تفكرت كي قالي وجدي روحك واهبطي نديك تتعشاي . لبست غوب خفيفة الركبة فوقها فاست تاع جلد مع باسكات بيضة ، حكمت شعري كوتشوفال ودرت شوي مكياج وهبطت تحت في الدروج نسمع في الحس خارج من الصالة صوت اسمهان هدا بصح تبان راهي تبكي كملت مشيت نسمع فيها تقول حتى بنت عمتك ولا غير هيا لي يديكم النيف عليها وانا واحد لا من يسقسيني وش نحتاج ولا غير يوصلني للجامعة . سمعت مرت خالي قالتلها صح بنتي في هادي عندك الحق تلومي عليهم .دخلت للصالة وين كانو قاعدين لقيت خوالي قاعدين ونساهم واصيل واقف . شفت مع اسمهان قتلها وشبيك اختي تبكي وش كاين نطقت قاتلي ما كان ما دخلك بخصتني قدامهم . نطقلها اصيل قالها غلقي فمك..من بعد شاف معايا قالي روحي دوك نجي . قتلوا علاه وش كاين وش بيكم . قالي راني قتلك روحي دوك نجي . خرجت لقيت وسيم وريمة قاعدين في الطابلة تاع الماكلة منعرف وش قاعدين ياكلوا . كي قربت ليهم لقيتهم ياكلو في الاندومي قتلهم وش كاين في الصالة اجتماع كي دخلت سحتوني . قالي وسيم اسكتي برك اختك اي دير في قوالب وسينيمات . قتلوا علاه وشبيها .قالي راهي مصباح تاكل في روحها قالتلهم مراكمش مقيميني تقول مارانيش بنت عمتكم حتى انا كيفي كيف جوليا علاه هيا تخرجوها تحوسوا بيها وتوصلوها للجامعة وانا واحد ما راه لاتي بيا .نطقت ريمة قاتلي اختك مفدودة علابالك شحال من مرة نلقاها تريش فيك مع نجمة . تنهدت بحرقة منعرف علاه ديرلي هكا قالي وسيم متعمريش راسك بيها . هزيت راسي برك وسكتت . شفتها خرجت من الصالة تخبط في روحها وتعيط ندير كيفاها نهز كابتي ونروح نهمل مع رجال كشما تحسو بلي عندكم في دار وحدة اسمهان . ويلحق عليها اصيل حكمها من الشعر هبط عليها بكف حسيت انا وجهي وجعني في بلاصتها . رحت نجري انا وريمة عندها ، وسيم والله ما تحرك من بلاصتوا حكمت يدو قتلوا اصيل اطلقها وشبيك تضرب فيها . نطقت هيا قاتلي ضربني خاطر محبش كي هدرت الحق . خلخلها من الشعر قالها تغلقي ر& فمك ولا لا . بقيت نجبد فيها عليه ونفك فيها قتلوا اصيل صاي اطلقها . دزتني هيا قاتلي بعدي عليا انتي ما كان ما قودك فيا أصلا انتي هيا سباب كلش . مع كنت مش حاكمة روحي مليح ودزتني على غفلة جيت مخبوطة في الارض راسي في الحافة تاع الدرجة حسيت راسي عاود تشق كيما الصباح ديجا من الضربة لي ضربهالي مع كارو وزيد مع طيحة هادي حسيت راسي تقسم عيطت على قوة جهدي من لوجع سيرتوا جيهة رقبتي حسيتها تفعصت هديك لبلاصة جاو يجرو عندي كل . اصيل هو لول يقولي وشبيك وش يوجع فيك قتلوا راسي راسي ياربي راح نموت من لوجع . مرت خالي قاتلوا متحركهاش من بلاصتها تعود تكسرت ولا حاجة . وهو والوا دار لي في راسوا هزلي شوي راسي من لرض بصح كي حط يدو على راسي من لور عاودت عيطت قتلوا وجعتني وجعتني نحي يدك قالي خلاص نحيت . شاف في اسمهان ونطق بالعياط قالها تصرلها حاجة نقطعك يا الكلبة . راح يهزني قالي نديك للسبيطار قتلوا لا راه بدا يحبس شوي . عياو فيا خوالي نسا خوالي رسيم مسلم كل يقولولي روحي للسبيطار خير والوا محبيتش قتلهم راه بدا يزل عليا شوي بسيف وقفوني نمشي ديخانة شوي دنيا تروج بيا قعدت في الصالة جابولي مرت خالي جي شربت من بعد قتلهم نطلع لشمبرتي . طلعوني للشمبرة تكسلت بسيف على رقبتي توجع . قعدت معايا ريمة ولبنات خواتاتوا شوي كانت ديجا 11 هما راحوا يرقدو وانا بقيت شوي ورقدت . بصح منبا ساعة فطنت على وجيعة يعلم بيها غير ربي وليت نبكي بالدموع تالمو موجوعة سيرتوا جيهة فوق رقبي شوي حسيتها تقول مكسورة تالمو مضرارة بزاف . وقفت بسيف لرض تتحرك تحتي . دموع يجرو وحدهم على خدي خرجت بشوي نمشي خطوة ونغمض عيني تقول راح نطيح لرض تتحرك. بسيف وصلت لشمبرة مرت خالي طبطبت زوج دقات . نسمع فيها تمشي قالت شكون . نطقت قتلها جوليا . فتحت الباب شافتني خلعت . حكمتني بيسك كنت راح نطيح قاتلي وشبيك بنتي . قتلها راسي مقدرتش خالتي راه يوجع فيا بزاف نهدر ونبكي وجهي بياض من لوجاع ميتحملش . وهيا تالمو تخلعت من حالتي عادت تعيط مسلم يا مسلم وسيم اصيل ( هههه عيطتلهم كامل من الخلعة ) ارواحوا شوفوا الطفلة وشبيها يا ربي توخدنا في بنت الناس امانة يا ربي . وكي شمبرة مسلم قريبة ليها جا هو لول بقا غير يقولي وشبيك وش يوجع فيك بقيت غير نقولوا راسي ونميل من جيهة لجيهة تالمو رقبتي مضرورة. وهو كي عاد يدو مكسورة مقدرش حتى يحكمني رجع يعيط على اصيل . حتى جا غير شفتوا بكيت كي دراري الصغار ونشكيلو رقبتي وراسي وراح نموت بقا غير يهدن فيا ويقولي متبكيش يزيد عليك لوجع دوك نديك للسبيطار . وانا ارواحوا وسكتوني والوا هزني وهبط . لحقنا وسيم فتحلوا الباب بيسك مسلم ما يقدر يدير والوا بيدو . حطني وركبوا وقلعنا ديراكسيو للسبيطار انا تقول راني نعوم حاسة نفطن ونغيس .
