ركبنا في الطونوبيل ديمارا هو يسوق ،انا دموع محبوش يحبسو من عيني هو مرة على مرة يشوف معايا وصلنا للدار على 9 طلعت ديراكت لشمبرتي رميت روحي فوق السرير نخمم في هدرتوا زعما يكون بابا صح ندم وقاعد يحوس عليا ولا متفكرني . سمعت الباب تفتح لقيتها اسمهان قاتلي جوليا وشبيك طلعتي ديراكت . قتلها والوا تعبانة برك راسي يوجع راح نرقد . بقات تشوف مع عينيا قاتلي متقوليليش كنتي تبكي ، وش صرى كشما صرى معاكم في الطريق . قتلها والوا اسمهان متبقايش تسقسي . قاتلي صحا جيت باه نسقسيك ، قولتي لأصيل وش وصيتك الصباح. شعلت فيها قتلها ياك قتلك الصباح منقولشششش متفهميش انتي ياك هو تعرفيه روحي قوليلو وحدك علاه جاية عندي انا علاه. تخلعت فيا قاتلي علاه راكي تعيطي . قتلها اخرجي عليا برا عليا منيش نقصاتك . وقفت وقاتلي انا لي غالطة لي جاية نهدر معاك انتي راكي مكيش نورمال ليوم نخرج خير . خرجت وخبطت الباب وراها رقدت ودمعتي على خدي . فطنت على يد تنوض فيا فتحت عينيا مخلوعة لقيتها مرت خالي قاتلي جوليا بنتي لباس كشما يوجع فيك ولا راكي مريضة كنت فايتة على شمبرتك سمعت صوتك دخلت لقيتك تبكي وانتي راقدة . شفت مع التاقة لقيتها مزالت الضلمة . درتلها براسي لا منيش مريضة وقيلا كنت نحلم برك ،بقيت نمسح في الدموع . قعدت بجنبي وحطت يدها على راسي جبدتني حظنتي على صدرها قاتلي وشبيك بنتي ليوم مراكيش مليحة كامل وراكي مهمومة كشما واحد قلقك ولا عندك كاش مشكلة ، كشما دارلك اصيل في الطريق ولا عيط عليك . قتلها لا. قاتلي ملا علاه راكي هكدا وراكي تبكي قوليلي حطيني في مقام ماماك واحكيلي فرغي قلبك . درناها بكتفي معلاباليش . وقفت قتلها رايحة . شافت معايا قاتلي تحبي نرقد معاك ليوم . درتلها براسي ايه . قاتلي خلاص نروح نقول بخالك برك ونجي نرقد بنتي ياك . درتلها براسي ايه . هيا خرجت وانا وقفت باه نروح للطوالات جيت راح نخرج نسمع في اصيل خرج من الشمبرة تاعو يسقسي في يماه وش كاين يما سمعتك تهدري هاد الوقت تحيرت كشما واحد مريض . قاتلوا ما كاين والوا ولدي متقلقش ، غير كنت جوليا. قالي راني نايضة لهاد الوقت وشبيها . قاتلوا لا جيت فايتة على شمبرة تاعها باه نهبط للكوزينة نجيب لما لباباك يخي سمعت صوت تحيرت دخلت نشوفها لقيتها تبكي بالدموع وهيا راقدة مسكينة حتى نوضتها باه فاقت . قالها وشبيها مريضة نديها للسبيطار وش يوجع فيها . قاتلوا لا مش مريضة يمكن كانت تحلم والله اعلم المهم الطفلة من لي جات معاك وهيا حوالها معجبونيش كشما صرى معاها لبرة ليوم محكاتلكش . قالها لا والوا . قاتلوا ملا وشبيها من لي دخلت لشمبرة تاعها مخرجتش عينيها رايحين يطرشقوا من لبكا ، باين كاين حاجة ولا انت كشما درتلها . قالها يما وش راح نديرلها انا . قاتلوا منعرف بصح مسكينة راهي غايضتني ، المهم انا نروح نشوف باباك ونرجعلها قاتلي ارواحي باتي معايا . قالها صحا يما بصح نوصيك يما كشما سقساتك على باباها ولا على اسمو ولا على أي حاجة عليه ردي بالك تقوليلها كلمة راني وصيتك يما . قاتلوا متهني ولدي مش حتى توصيني . قالها المهم وادا شفتيها مسكتتش ولا قوليلي . قاتلوا ايه متخافش دوك نبن عليها شوي ترقد بالاك لا راهي متوحشة يماها المهم انت ارجع ارقد تصبح خدام . قالها تصبحي بخير ودخل لشمبرة تاعو .
