بارت 30
كملت غسلت وخرجت بدلت قشي وهزبت ساكي وخرجت كانت 6 تاع الصباح واحد ماكاين كامل راقدين بقيت نستنى في تكسي ملقيتش وليت مشيت حتى وصلت للمقبرة لحت خيمار على راسي ودخلت غير وصلت لقبر ماما طحت فوقوا بكيت كأنو لبارح من لي ماتت وكل ما نتفكر كلامو تاع لبارح نلقى روحي زدت في بكايا كيفاش راح ننسى اهانتو ليا مستحيل ننسا قدامهم كامل قالي متربية تربية الكلاب . بعد ما فرغت قلبي مسحت دموعي وقريت علاها الفاتحة وخرجت كانت وصلت الثمنية ونص الدنيا عمرت بالناس ، صونا التلفون لقيتها اسمهان . هزيت علاها قاتلي جوليا وين روحتي على الصباح دخلت للشمبرة تاعك ملقيتكش قتلها روحت للمقبرة رحمت على ماما وراني راجعة للاقامة . سمعت اصيل قالها قولها ترجع للدار خير من نجي نجيبها من شعرها .
