بارت 39
شكون لي قالوا باغية نشوف حبيبتو هدا يعني علاه يدير هكدا وش داني نهدرلوا عليها لبارح حتى ليوم يجيبني ليها وصلنا ، حبس قالي صاي رانا وصلنا شافني شغل مستريسيا وانا معلاباليش بروحي علاه تقلقت من قالي نعرفك بحبيبتي. قالي شبيك ادا مكنتيش حابة تتلاقايها نورمال قوليلي نرجعك . تبسمت قتلوا لا علاه مدابيا نشوف مرتك المستقبلية قالي مليح هيا مالا نهبطو . هبطنا دخلنا للكافي لي نورمالمو تكون قاعدة تستنى فينا فيها . مشا حتا وصل لطابلة قاعدة فيها طفلة شفت غير ظهرها وشعرها أكحل توت واملس اكثر من حياتي كي شافاتوا وقفت سلمت عليه من بعد قالها هاهي جوليا .قدمت شفتها تهبل في زين سمرة الزين يقطر منها كلشي في بلاصتو تقول رسمة انا طفلة وعجبتني تبان في ثلاثينات وباينة من لبستها بلي كلاس لابسة شغل كوستيم بلازار بالسروال في نوار وطالون ، توشيت معاها لامان تبسمت معايا قاتلي متشرفين جوليا قتلها يعيشك . قعدنا في ثلاثة انا حشمت بيناتهم هما كوبل وانا قاعدة في نصهم حكمتني البكية عييت نفسر سسبابها وش هو ، سمعتها تهدر معاه طلعت راسي نشوف معاها منقدرش ننكر بلي غرت منها تبان واثقة في روحها حاطة رجل على رجل وتلعب بشعرها وتهكر وتضحك وهو مشاركها الهدرة منساجمين . شافت معايا تبسمتلي قاتلي تقراي جوليا قتلها ايه نقرى عامي لول . قاتلي مليح ربي ينجحك . قتلها مرسي . جا سيرفور قالي اصيل وش تشربي جوليا . قتلوا والوا . قالي كيفاش والوا تلفت لسارفور قالوا جيبلنا زوج قهوة ووحدة حليب وكيك فراز .
