قتلوا تعرفهم خاطر يماك دير كيفهم . خنقني على قوة جهدو النفس مبقاش يفوت. قالي بنت حرام كيفك تجبد يما على لسانها الخامج .خبطني بكف حسيت وذني صونات تقول عليا ضربتني لاطونسيو اول مرة ناكل كف بهاد القوة غمضت عينيا للحظة راح ندوخ . قالي اخر مرة نلقاك جبدتي يما على لسانك لموسخ كيفك . طلقني من رقبتي قالي نوضي بدلي لخماج لي راكي لبساتوا نديك للسبيطار . غير طلقني دخلت نبدل في حوايجي وانا نبكي علاه الناس كل كارهتنا وش ذنبنا حنا ادا ماما غلطت بكري علاه لازم انا نخلص . كملت ، شفت في لمراية لقيت رقبتي مطراسيا بصوابعوا هماجي مهبول خنقني قريب يقتلني زيد شفت وجهي لقيت صباع مطراسين فوق خدي .سمعتو طبطب على الباب قالي راح تباتي لداخل . خرجت شاف مع لبستي قالي هيا .
خرجنا ركبنا في الطونوبيل وصلنا للسبيطار لقينا مسلم واقف قدام الباب يتكيف هبطنا شافنا جا عندنا تبسملي قالي متخافيش مبقاش بزاف وتخلاص العملية .قتلوا صح قالي هيا ادخلي اختك من قبيل وهي تسقسي فيا عليك .دخلت نمشي وهداك ورانا يشوف معانا بطريقة تاع واحد راح يتلاح عليا مفهمتش هدا الكره لي يكرهني علاش . وصلت وين البلوك تاع العمليات لقيت اسمهان قاعدة تستنى غير شافتني جات عندي عنقتني قاتلي وين كنتي علاه طولتي هكدا ومرديتيش عليا .قتلها كنت في دار رقدت كنت تعبانة. قاتلي وحلالك النوم ويماك هنا وانا وحدي هنا .قتلها اسمهان أخطيني منيش قادرة للهدرة السامطة . قاتلي شكون هدو مين تعرفي ناس كيما هادو انتي قولي صح . قولتها منعرفهم ما يعرفوني هداك ياك شفتيه لي عاوني هديك المرة و تاع الجمعية هي لي حكاتلهم علينا وجاو عاونونا . ضحكت وهي تشوف مع اصيل قاتلي بصح هداك شحال زل يقتل ملقري كبير بصح يهبل . قولتلها اسمهان وقتها هاد الهدرة وزيد لي كيما هادوا موحال يشوفوا معانا حنا نبانولهم حشرات منسواو والوا يعفسوا علينا ومايسقسوش .قاتلي بصح شوفي بحال فيهم شبه منك انتي وياهم عندكم نفس العينين ونفس النيف . قتلها خلق ربي من شبه ربعين .غمزتني قاتلي انا نروح نقلب رزقي . مشات عندهم مدت يدها صافحت على اصيل قاتلوا انا اخت جوليا . شاف معايا قالها متشرفين . هيا يقولها متشرفين وانا يقولي بنت حرام منتشرفش بوحدا كيفك رخيس . حكمتني غصة في قلبي قعدت في الكرسي وخليتها تهدر معاهم شوي وجات قعدت بجنبي بقينا ساكتين ، جا عندي مسلم قالنا ادا حبيتو تاكلوا حاجة ولا جبعانين قولولي نجيبلكم .قتلوا لا مرسي .قالي بلا مزية ، بقا يثبت مع وجهي قالي ارواحي دقيقة معايا . وقفت مشيت معاه شوي بعدنا على اسمهان حكملي وجهي قالي اصيل لي دارلك هكدا في وجهك. قتلوا ايه هو قالي ضربك درتلوا براسي ايه . شفتوا تقلق عرفتوا بلي هو ورقتي الرابحة .بكيت قالي متبكيش راه غير متقلق من الشي لي درتيه ليوم . درتلوا براسي لا قتلوا هو يكرهنا وقالي بلي راح يخلينا نروحو نسكنوا في ولاية خلاف و سكتت .ورجعت نبكي بالشهقة قالي كملي وش قالك .قتلوا قالي بلي منزيدش نحكي معاك وادا شافني نهدر معاك يقتلني ، بصح انا منيش حابة هكدا ماصدقت لقيت واحد نديرو في مقام خويا ونتكل عليه في حياتي طول حياتي نحلم يكون عندي خويا يدافع عليا ويحميني ويوقف في كتافي ،شحال من ناس حڨروني غير كي لقاوني بلا اخ وبلا اب . حكمني على كتافي وشاف معايا قالي مدامني حي من ليوم ديريني انا خوك وكلش في حياتك من ليوم انتي اختي وراح نوقف معاك موحال نسمح فيكم ، وهدرة اصيل انسايها انا نفريها ، هيا روحي دوك ارجعي اقعدي .غير دورت مسحت دموعي وانا نضحك من ليوم راح تكون جوليا جديدة جوليا من طبقة البورجوازية .وصلت لاسمهان قعدت معاها وانا نتبسم قاتلي غير الخير في فمك هدرة قولي .قتلها وجدي روحك من ليوم حياتنا راح تتبدل وراح نولوا من الناس الهاي كلاس من اليوم منحتاجوا لحتى واحد ويدنا مبقات تتمد لحتى واحد .قاتلوا كيفاش راح يصرا هاد الشي في الحلم وماتصراش .قتلها متحوسيش تفهمي كيفاه المهم راح يصرا هاد الشي ومع الوقت تتأكدي من هدرتي .
دورت وجهي شفت اصيل ومسلم خرجوا برة وهم يهدروا . وقفت لحقتهم وبقيت قريبة باه نسمع وش يقولوا .سمعت اصيل قالوا ديجا جات تشكيلك وانت جاي تحل في فمك كون تعرف وش كانت مدايرة انت لي تبعتها من هنا . مسلم قالوا كيفاش تقولها تروحوا من هنا وين راح يروحوا هوما وليات وحدهم شكون بيهم وكيفاش يعيشوا انت تعرف الشارع وش فيه وش يصرا فيه . قالوا مسلم متناقشنيش انا صاي قررت غير تخرج يماهم نبعثهم . قالوا غير هاد الشي لي ميصراش وشبيك اصيل كيفاش تقدر دير حاجة كيما هادي مهما داروا ومهما نكرناهم بصح يبقاو بنات عمتنا ووحدة فيهم هازة لقب تاعنا ترضا انت كاش نهار تسمع بلي واحد من ولاد الكلاب داروا فيهم كاش فارطة . قالوا هيا لي بنت الكلب كون تقعد هنا اسمنا تمرغوا في الارض ياك ليوم شفتها بعينيك وين لقيناها ومن وين جبناها . قالوا ربي يسهل مع الوقت تتربى وترجع كيما خواتك لينا وصوفيا ياسيدي ديرها وحدة منهم .قالوا متقارنش خاوتي بوحدة كيفها انا كون جات عندي اختي دارت فعايلها يا حصرا من نحرتها وخليت الكلاب يبولوا على قبرها .جا راح يهدر مسلم قطعلوا الهدرة قالوا متناقشنيش انا الكبير وانا نعرف خير منك هاد الطفلة كون نخلوها هنا راح تخلي لي يسوا ولي مايسواش يضحك علينا ويديرنا شماتة . قالوا مسلم نقولوا لبابا وهو لي يقرر . قالوا راك تكسر في كلمتي .قالوا لا بصح علابالك بابا هادي شحال وهو يحوس عليهم وكي لقيناهم راح تبعدهم . قالوا راني قتلك واحد ما يسمع بيهم تخرج هدرة بلي لقيتهم تخلصها غالية . راح وخلاه واقف وجه الشر جامي كرهت واحد في حياتي كيما هو . رجعت قعدت مع اسمهان ،شوي وخرج الطبيب لي كان يدير في العملية لماما قالنا بلي العملية 50 بالمئة تكون نجحت والباقي على ربي . الحمد لله يا ربي دوك وين رتاح قلبي . جبناها شحال من نهار وحنا في السبيطار ماما مازالت مافقتش
