في الصباح نضت ناشطة نافحتلي و المورال طالع بلا ما نعرف السبة فتحت التاقة لقيت شمس ضاربة جو تاع ربيع ، جبدت وش راح نلبس ودخلت دوشت ورجعت لبست سروال دجين كاري وبيل غوج وباسكات أديداس بيضة ، درت شوي مكياج غير لينار وغوجلافر غوز قلوس . شعري خليتوا كورلي كيما راه وحكمتو كوتشوفال هزيت سكادوتي وهبطت لتحت لقيت خالي ومرت خالي قاعدين صبحت عليهم وسقسيت على واصيل باه يوصلني قاتلي وقيلا مزال راقد روحي شوفيه ، عاودت طلعت لشمبرتوا دخلت ديراكت لقيتوا مزال راقد على كرشوا معنق المخدة وبلا تريكو مشيت حتى وصلت بحدا راسي بقيت غير نشوف معاه غايسة فيه ، لقيت روحي نتغزل فيه كلشي فيه يهبل حتى ميبانش بلي راه وصل لفوق 35 ، شفت مع صدرو ودراعيه يهبلوا من بعد فقت مع روحي وش راني نقول انا. وليت مديت يدي نحرك فيه اصيل نوض فتح عينيه وهو يتكسل من بعد شاف معايا فاتح غير عينيه غير نص قالي وش راكب ديري انتي فوق راسي . قتلوا نوض نسيت بلي ليوم راح توصلني الجامعة راهي ديجا السبعة ونص. قالي ومتعرفيش طبطبي الباب دوك نوض زادمتلي للشمبرة. قتلوا وش فيها ماماك هيا لي قاتلي روحي نوضيه . تقعد ووقف لابس غير شورت بصح مش قصير بزاف قالي روحي دوك نجي وليت خرجت وانا غير نتفكر في الكور والزين يا ربي صاي وقيلا طحت فيه لوف تاع الصح .
