خرجت دمعتي على خدي علاباليش وين نروح حبيت نروح لدارنا لقديمة خفت يشوفني عليلو جيت وحدي كشما يديرلي وليت قعدت ندور برة حتى وصلت 6 تاع لعشية بدات تظلام الدنيا وانا غير ندور داخلة زنقة خارجة زنقة جبدت تلفوني لقيتو مغلوق مع فتحتو وصلوني لي زابال تاعهم كامل خالي مسلم حتى من مروان باين راهم يحسو عليا بصح انا محبيتش نهز عليهم عيطت لريان غير هيا لي جات في راسي في هاد الوقت جيست مع عيطلها هزت قاتلي اهلا جوليا صفا قتلها لباس وسكتت قاتلي غير خير كشما كاين قتلها راكي قاعدة دوك قاتلي علاه غير الخير وش كاين قتلها راني برة ادا تجي تديني منيش هازة معايا دراهم ومنيش حابة نروح للدار و ملقيتش وين نروح قاتلي علاه وش صرى قتلها من بعد كي تجي نحكيلك بصح ما راني حابة حتى واحد يسمع بلي حكيت معاك صحا. قاتلي معليش عشر دقائق نكون عندك ابقاي وين راكي برك . بقيت في بلاصتي نستنى فيها حتى وصلت بالطونوبيل والحطة غير شفتها حكمتني الغيرة سيرتو من حالتي كانت مبهدلة وجهي أصفر ليساغن ، شعري طالع في السما . هبطت سلمت عليا قاتلي الخير برك جوليا خلعتيني علابالك علاه راكي برة ذ لوقت قتلها منزيدش نرجع هاديك الدسار شوفيلي بلاصة نبات فيها ليلة برك خفت نرذحكامل ساكتين محبتش تسقسيني كي شافتني مقلقة وحالتي هكداك بقات ساكتة وصكلنا دارها نورمال ابارتمون في باطيمة بصح بلاصة شابة ساكنة غير هيا ويماها مرا كبيرة دخلنا رحبت بيا قعدت في صالة يماها قعدت معانا شوي من بعد راحت للكوزينة طيب . وهيا قاتلي جوليا قوليلي وش كاين مش حل هدا تخرجي من الدار بلا ما تقوليلهم . قتلها ريان تعيشي متغضطييش عليا راني منيش في حوالي عيطتلك برك كي ملقيتش وين نروح . قاتلي منيش نضغط عليك بصح على الأقل فهميني وقوليلي وش كاين . قتلها تعاركت معاهم وخرجت . مع شكون تعاركتي . قتلها مع نجمة واسمهان ومرت خالي. قاتلي هدا برك لي صرا . سكتت من بعد قتلها حرقت اسمهان على وجها . دهشت قاتلي واش عملتي قتلها مكنتش نيتي باش نحرقها غلطت كنت نهدد فيها برك والله . حطت يدها على فمها وتشوف معايا من بعد قدمت عنقتني وليت نرجف من البكا ضغط كبير راني حاسة بيه قلبي راح ينفجر . بقات تسكت فيا وانا والوا عين وفتحتيها فرغت قلبي كي حبست بعدت عليا قاتلي جوليا لازم تخبريهم وين راكي تلقاهم متحيرين عليك حتى على وجه خالك . قتلها لا أصلا غير يوالفوني بعيدة عليهم هديك دار عمري ما نرجعلها . قاتلي معليش ارواحي نعطيك بدلي حوايجك واغسلي ارواحي . تبعتها لشمبرة عطاتني بيجامة زرقة لبستها ودخلت الدوش غسلت عليا وخرجت لقيتها موجدتلي كاس تاع نعناع وحبة تاع دوا قاتلي شربيها تهديلك اعصابك . شربت وقعدت قاتلي روبوزي ما بين لا طاب لعشا . خرجت وخلاتني قعدت شوي من بعد خرجت لحقتها انا وصلت للصالة سمعتها تهدر في تلفون . سمعتها تقولو يا اصيل وانا وين علابالي قتلك عندها ساعة برك من لي عيطتلي . كانت تهدر معاه بلاكام سمعتو قالها محكاتلك والوا . قاتلوا والوا بصح لحكاية مش غير تاع تعاركت معاهم برك باين كاين حاجة اخرى . قالها معليش انا راني نوصل على 3 تاع ليل نجي نديها راني نعيطلك قبل ما نوصل . قاتلوا والخدمة اصيل كل مرة تحبس في نص وتجي راك تخسر في خدمتك ياك راهي عندي وعلابالك بيا انا نتهلى فيها شغل راهي في دار عندك . قالها وش دخلني في ### الخدمة انا ، انا منتهناش حتى نجي نشوفشسسها بعيني وزيد لازم نفهم وش كاين هكدا حتى تخرج من الدار .قاتلوا معليش المهم انت عندك من طريق سوق بشوي وكالمي روحك والله غير لاباس عليها . قالها صحا نوصل نعيطلك . كوبات دخلت عندها قتلها عيطيلو ؟؟ ياك قتلك منحب حتى واحد يعرف بلي راني عندك . قاتلي جوليا حبيتي ولا كرهتي لازم نقولللهم راهم متحيرين عليك ، ديجا اصيل راهو جاي قبل حتى ما نقولو . تعشينا بالسكات كملنا قاتلي روحي ارقدي في الشومبرة الدار دارك . دخلت للشمبرة غفيت شوي ونضت على هدرة شفت ساعة ثلاثة ونص تاع ليل عرفتو بلي هو لي راه يهدر . خرجت نمشي لحقت للصالة لقيتو واقف باين دوك وين دخل شافني خزر فيا من رجلي حتى راسي قالي هيا البسي في رجلك نروحو . قتلوا معندي حتى بلاصة نروحلها هديك دار نموت ومنزيدش ندخخلها . قالي جوليا صلى على محمد راه ليل وديار ناس منيش حاب نقلق هيا البسي نروحو . قتلو قتلك منروحش متفهمش والله ما راني راجعة لهديك الدار فهمت ولالا يا الكذاب يا الخداع . دهش قالي وشنو وش قلتي على من راكي تقولي كداب. قتلوا عليك ، علابالك شحال كنت مخدوعة فيك . قدملي قالي وش راكي تقولي انتي في هاد الليل راكي دايخة. قتلوا بالعكس راني صاحبة مليح مليح نسقسيك سؤال واحد وجاوبني ، بابا جا عندك ولالا قول ؟. سكت من بعد قالي لا ماجاش عندي . ضحكت ودموع في عيني . قتلوا شفت بلي انت كداب ومتسواش ، بابا جا عندك وانت وباباك سحتوه هو حب يشوفني وانتم منعتوه صح ولالا قول ولا راني غالطة . قالي شكون قالك هاد الهدرة . قتلوا ميهمش شكون قالي . قالي ايه جا عندي وانا سحتو ورخستو بيسك هداك الراجل ما يعنيلك والوا فهمتي ولالا . عيطت عليه قتلوا هداك الراجل بابا انت لي فهمت ولالا شحال انا عندي نقولك راني حابة نشوفو ونتلاقا بيه وانت جا لعندك وسحتو لهاد درجة تكرهني وباغيلي نبقا هكدا معلقة .
