غير وصلنا ، هبطت ومشيت وقفت مع الحافة كي تشوفي لتحت تلقاي البحر بعيد منظر يخوف بصح يهبل . غمضت عينيا نستنشق في ريحة البحر سمعتوا قالي بعدي من تم. قتلوا زعما كون نرمي روحي من هنا وش يصرالي . قالي ميصرالك والوا غير تموتي ويلقاوك بياس ديتاشي ، تحبي تجربي .ضحكت قتلوا في خاطري نجرب نرمي روحي من بلاصة بعيدة بصح منيش حابة نموت . قالي ملا ارواحي هنا . رجعت لقيتوا متكي على الطونوبيل . عاودت دخلت الطونوبيل شعلت لغنا ورجعت قعدت معاه . بقينا ساكتين من بعد قالي راهي عجباتك لمعيشة معانا . ضحكت قتلوا في لول كانت تبانلي بيزار نسكن مع عباد منعرفهمش وانت كنت مخوفني الصراحة وزيد كي بقيت في الاقامة ، والفت وحدي بصح بعد ما رجعت للدار بديت نوالف معاكم وانت مطلعتش سيئ لهديك الدرجة لي كنت متخيلاتك بيها . سكت من بعد شاف معايا قالي مام انا كنت حاب نبعدك بيسك الدار مهيش ناقصة مشاكل بابا مريض في أي دقيقة قادر يطيح كريز وانتي كنت حاسبك تاع صح مصيبة وطاحت علينا سيرتوا من هدرتك وتصرفاتك وقلت هادي هيا لي راح ديرلنا مصيبة تقتلنا بيها كامل . قتلوا قصدك كنت خايف لا ندير كيما ماما صح . حط يدو على خدي قالي هيا ربي يرحمها مي فينالمو انتي خرجتي عكس ما كنت متخيلك . قتلوا كيفاش خرجت قالي حاجة شابة بزاف شوي حنانة وتولي عجينة . حشمت ضحكت قتلوا تبانلك غير ليك انت برك الناس كل تشوفني حاجة منيش شابة و ناقصة وانا والفت بنضرتهم نورمال . قالي غيرين تالمو شابة عليهم . هبطت راسي وسكتت حشمت حتى نسمع في صوت ضحكتوا. طلعت راسي شفت معاه قالي زعما حشمتي ، و الله ما طلعت عليك. قتلوا يزي بلا ضحك علاه متطلعش عليا منيش طفلة ولا قالولي وجهي حيط . قالي لي قالتلي نجيبك تحت رجلي منضنش تحشم .قتلوا وانت كي خنقتني ودخلتلي لنص الشمبرة في ليل محشمتش . كمل يضحك من بعد سكت فات شوي وقت وحنا ساكتين من بعد تلفتلي وقالي جوليا كون يجي باباك يطلب منك السماح . شفت معاه بشك قتلوا وش فكرك فيه دوك قالي راني نسقسي فيك برك . قتلو منسمحلوش باينة لي نورمالمو يطلب منها السماح راحت ، وانا سماحوا ما عندي ما ندير بيه بعد 19 عام ، وين كان كي كنا نتمرمدو بكري وكي كنت نسمع لكلام في جرتوا ، بسبابوا كلمة بنت لحرام بقات لاصقة معايا كي اسمي . قالي وكون يقولك نديك تروحي معايا تعيشي عندي . قتلوا منقبلش وعمري نزيد نقبلوا في حياتي ،مشييت وخليتوا وقفت في الحافة نشوف مع البحر قتلوا متزيدش تجبدلي عليه انا نسيت ولقيت شكون لي يعوضلي بلاصتوا لقيت خالي ومسلم وانت عوضتولي بلاصتوا وليت نقول عندي لكتاف بيكم انتم برك ولي يقولي شكون باباك نقولوا خالي هو بابا ، متزيدش تجبدلي عليه . قالي منزيدش نهدرلك عليه بعدي من تم وارواحي ، راكي واقفة في حافة تزلق رجلك طيحي . بقيت واقفة قالي هيا ارواحي جوليا ولا والله ما نزيد نجيبك هنا . درت شفت معاه ودموع في عيني قتلوا وكون نرمي روحي من هنا وش دير. عيط عليا قالي ارواحي هنا بلا تبهليل تاعك جوليا متقلقنيش . حطيت رجل في الهوا قتلوا شوف راح نطيح . ما حسيت غير بيدو جبدتني على قوة جهدو جيت طايحة في الارض . وهو ناض يعيط يخي مهبولة تاع &&& لكان زدت جبتك هنا راني منيش راجل .ضحكت قتلوا شبيك خفت هكا نورمال مكنتش راح نرمي روحي . ناض يعيط وكون طحتي صح وكون زلقت رجلك وطحتي صح . قتلوا تسما مكتوبي نموت هكا نورمال. طبس عندي حط صبعوا على راسي قالي خيط لهبال لي في راسك غير نحيه فهمتي . ترميت في حضنو وبكيت حتى هو حضني قالي اششش خلاص والله ما نزيد نجبدلك عليه انسايه ولي يقولك انتي بنت شكون قولهم انا بنت اصيل سمعتي أصلا هو ميساتهلكش حنا لي نستاهلوا طفلة كيفك . ضحكت وبعدت عليه مسحلي الدموع قالي صاي راه راح الحال نوضي نروحوا. نوضني ، نفضت قشي من التراب وركبنا مروحين .
