قتلوا تحلم توشيني فهمت ولا تحط يدك عليا . بعد عليا قالي هكدا ملا شوفي واحد آخر يجيبلك صوالحك . قتلوا ياك عطيتك دراهمك واكثر ما كنت تحوس وش باغي اكثر . قالي افهمي انا باغيك انتي نحبك جوليا مقدرتش ننساك ولانتخطاك ادا ما راحش تكوني ملكي مستحيل تكوني لغيري وندريها نقتلك . قتلو وانا منحبكش وعمري ما راح نحبك ولا نكون ليك انت لي لازم تفهم المحبة عمرها ما تكون بسيف نستعرف انا ستغليتك وطلبت منك السماح الف مرة . حكمني على دراعيا في زوج قالي علاه متحبينيش وش ناقصي انا كون تقبلي تتزوجي بيا الدنيا نردهالك جنة نخدم نهار مع ليل نعيشك كيما تحبي انتي . قتلو المشكل مش فيك المشكل فيا انا ، انا روحي وما نحبهاش راح نحبك انت ؟؟؟ قالي راكي تتمسخري علابالي تحبي ولد خالك ، في واش راه خير مني قولي ياك انا شباب عليه و اصغر منو هو أكبر منك ادا على دراهمو انا نخدم ونجيبهم اكثر منو . قتلوا منحبوش شكون لي قالك بلي نحبو . قالي علابالي قتلي اختك . شفت معاه داهشة في اسمهان لي كل مرة تشوكيني اكثر من قبل قتلوا انا معاه على خاطر يصرف عليا ويمدلي الدراهم سينو منين راح نجيب انا باه نخلصك . قالي ميهمنيش فيك مانحوسش نفهم دوك قرري يا نجي نخطبك وتقبلي يا شوفي منين تجيبي الدوا بلا تصاورك لي راح نحطهم في لي ريزو صوسيو كل من غدوة تلقاي روحك مفيشيا بلي &&&& وتبيعي في روحك .وجا خارج حبستو قتلوا صاي كيما تحب صاي ارواح تخطب ونقبل بصح من هنا على شهر ولا شهرين نكون فهمت خالي وقنعتوا معلاباليش اسكو يقبلو ولا كيفاش المهم لازم وقت باه نقولو . قالي في يدك شهر لا فوقها لا تحتها وانتي دبري راسك . حطلي الصاشي وخرج . هو خرج وانا قعدت فوق البونكات نخمم لازم نحكي كلشي لأصيل قبل ما تطفر فيا هزيت التلفون عيطتلوا يصوني هو عليا قالي وش راهي الزينة تبسمت معاه فوق قلبي قتلوا لاباس قالي قاتلي يماا راكي في داركم لقديمة قتلوا ايه جيت باه نظفها من غبرة ، اصيل حبيت نهدر معاك في حاجة . قالي وش كاين جوليا كشما صرا ولا قلقوك في الدار . قتلوا لازمش هكدا حبيت نحكيلك حاجة برك تسمعني للخر كنت حابة نستنى حتى تجي ونقولك . قالي وش كاين راكي حيرتيني قولي جولي . مع جيت راح ننطق سمعت صاحبو جا قالي اغلقي لاكام دقيقة . غلقتها بقا يهدر مع صاحبو على خدمة شوي قالوا هيا اصيل راه شاف يعيط رانا راح نحكموهم قالوا دقيقة ونلحقك هو راح عاودت فتحت لاكام قالي وش كنتي راح تقوليلي قتلوا والوا معليش روح لخدمتك من بعد نعاودلك قالي راكي سير جوليا ياك مش حاجة ايرجو راكي حيرتيني نبقا نخمم قتلوا لا صاي من بعد ونحكيو تهنى قالي هيا بيبي ملا من بعد نعيطلك ونحكو مطوليش بزاف وارجعي للدار . تنهدت قتلوا معليش . كوبا عليا عيطت لوسيم جا روحني للدار طلعت ديراكت عند اسمهان صدمت عليها للشمبرة نلقاها قاعدة فوق الكوافاز تليسي في شعرها وحاطة البابليز حداها . قتلها يا رخيسة انتي اخت انتي علاه راكي ديري هكدا علاه فاش اديتك انا ،قولي . قاتلي وش ثاني علاه جاية صادمة عليا هكدا وزيد وش درتلك انا اي حاجة تجي تجري عندي تحصليها فيا قتلها معلابالكش زعما قولي علاه رحتي قلتي لي عليلو بلي راني نحب اصيل وانتي علابالك بيه راه يأدي فيا مايزيش وش درتي فيا قبل . قاتلي شوفي انا ما حكيتلوا والوا مدخلينيش في مشاكل كون من لول ما خربتيش فيه مش راح يأديك فعايلك لي وصلوك لهاد للحالة لي راكي فيها . قتلها صارم هكدا معليش انا مليت وعييت من كلشي دوك ، انا دوك نحكي كلشي لأصيل وخلي لي يصرا يصرا كامل نخلصو مش غير انا . كنت نهدر وتدور حاسة قلبي راح يطرطق عليا علاه ديما كاتبلي ربي العم والغم وقفت و ضحكت عليا قاتلي روحي اجري قوليلو خلي يرميك في اقرب سبيطار ،واصيل تاعك لي راكي مطلعة شانك بيه وفرحانة زعما يحبك روحي سقسيه وش راه مخبي عليك . دورت عندها قتلها كيفاش مخبي عليا ،وش مخبي ؟؟؟؟قاتلي روحي سقسيه ، انني في بالك راهم يحبوهم كامل لي هنا يكرهوك كون جاو يحبوك راهم مخباوش عليك حاجة كيما هادي . قتلها وش تقصدي وش راهم مخبيين عليا . قاتلي معلاباليش سقسيهم هما . جات عيني على كوفاز زربت هزيت البابليز كان سخون حكمتها على شعرها وقربتو من وجها قتلها تقولي كلش ولا والله نشوطلك وجهك. شافت في وجهي خايفة قاتلي هدي روحك جوليا بعدي عليا وشبيك مهبولة بعدي حبيتي تحرقيني. حركتها من شعرها قتلها قولي انطقي . قاتلي حاجة تخصص باباك. قتلها تخص بابا ؟؟؟ قاتلي ايه . قتلها قولي كلش قاتلي جا يحوس عليك وخالي واصيل سحتوه مالقري قاللهم بلي راه حاب يكتبك على اسمو . دمعتي طاحت ضحكت قتلها راكي تكدبي صح قولي بلي راكي تكدبي عليا غير باه تقلقيني . قاتلي والله ما راني نكدب جوليا لي في الدار كامل علابالهم غير انتي و مراهمش راح يقولولك . دهشت علابالكم وش درت من الخلعة تاع الخبر ، متتوقعوهاش حطيتها البابليز على خدها . مفقتش بروحي حتى حسيت بيها فرفرت في يدي كي دبيحة مقدرتش حتى تبعدني عليها بيسك كان علابالها بلي نخوف فيها مش راح نديرها صح . بقات ضبح على طول صوتها حرقتيني حرقتيني شوهتيني بعدت عليها نشوف ومنيش مصدقة عملت حرقة في خدها مش كبيرة بزاف بصح تنفخت وحمارت بقيت هكاك وهيا تبكي وتعيط دخلو كامل علينا .حتى هما حايرين ومش مصدقين وش درت في اختي قريب لا شوهتلها وجها .
