بارت 44
كي جا ركب وديمارا شاف معايا قالي عجباتك ريان . قالوا امممم تبان شابة وعقليتها مليحة . تبسم قالي وش قولك تطلع عليا ولا لا . قتلوا نقولك الصح ولا نكدب عليك . ضحك قالي باينة قولي الصح قتلوا هيا مش ستيل تاعك . عاد يضحك بالصوت قالي تسما نحبس معاها مدام معجباتكش . قتلوا مش معجبتنيش بصح مش ستيل تاعك . قالي ملا وش هو ستيل تاعي . كنت راح نقولوا كيما انا هكا من بعد ستخزيت روحي وش وصلني نهدر معاه هاد الهدرة علاه قتلوا متطلعش عليك ملڨري هيا في كلش توالموا علاه حبيت نسمطهالوا . قتلوا معلاباليش دبر راسك ديجا علاه تشاور فيا .
سكت وبقا يتبسم وحدو مهبول وقيل وانا غمضت عينيا راسي وجعني باين من الشمس . قالي رقدتي . قتلوا لا راني نايضة راسي وجعني برك . جبد من الكوفر الطونوبيل حبة دوا تاع راسي قالي هاكي اشربي دوا ما بين ما وصلنا للدار . حكمتها عليه شربتها.بقينا ساكتين حتا وصلنا للدار هبطنا دخلنا لقيت لبنات متجملين في الصالة وصوت دحكم واصل حتى الباب تاع برة كي شافتني ريمة قاتلي جوليا ارواحي اقعدي معانا رانا مقصرين محبيتش نقولها لا وليت مشيت قعدت معاهم حتا اسمهان قاعدة معاهم بقاو لي تهدر عليها راجلها ولي تهدر على مشاكلها مع راجلها ولا مع خطيبها حتى نطقت نجمة قاتلي وانتي جوليا معندكش حنون . نطقت اسمهان في بلاصتي تضحك قالتلها جوليا تالمو عندها بزاف نسات اسميهم . معجبتنيش هدرة اسمهان انا منيش حابتهم يدخصو ويدخلوا رواحهم في حياتي . قتلها لا معنديش . نطقت نجمة قاتلي علابالي عينك في شكون انتي . طلعتلها حاجبي قتلها والله وين علابالك انتي عيني في شكون قولي ترا نسمع .حطت رجل على رجل قاتلي باينة عينك في مسلم ولا لا لبنات . قتلها و الله شوف اسيدي انا عيني في مسلم والله درك وين سمعت من عندك ههههه. قاتلي كون ماجيتي عينك فيه كون ما تدخلي عندو للشمبرة في نص ليل بحال حنا تربينا مع بعض كي خوت وجامي لا انا ولا وحدة من البنات ندخلوا لشمبرتوا في ليل .
علابالي من هدرتها فهمتها بلي راهي تبروفوكي فيا باه نوض انا نسبها ولا نضربها ونلسقو في بعض بصح مع من طاحت انا بروحي تربيت وكبرت ناس تهدر فيا راح تقلقني هدرتها هادي . قتلها ومن بعد الا عيني فيه انتي وش قلقك اختو ولا يماه . قاتلي لا بصح مش اسوبوان تاع تروحي لشمبرة تاعو وزيد حتى اصيل شافكم عيب علابالك حنا متربيناش هكا . قتلها انا تربيت هكا عندك مشكلة . سكتت تعوج في شواربها وقفت قتلهم انا نطلع لشمبرة تاعي خير قعدة معاكم معجبتنيش .و جيت ماشية طلعت لشمبرة تاعي لقيت اسمهان لحقتني قاتلي طولتوا برة انتي واصيل وين رحتوا . قتلها من بعد وونحكيلك اسمهان راسي راه واجعني راح نرقد . قعدت فوق السرير قاتلي احكيلي دوك بالخف من بعد ارقدي على روحك . قتلها رحت معاه باه يلاقيني بحبيبتو . حطت يدها على فمها قاتلي قولي والله عندو حبيبتو قتلها والله علاه وش يخصوا باه ما يديرش حبيبة . سكتت قتلها شبيك سكتي قاتلي والوا انا نروح وانتي كملي ارقدي على روحك . خرجت بصح حسيتها معجبهاش الحال كي قلتلها بلي عندو حبيبتو زعما حتى هيا يكون يعجبها اصيل.
