لبنات لي تقرى تصوت على النجمة طلعولي لقصة ❤️
فوتت شهر على هديك الحالة في ليل السهرة الصباح وفي نهار مرات نخرجوا انا وفيفي ندوروا ومرات نبقى راقدة في الاقامة لقراية نسيتها كيفاش دايرة اصيل من نهار لي كوبيت عليه مزادش عيطلي بصح علابالي خولة توصلوا في اخباري لي نقولهوملها انا ملقري قالي نجي نديك تفوتي الويكاند في الدار بصح مجاش باينة مش راح يجي مصاب تهنا مني. حتا نهار كنت متكسلة في الفراش وفيفي حدي كل وحدة تخمم في حاجة حتى سمعنا التلفون يصوني هزت فيفي قرات الاسم قاتلي صاحبك راه يعيط قتلها كوبي عليه معندي قلب للخرجة ليوم شوفي لمطر . قاتلي كون منك نروح معاه . قتلها وين نروح يا بنتي ليوم نافحتلي على الرقاد دوك شوي ونرجع نرقد لبارح سهرت بزاف . ولات خلاتوا يصوني حتى حبس وحدو شوي وعاود صونا قتلها كوبي عليه ولا لوحيه في روجوتي راه صرعلي راسي .ولات قاتلي لا هدا مش صاحبك هدا حبيبك .قتلها شكون قاتلي شوفي . رماتلي التلفون لقيتوا اصيل . علاه راه يعيط هدا ثاني ياك شهر ڨاع معيط ما سقسى دوك علاه راه يعيط لجدي.هزيت عليه قتلوا اهلا اصيل لباس . حبيت نرطب معاه كشما يخطيني . قالي اهبطي راني نستنا تحت. قتلوا جيت . قالي اممم راني نستنى فيك . قتلوا ليوم راني مريضة منيش قادرة نخرج في البرد هدا . قالي جوليا راني نستنى منعاودش الهدرة . تنهدت قتلوا صحا راني جاية . وليت نضت لبست قاتلي فيفي علاش جا عندك زعما يكون فاق بيك بيك بلي مراكيش تروحي تقراي . قتلها متزيدينيش انتي ثاني أصلا مورالي راه في الارض تزيدي تكملي عليا ديجا من راح يفيق هو مكانش شكون يقولوا خولة راني موصيتها . قاتلي المهم من بعد فليل نتلاقاو . خليتها وخرجت هبطت عندو لقيتوا واقف متكي على طونوبيل وڨارو في يدو ولا تفوت عليه يبقا يكيل فيها يكحل . قدمت عندو منعرف كيفاش حتى سلمت عليه زوج وكي جيت راح نبعد جبدني وكمل سلم عليا زوج . قالي لاباس . قتلوا لاباس ودار كل لباس . دارلي براسوا وسكت . من بعد قالي اركبي . ركبت وهو ركب ديمارا . قالي قولتيلي قبيل بلي راكي مريضة. قتلوا اممم مورالي هابط ومنيش قادرة . قالي علاش قتلوا منعرف هكدا وحدي . سكت وباقي يسوق حتى حبس عند حانوت . هبط شرى ورجع جا صاشي مليانة بالحلوة رمهالي في حجري وركب . فتحتها ناكل منها وساكتة وهو يسوق قتلوا وين رايحين . شفتوا بدا يخرج من الولاية قتلوا وين رايحين قالي رايحين للدار ماماك توحشاتك وحابة تشوفك . قتلوا حتى انا توحشتها. غير كملت كليت رقدت جبتها طريق كامل وانا راقدة ديجا كنت مديقوتيا وحابة غير نرقد كي نكون قلقانة نحب غير نرقد سيرتوا مع صوت المطر والدفا لي فطموبيل زاد نعسني كي وصلنا باه نوضت تعدبت في الطريق مسلاني تكسر من القعاد . هبطنا دخلنا للدار لقيتهم كل قاعدين في الصالة بعد كيما اول مرة نفس العباد بقيت نحوس غير على ماما مكانتش قاعدة معاهم وليت سلمت على خوالي ونساهم برك وعلى اسمهان كل يشوفوا معايا تقول جاية من كوكب وحدوخر مفهمتش انا لي موسوسة ولا هما لي بيهم حاجة انورمال . سقسيت على ماما قاتلي مرت خالي راهي راقدة في الشمبرة من بعد وشوفيها دوك راهي راقدة . قتلها معليش بصح بانتلي كشغل مخبيين عليا حاجة . وليت قعدت معاهم نحكي مع خالي حتى دخل مسلم غير شفتوا نضت روحت عندو نسلم عليه ونعاود وهو يضحك حسيتوا فرح صح كي شافني . قالي وقتاش جيتي قتلوا قبيل شوي وين وصلت علاه مجيتش عندي انت وجبتني خير من خوك .ضحك قالي يسمعك يقسمك على زوز .نطق واحد من ولاد خوالي يتمسخر قالي حتا التسلام بالمعريفة حنا مسلمتيش علينا وسلمتي على مسلم . ضحكنا قالوا مسلم جوليا متسلمش على الناس كل يخي هكا جيجي . درتلوا براسي ايه ولا حط يدو على كتفي وقعدنا بقينا نحكيو غير انا وياه راس براس لي يشوفنا هكا يقول معريفة سنين بيناتهم ، سبحان الله والله نحسوا خويا صح ونلقى معاه راحتي بالاك اكثر من اسمهان ملڨري معنديش بزاف من لي عرفتوا دخل لقلبي ودار بلاصة فيه . وهداك غير يشوف فينا بنص عين ويتخنزر سيرتوا من سلمت عليه . شوي و قتلو انا نروح ندوش ونبدل من بعد نجي قالي معليش روبوزي دورك باه من بعد في ليل نخرجوا ندورو كيفكيف .طلعت وخليتهم قاعدين دوشت وبدلت وخرجت باه نروح نشوف ماما ، وصلت للشمبرة تاعها نسمع في الهدرة بقيت نصنت قدام الباب بيسك سمعت صوت اصيل واسمهان وخالي وماما يهدروا بالتوتويت يعني بالعقل حبيت نفهم وش كاين . مفهمتش بزاف خاطر كانوا يهدرو بالعقل بصح سمعت غير اصيل قاعد يقول ماعندها حتا فايدة كي تسمع راني وصيتهم كامل واحد ما يقولها حتى انتي اسمهان عندك لا تهدري ولا حتى تلمحيلها . من بعد سمعت اسمهان تبكي قاتلوا منقدرش هادي حاجة متتخباش . وماما ثاني تبكي مفهمت والوا زعما على من يهدروا عليا ولا على شكون من بعد قلت وش دخلني أصلا انا ما راني عايشة معاهم ما ندخل روحي في مشاكلهم . وليت دقدقت ودخلت لقيت ماما متكسلة في سريرها وكل دايرين بيها تلحت علاها نعنق فيها ونبوس بسيف باه بعدت علاها.قتلها ماما توحشتك بزاف قاتلي حتى توحشتك يا عوينة تاعي . قتلها ماما ياك راكي مرتاحة ما خصك والوا قاتلي وش راح يخصني يا بنتي وانا بين خاوتي هدا وش كنت متمنية بصح توحشتك. قتلها حتى انا توحشتك بزاف . قاتلي عودي كل جمعة ارواحي عندي . قتلها معليش ما يكون غير خاطرك . شفت مع اسمهان قتلها وشبيك تبكي . رجعت تبكي بالصوت من بعد شافت مع اصيل كي شفت معاه لقيتوا مخنزر فيها كشغل قاعد يحذر فيها ولات قاتلي والوا توحشتك برك وجات تتحضن فيا وليت حتى انا حضنتها بصح تأكدت بلي راهم مخبيين حاجة ومصيري راح نعرفها وش هيا . نطق خالي قالها هيا بنتي يزي من البكا بكيتي معاك ماماك حبسي بنتي وش تفاهمنا . سكتت ومسحت دموعها وناضت خرجت ولحقها اصيل . شفت مع خالي قتلوا وش كاين خالي تنهد من قلبوا قالي والوا بنتي والوا أرواحي عندي . مشيت حتى لعندو وقعدت على ركابيا قداموا حط يدو على خدي وتبسملي من بعد شاف مع ماما قالها هادي لي راكي خايفة عليها تهناي عليها راهي تحت جناحوا ( مع الوقت باه فهمت شكون يقصد ) لهوا ميقيسهاش . وليت عنقتوا وخرجت نحوس على اسمهان لازم نفهم وش كاين علاه راهم يهدرو كل بالألغاز .
