غير خرج مروان حكمني اصيل من الشعر بصح مش بقوة قالي وش ندير فيك دوك انتي حصلتي في ## راسي غير انا وش ندير فيك ماتقدريش تبقاي نهار بلا مشاكل . قتلوا ما راك خويا ما راك بابا حتى نحصل في راسك، بعدني بعدني أصلا راني رايحة والله ما تزيدو تشوفوا وجهي هديك مرت خالي تسبني وتسب ماما وتزيد تجي انت تضربني . قالي ابنتي وقتاه ضربتك انا .قتلوا شوف كيفاه حاكمني من شعري وجعتني . ولا طلق شعري قالي ما عندك حتى خروج من الدار هنا تموتي فهمتي ونزيد نسمع درتي حاجة ما نتفاهمش معاك المرة هادي فاتت بصح المرة الجاية متفوتش حطيها مليح في راسك . قتلوا والله تسما نخليهم يحقروني ويسبوني ولا منيش مليحة لي يغلط فيا ولا في ماما يخلص ما يهمني حتى واحد . عض على شواربوا قالي انتي قاعدة تقوليلي ارواح اضربني ولا كيفاه. سكتت قالي راني وصيتك منبقاش نعاود في نفس الهدرة . درتلوا براسي ايه وسكتت . قالي من بعد ورا العشا تروحي كي الفحلة تطلبي السماح من مرت خالك فهمتي. جيت راح نهدر قالي وش هدرت ما نعاودش . جا خارج قتلوا أودي روح برك تعرف تتهدد غير عليا انا . شاف معايا مطلع حاجبو قالي وش قلتي سمعني . قتلوا واش ما قلت والوا وشبيك تشوف معايا هكا. قالي انتي لازملك السوط باه تتريقلي بصح معليش مزالوا ليام ونتلها بيك . وراح خرج وليت رجعت حوايجي لبلاصتهم في الخزانة وقعدت جبدت التلفون فتحت من لي جيت ما فتحتوش . مع تفتح جاو لي ميساج ورا بعض . دخلت لقيتهم كامل من عند فيفي تسقسي فيا وقتاه نرجع الاقامة . عيطتلها غير هزت عليا ناضت تبكي جوليا اجريلي راني رايحة نموت يا جوليا راني حصلت . قتلها وش صرى فيفي وش كاين . قاتلي راني اونسات جوليا. قتلها قولي والله . والله جوليا وكي رحت وقتلوا قالي ربي يسهل عليك شوفي في شكون تحصليه مش انا باباه وش ندير راني غير نخمم ما لقيت حتى حل والله خاوتي يقتلوني . قتلها بالعقل برك متقلقيش روحك كي نجي ونلقاو حل كيفاش هدا يقولك مش انا باباه . قاتلي منعرف راني حصلت حصلة تاع الكلاب وش داني لهاد الشئ يا ربي . قتلها بعد غدوة راني نجي ونروحوا عندو نهدرو معاه ادا مفهمش بالعقلية نشكيو بيه . قاتلي هبلتي انتي يقتلني راكي متعرفيهش كيفاه والله يقتلني. قتلها مش سايبة يتحمل المسؤلية تاع الشي لي دارو . قاتلي صاي كي تجي ونروحوا كيما قلتي .كوبيت معاها وبقيت في شمبرتي حتى للعشا هبطت وحدة وحدة في الدرج لقيتهم كامل قاعدين على الطابلة يستناو في العشا غير شافتني نجمة قاتلي هبطتي يا الكلبة جات عندي تجري راح تتلاح فيا حكمتها بنت خالي ، قتلها انتي هيا لي كلبة ناقصك غير تنبحي اخطي جدي خيرتلك لا نعطيك المخبط كيما الصباح . خبط خالي وحيد الطابلة قالنا وش هدا ما بقا لا حشمة لا قدر في هاد الدار هيا انتم لزوج احكمو بلايصكم . وليت رحت قعدت في بلاصتي وهيا غير تشوف فيا راح تترطق . قتلها في قلبي قودي دزي معاهم متقضيلي والوا . فات هداك العشا بسيف كي كملت قالي خالي وحيد الحقيني جوليا . لحقتوا للبيرو تاعو قعدت قالي وش صرا الصباح ، صح درتي وش حكاولي . قتلوا خالي هيا لي بدات سبتني وسبت ماما.قالي وتضربي مرا في مقام يماك. قتلوا متجيش même pas في ظفر ماما . قالي جوليا علابالي مزالك مجروحة من موت فطيمة ربي يرحمها بصح هاد شي لي صرا الصباح ميزيدش يتعاود منسحقش مشاكل مارانيش ناقصهم فهمتي راكي راح تعيشي هنا يعني لازم تتأقلمي . قتلوا منزيدش نكسرلك راسك بمشاكلي خالي أصلا لازم نرجع لقرايتي . قالي ما عندك حتى رجعة راح تكملي قرايتك هنا انتي دوك راكي امانة المرحومة في رقبتنا . قتلوا بصح خالي لازم نكمل عامي لهيك مكانش كيفاش ديجا بعد غدوة راح يبداو الامتحانات وانا منيش حابة نغيب اكثر ويروحلي عام في الباطل . قالي خلاص كي عاد هكدا تكملي عامك برك وترجعي هنا تفاهمنا قتلو ايه ، بصح لازم بعد غدوة نروح . على هدرتي دخل اصيل للبيرو لابس سيرفات مع بليغة غير شفتوا حاجة فيا تحركت من جيهتو كأي طفلة عجبني شكلوا قلت في قلبي كون جات عقليتوا مليحة . قالي وين تروحي بعد غدوة قالوا خالي راح تروح للاقامة راهي قاتلي بداو الامتحانات ولازم ترجع . شاف فيا قالي مكانش روحة . قتلوا نعم وش قلت عاودت وقيلا مسمعتش مليح علاه مكانش روحة راح تحكم فيا . نطق بالعياط قالي اسمعي ريقلي هدرتك متقلقنيش خيرتلك وراني قلت مكانش روحة الا مسمعتيش دوك نجي ندخلك الهدرة لمخك . شفت معا خالي قتلوا راك تسمع خالي شكون هو حتى يحكم فيا بابا ولا خويا انا بعد غدوة نروح وانت ماعندو ما دخلك فيا . قدملي وهز فيا يدو قالي علا من راكي تقولي ما عندو ما دخل حابتني نضربك لصقك مع الحيط . خبط خالي البيرو قالي جوليا اهدري بأدب واسمعي كلام اصيل مدام قالك مكانش روحة سي مكانش روحة . وقفت قتلوا كيفاش هادي خالي . قالي كيما سمعتي مدام راكي عايشة هنا معانا راح تسمعي كلامو . طلع القاز لراسي وليت خرجت وخبطت الباب ورايا . الهم هدا في كلش يدخل روحو طلعت في الدروج تصادفت مع مروان هابط .حكمني من يدي وخبطني مع الحيط قالي مزالكي وش درتي الصباح تخلصيها غالية ساقطة . قتلوا ساقط وحدك ما عندك ما تقضيلي توصلني بشعرة اصيل هو لي يتفاهم معاك . طلقني من يدي قالي معليش راكي طيحي في يدي . قتلوا روح برك ..طلعت وخليتوا زبل ناقصني غير هو . دخلت للشمبرة بدلت ودرت روتيني ورقدت ديراكت .
في الصباح نضت بكري هبطت ملقيت حتى واحد لي راقد راقد ولي راح يخدم راح . قلت ندخل للكوزينة نطيب حليب نشرب . مع دخلت لقيتوا واقف وكاس القهوة في يدو شفت وفيه وكملت دخلت بلا ما نهدر . قالي متعرفيش تقولي صباح الخير . شفت فيه صباح الخير . كملت فتحت الفريجيدار راح نجبد الحليب . قالي ملا قولتيلي امتحاناتك يبداو غدوة . قتلوا ايه . قدملي قالي وانا علابالي بلي ميبداوش غدوة ، علاه راكي تكدبي . سكتت قالي راني نسمع . قتلوا هكدا حابة نروح من هنا علابالي مش راح نتفاهم معاهم سيرتوا هديك مرت خالي ملا نروح ونقص الشر منيش باغية المشاكل وتكسار الراس. قالي امممم صدقتك ، صاي غدوة ونوصلك وجدي روحك. تبسمت معاه قتلوا مرسي . قالي هيا كملي طيبي حليبك . كملت نطيب وهو واقف يشرب في قهوتو قتلوا اصيل انت وش تخدم . قالي علاه تسقسي . قتلو نسقسي برك علابالي بلي تخدم كيما مسلم بوليسي بصح هو علاه يلبس لاتوني تاع لابوليس وانت لا. قالي انا سيفيل . دخلت يماه غير شافتنا واقفين مع بعض تبسمت حسيتها فرحت منعرف علاه . قتلها صباح الخير .قاتلي صباح النور وشراكي بنتي . قتلها لاباس الحمد الله . كمل قهوتوا قالها راني رايح يما ادا سحقيتي حاجة عيطيلي قاتلوا روح ولدي ربي يعينك عندك على روحك وعلى خوك . قالها صحا هيا نخليك. كي جا فايت عليا جبدني من شعري . قتلوا اطلق شعري وشبيك . قالي كيما وصيتك وجدي روحك باه غدوة نوصلك . قتلوا علابالي روح برك .
