نهار الاربعاء نضت على التسعة غسلت وفوتت ديراكت للشمبرة تاع فيفي لقيتها مزالها كيما خليتها لبارح متغطية من راسها لرجليها وصوت بكاها وصلني حتى قبل ما ندخل وليت خرجت وهبطت للفوايي نشريلها لفطور كشما تاكل لقمة علابالي كون منوكلهاش انا بيدي تبقا بالجوع غايضتها كيفاش تمسخر بيها ملقري ديما نوصيها بصح طاحت في الفخ . كملت شريت لفطور ليا وليها بيسك فات وقت الريسطوا . خرجت من الفوايي طالعة للشمبرة تاع فيفي لقيت خولة جاية تجري عندي قاتلي جوليا كنت جاياتك بعدا قتلها علاه وش كاين قاتلي عيطلي اصيل قالي روحي قوليلها تهز عليا من قبيل وهو يعيط . قتلها اوكي مرسي . قاتلي بلا مزية المهم روحي عاودي عيطيلوا بيسك راه اننسستا عليا منطولش . قتلها اوكي صاي راني رايحة وليت طلعت ديراكت للشمبرة بيسك خليت التلفون تاعي ثم وصلت هزيت التلفون راح نعيطلوا لقيتوا ديجا عيطلي 12 مرة. غير عاودتلوا قالي علاه متهزيش ربك انتي وش وصيتك المرة لخرى قتلوا كنت برة وخليتوا في الشمبرة علاه عيطتلي قالي وجدي روحك راني قريب نوصل نديك للدار قتلوا علاه بصح نروح ليوم عندي قراية منقدرش قالي جوليا متزيديش عليا وجدي روحك راني قريب نوصل . قتلوا صحا كي توصل عيطلي نهبط . كوبيت بدلت قشي بالخف وهزيت معايا غير بيجامة في الساك وخرجت عند فيفي لقيتها كيما خليتها . قتلها فيفي راني رايحة للدار تهلاي في روحك ما بين ما رجعت متبقايش غير هكدا نوضي على روحك شوفي حل هاد الرقاد ماعندو حتا فايدة دوك صاي طاح إلفاس في الراس . نحات الغطا على راسها قاتلي جوليا وين رايحة ومخليتني ياك قلتيلي غدوة تروحي تهدري معاه باه يشوفلي حل قتلها بالاحد نرجع ونروحلوا متخافيش بصح ليوم ليوم لازم نروح بيسك اصيل راه جا قريب يوصل منقدرش نقولوا منروحش . قاتلي مطوليش عليا جوليا تعيشي لازم نلقى حل قبل ما نروح للدار . قتلها كوني متهنية راني وعدتك ومش راح نخليك انت صاحبتي وانا مستحيل نخلي صحبتي متخافيش . قاتلي اوكي روحي ملا رانا نحكو في التلفون قتلها باي . سمعت تلفون لقيتوا اصيل قالي اهبطي راني وصلت. قتلها راهو جا راني رايحة . ضحكت قاتلي جا حبيبك. قتلها تحبوا حبة من جا حبيبي هداك لي خصني . خرجت هبطت عندو لقيتوا واقف يستنى فيا وصلت عندو سلمت عليه قتلوا وشبيك جيت ليوم ياك عبالك بيا عندي تيدي منقدرش نغيب..قالي اركبي . ركبت ديمارا يسوق فيتاس وتلفونوا غير يصوني وهو يكوبي من بعد هز مهدرش غير يسمع من قالوا مبقاش بزاف راني راجع . من قالوا صاي مسلم متزيدش تكسرلي راسي ديجا كوبي . من بعد كوبا قتلوا اصيل وش كاين شبيك زعفان هكدا . شاف معايا وتبسملي قالي والوا منيش زعفان مي قلقني مسلم . ضحكت قتلوا مسلم ميقلقش بالعكس. كمل يسوق من بعد حكملي يدي شفت فيه مستعجبة خلعني بلقطة كيما هادي . قالي حنا عايلتك مهما بعدتي ولا قربتي راكي هازة دمنا ولقبنا لي تقيسك انتي تقيسنا حنا قبلك . مخي مركا ايرور من هدرتو .ضحكت بأستهزاء قتلوا مكانتش هادي هدرتك قبل. قالي راكي قلتي قبل وحنا فتنا قبل صاي ، مراكيش وحدك حنا كامل معاك وجامي لا راح تبقاي وحدك . قلب ضرب في الألف من هاد الهدرة . قتلوا اصيل وش كاين علاه راك تقولي في الهدرة هادي قالي والوا جيست راني نهدر برك باه نفوتوا الطريق قتلوا راك تتمسخر ياك ديما تروحني وترجعني وجامي لا قلت هدرة كيما هادي أهدر وش كاين ماما كشما صرالهاا قولي متخبيش .قالي ماماك راهي في الدار تستنى فيك لاباس عليها متوسوسيش روحك دوك نوصلوا وتشوفيها اوكي هدني روحك دوك . درتلوا براسي ايه وانا حاسة بحاجة ضاغطة على قلبي حبيت نبكي علابالي بلي راه يكدب راني متأكدة بلي كاين حاجة ، حبيت نغمض عينيا نفتحهم نلقا روحي في دار قدام ماما .كي نقولكم جمدت بقيت بنفس البوزسيون حتى وصلنا وهو سكت حرف منطقوش غير يشوف معايا ويكمل يسوق. غير دخلنا للكارتي تاعنا حكمتني الخلعة الفشلة حتى قلبي دار عليا حبيت نرجع . كملنا وصلنا وين الدار ڨارا وتنهد شاف معايا قالي هيا . بكيت قتلوا لا منيش حابة. بقا يشوف معايا من بعد عاود حكملي يدي كي شغل حاب يهدر ومقدرش قالي هيا جوليا. هبطت لقيت مسلم خرج من الدار غير شافني جا عندي ديراكت حضني دخلني في صدرو . وليت نبكي بصوت . قتلوا مسلم وش كاين راني تخلعت وين راهي ماما . بعدني عليه وحكمني من كتافي قالي ما كاين والوا صاي ما صرا والوا هيا تدخلي . حط يدو على كتافي واصيل حاكملي يدي ، مقدرتش نحي يدي من يدو حاكمة فيه على قوة جهدي كأني قاعدة نكوراجي في روحي بيه . غير دخلت للدار نسمع في صوت بكا قاوي فرزت منو صوت اسمهان قاعدة تقول ماما متخليناش منقدروش نعيشوا بلا بيك ماما . احساس مستحيل نقدر نوصفوا مفقتش مع روحي لقيت روحي قعدت على ركابيا في الارض نبكي على قوة جهدي ما راني نسمع في والوا . حسيت بيدين اصيل يوقفوا فيا وهو يقولي جوليا خليها تشوفك آخر مرة كي محبيتش نوقف من بلاصتي طبس هو عندي حكملي وجهي قالي جوليا خليها تشوفك نوضي . شفت معاه قتلوا ماما . قالي اشسش اطلعي عندها . قتلوا منقدرش منقدرش . وصح مقدرتش خاطر علابالي ورا هديك اللحظة لي راح نشوفها فيها راح تصرا اخيب حاجة في حياتي. قالي تقدري ادا مطلعتيش وشفتيها راح تندمي حياتك كامل وراح تبقى حريقة في قلبك كيف النار شاعلة مستحيل تطفى . وقفني بسيف عليا وطلعني درجة درجة في دروج رجليا مكانوش هازيني غير هو يمشي فيا بسيف عليا . غير وصلت للشمبرة تاعها لقيتهم ڨاع عندها و اسمهان قاعدة في الارض قدام سريرها وحاطة راسها عليها وتبكي .
