بارت 41 ،
عوضك بماماك لي كافحت علجالك وكبراتك حتى وليتي مرا وكي ماتت ماماك ربي يرحمها ربي عوضك بخوال وولاد خوال واقفين معاك وقت ما تحتاجيهم تلقايهم ولا لا .سكتت قاتلي كون تصرالك مشكلة دوك شكون اول واحد تعيطيلوا وتستنجدي بيه . قتلها مسلم ولا اصيل . قاتلي وكي مكانش هما لشكون تعيطي قتلها لخالي . قاتلي شفتي يعني انتي مكيش وحدك عندك شكون لي واقف في ظهرك وباباك ميستاهلكش ميستاهلش بنت كيفك ، كيما راح هو وكمل حياتوا عادي حتى انتي انسايه . مسحت دموعي تبسمت معاها وقتلها عندك الحق يعطيك الصحة . حكمتلي يدي فوق. الطابلة وقاتلي في اي وقت تحتاجيني تلقايني معاك بلا مزيتي . كي زيرتلي على يدي وهيا حاكمتها وجعتني. قتلها يدك وجعتني . قاتلي ااا سمحيلي والله ما فقت مع روحي بلي ضغت عليك بقوة . قتلها لا انا لي يدي مجروحة على هديك وجعتني . شافت مع يدي قاتلي راهي مجروحة بزاف كيفاه حتى تجرحتي هكا . قتلها والوا غير قستها في الباب . ضحكت قاتلي كون جيت انا نروح علجالها للترك وندير عملية تجميل غير باه ميبقاليش السيكاتريس ، انا جسمي عزيز عليا بزاف غير نتخدش برك تلقايني نروح عليها للطبيب . ضحكت قاتلي والله نهدر صح ربي كرمنا بجسم امانة باه نستحفظو بيه وكل خدشة فيه بقصد حرام علينا ونتحاسبوا عليها . تفكرت هدرة اصيل كي قالي حرام . وليت قتلها ولي بغير قصد حرام ثاني . قاتلي لا مش حرام بصح لازم الانسان يتجنب اي حاجة تأديه سوا نفسيا سوا جسديا . بقيت غير نتبع في كلامها منبهرة بيها حسيتها حللتلي شخصيتي ودخلت لمخي ودارتلوا غسيل مخ اول مرة نتأثر بكلام انسان كيما هكا ونفتحلوا قلبي نسيت أصلا شكون هيا ولاب حبيبة اصيل ، تمنيت القعدة متخلاصش معاها ونحكيلها قاع همومي ومشاكلي ، عندو الحق اصيل كي يحبها ويديرها حبيبتو كاملة مكملة من كلشي . فيقتني من سرحتي كي قاتلي علابالي بروحي نحكي بزاف باينة قلقتك معايا . قتلها لا بالعكس تمنيت الوقت ميخلاصش معاك هدرتك عجبتني بزاف . قاتلي حتى ادا خلاص الوقت ليوم نتلاقاو في يوم وحدوخر راني ديما قاعدة في اي وقت عيطيلي ونتلاقاو . قتلها مرسي بزاف قاتلي بلا مزية حببتي ، هيا نروحوا ندورو شوي ما بين ما عيط اصيل .
