قالي ارواحي اقعدي . جيت بجنبو وقعدت حط يدو على شعري يلعب بيه قالي راح نروح لعشية . شفت في عينيه قتلوا وين تروح قالي لخدمة لازم نرجع. هبطت راسي قتلوا ربي يعينك . قالي ان شاء الله بصح عقلي يبقا هنا منيش حاب نروح ونخليك مي الله غالب ، المرة الجاية نديك معايا . ضحكت كيفاش تديني معاك . قالي وي نديك معايا على خاطر خدمتي راح ترجع قاع لهيك . بقيت حايرة قتلوا راك تحكي بصحك كيفاش نعيشو ووين نقعد انا مفهمتش ، ديجا منظنش خالي راح يقبل تديني معاك . قالي متخمميش كي نرجع ندير حل يرضينا كامل ، المهم انتي تهلاي في روحك وادا شفتي روحك مريضة ولا راكي مقلقة نميرو تاع ريان راه عندك عيطيلها تجيك ديجا راني موصيها كل ثلاث ايام تجي عندك ، الخرجة ممنوع وحدك جوليا ودواك كيما وصيتك راهي كاتبتلك في لي لبواط كيفاش تشربيه . هزتلو براسي ايه قالي لعقالة تاعك هادي مراهيش مطمنتني مي معليش في ليل نخرجو تقدري ولا تعبانة . فرحت قتلوا نقدر منيش تعابة راني لباس عليا بصح تديني لهديك لبلاصة نحبها . قالي ما يكون غير خاطرك . هو خرج وانا جبدت هديك الصاشي نشوف معاها فيها شي عشرين حبة تاع دوا . هزيتها خبيتها في خزانة تحت حوايجي مستحيل نشرب منها ، لكان شربت منهم معنتها سلمتلو رقبتي بساهل نعرف روحي نموت . وصل الوقت باه نروح مع اصيل وجدت روحي لبست شفت مع وجهي مندوب كامل مجروح مقدرت ندير والوا فيه درت غوجلافر وغسيل. هبطت دخلت للصالة كانو يهدرو سكتو مهتميتش بزاف بيسك هاد اللقطة ديما يديروها . كي شافني وقف قالي راكي واجدة قتلوا ايه قال لخالي بابا رانا رايحين قالوا مطولوش بزاف ولدي . شفت ريمة قاعدة قتلها تروحي معانا . تبسمت وشافت مع اصيل قاتلي لا روحو برك نعسانة منيش قادرة نخرج . خرجنا من الدار ركبنا دمارينا طريق طويلة محسيتش بيها حطينا لغنا ورانا نحكيو ملخر القعدة معاه متتملش هو ميهدرش بزاف مي تحسيه يفهم في كلش يجبدك بالهدرة . وصلنا للبلاصة مع وقت ربيع كانت روعة ريحة الشجر والورد الاكليل تهبل هبطت انا لولة قدمت وقفت في الحافة وغمضت عينيا ريحة البحر ومع ريحة لحشيش تشرح النفس. حسيت بيه واقف ورايا قالي وش راكي حاسة . قتلوا راحة ياريت نبقى هكدا حياتي كاملة . دور يدو على كرشي معنقني . منعرف شحال بقينا وحنا واقفين ، مخي سافر بعيد . رجعلي غير كي حسيت ببوسة تحطت على رقبتي . لحمي تشوك فتحت عينيا قالي متعبتيش ارواحي اقعدي . دورت ليه نشوف معاه علاقتي انا وياه مقدرتش نسميها سامح وعاطي حق لروحو يتمادى يبوسني يعنقني مهتم بادق تفاصيل حياتي ، نشوف نظرات الاعجاب في عينيه ، مزال حاجة وحدة برك . قدمت عنقتو قتلوا مرسي بزاف لي راك في حياتي اصيل ، انت عبيت لبلاصة لي كانت فارغة في حياتي نحبك . جبدني عليه يشوف مع وجهي من بعد باسني وعاود عنقني تمنيت حتى هو يقولي نحبك بصح معليش المهم ديما نلقاه في كتافي وقريب مني هديك هيا الفايدة .. قالي ارواحي نتعشاو وخلي من بعد ونحكيو مليح . راح للطنوبيل جبد كرسي حطهولي قعدت وهو جبد الشواية و الحوايج بدا يوجد في العشاء يشوي كان موجد كلش للخرجة . فاتت سهرة هايلة كالم والهوا نقي . اصيل انسان تقدر تعشق فيه اي طفلة قعدتو متتملش هو صح ميهدرش بزاف بصح تحسيه يعرف في كلشي مام كي نكون نهدر يسمعني يخليك تفرغي قلبك ليه قصرنا ضحكت من قلبي معاه كي بقا يحكي لي في صغرو واش كان يدير . بصح ياك ديما انا فرحتي وضحكتي ما دومش
