خرج هو لقاني مزلت واقفة في بلاصتي نخمم . قالي شبيك واقفة هنا قتلوا والوا واقفة برك نستنى فيك قالي راني كملت هيا ، جيت هابطة قالي راح تروحي هكا قتلوا ايه قالي امشي البسي فاست البرد . قتلوا وين البرد الشمس تقول عليه صيف . قالي خودي الراي من بعد كي نعودو مروحين تبردي . وليت دخلت للشمبرة جبدت فاست هزيتها في يدي وهبطنا لتحت لقينا القبيلا كامل قاعدة تفطر تقول عرس شافنا خالي قالنا اقعدوا تفطرو من بعد روحوا د قالوا لا لكان كفانا الوقت نفطرو في الطريق راح عليها الحال على الامتحان. اسمهان غير تشوف معايا حسيتها قاعدة تتحلف فيا . خرجنا وديمارينا طريق كامل كملناها حكايات صاي والفت بعقليتوا . وصلنا هبطت نفوت الامتحان ملڨري ما علابالي بحتى كلمة المهم نكتب اسمي في الورقة باه ميقصيونيش برك وهو قالي نروح نشوف خدمتي كي تكملي عيطيلي . فوتت وكملت قعدت شوي مع صحباتي من بعد عيطتلوا هز عليا قالي شوي ونكون عندك . بقيت نستنا فيه حتى جا ودعت صحباتي وركبت . قتلوا CV . تبسم قالي B1 وانتي . قتلوا انا راني هايلة . قالي ملا طلعتي لموديل تاع ليوم مدام راكي فرحانة . قتلوا نكدب عليك ولا نقول الصح . ضحك قالي قولي الصح باينة قتلوا خليت الورقة فارغة معرفت والوا . قالي مالا علاه راكي فرحانة . قتلوا هكدا برك فرحانة . قالي ربي يدومها قتلوا امين . مشينا شوي كي وصلنا لسونتر فيل حبس . قتلوا علاه حبست . قالي راح نشري . هبط وانا بقيت قاعدة . قالي اهبطي وش راكي تستناي . قتلوا نجي معاك . قالي ايه هيا . هبطت جا من جيهتي قالي هيا . قتلوا وش راح تشري قالي حوايج نحتاجهم وزيد راح نشري تلفون لنجمة . قتلوا علاه تشريلها انت يشريلها خوها ولا باباها علاه تخسر دراهمك علجالها . قالي مش خسارة فيها ولا فأي وحدة فيكم مام انا في مقام خوها . سكتت وحطيت يدي في دراعوا كروشيت فيه . شاف معايا مطلع حاجب قتلوا وشنوا عييت خلي نتسند عليك شوي . كمل يمشي وانا نتفرج حتى وصلنا للحانوت يبيع التليفونات دخلنا عندو قالوا اعطيني زوج ايفون . قالوا وش من كولار راك حاب. قالوا اعطيني واحد في روز. من بعد شاف معايا قالي وش من كولار تحبي . شفت معاه مشوكية قتلوا ليا انا . قالي ايه ليك . قتلوا قوووول والله راح تشريلي واحد . ضحك لي يبيع وهو قالي يزي بلا تبهليل جوليا ، هيا قولي وش من كولار حابة. قتلوا ااصبر اصبر نشوف ونخير . من الفرحة حبيت نديهم كامل بسيف باه خيرت واحد في سلفر يهبل يهبل . غير خرجنا من الحانوت قتلوا معليش نعنقك والله راح نموت بالفرحة . عنقتو قتلوا شحال وانا في خاطري نشريه وسخفانة عليه مرسي بزاف بزاف . حط يدو على شعري قالي حاجة ما تغلى عليك اي حاجة في خاطرك نجيبهالك يا لوكان نجمة من السما انتي اطلبي برك . قتلوا ربي يخليك ليا . ركبنا في الطونوبيل قتلوا علابالك مزال حاجة في خاطري . قالي وش هيا قتلوا تديني للبلاصة هديك لي جاية فيها بحر لي ديتني ليها اول مرة تشفى . قالي هادي برك دوك نروحوا .
