يجي من وحدة بنت وسكتت فاقت مع روحها وش كانت راح تهدر قتلها كمليها قوليها بنت حرام كيفي مش انتي اول وحدة ولا آخر وحدة راح يقولها هيا اخرجي عليا من شمبرتي اخرجي. ولات خرجت وخبطت لباب وراها .
كملت دورت الخزانة نجبد في حوايجي سمعت الباب عاود تفتح عيطت قتلها اسمهان متفهميش قتلك اخرجي عليا . شفت لقيتو اصيل بنفس لبستو تاع ديما وكاسكات في راسو اللحية مطراسية سيرتو من عاد ابيض طبعتلوا الملامح تاع وجهو عينيه حادين والنيف واقف سيف ، واقف في الباب حتى سدو بطولوا وكتافو لعراض مربع يديه وعاض على شواربو تحتاني ويخزر معايا في وحد الخرزة تاع كون يحكمني يكففلي ديراكت . قالي وش درتي جوليا . عينيا دمعو وحدهم راني وحدي تاع الصح علابالي ضوك قادر يضربني نورمال شكون راح يدافع عليا وانا كتافي باردين لا ام ولا اب لا خو حتى اختي لكبيرة جات في صفهم غير باه تقعد عندهم وميدوروش عليها حتى هيا .عيط عليا قالي وش درتي . بكيت ديراكت نطقت بسيف قتلوا هيا لي سبتني وسبت ماما والله حتا ماماك شاهدة روح سقسيها . قدم عندي وخرت لورا عاود قدم قالي تضربي مرا كبيرة مرت خالك تهزي يدك عليها وتتلاحي لاها . جيت راح نهدر دخل مروان ديراكت راح يتلاح يضربني قالي فرخة كيفك تهز يدها على يما يا كلبة ليوم نديفرميلك وجهك ساقطة. حكمو اصيل على دراعو بيد وحدة قالوا ارجع من جيت . شاف معاه قالوا خليني نربيها بنت لحرام تمد يدها على يما قالوا كانك راجل مسها كانك راجل حط يدك علاها . قالوا اصيل خويا مدخلش روحك كلبة ملقطة كيما هادي تمد يدها على يما ونسكت . قالوا قتلك ادا راجل حط غير صبعك عليها . ولا بعد عليا قالي نتفاهمو عليها وخرج .
