رحت للشمبرة تاع اسمهان لقيتها قاعدة قتلها وشبيك انتي من لي جيت وانتي تبكي كشما صرا وراكي مخبية عليا ولا ماما بيها حاجة قاتلي والوا غير مكان لاه تتوسوسي غير كي عندي بزاف مشفتكش وزيد كنت نقول لماما تقنعك ترجعي تقراي هنا خير مقدرتش نوالف وانت بعيدة .قتلها منقدرش نرجع هنا واصلا والفت لهيه وراح نولي كل جمعة نجي . قاتلي معليش . قتلها راكي متفاهمة معاهم هنا . قاتلي ايه متفاهمة معاهم عقليتهم مليحة غير مرت خالي الوسطاني مش حاملتني لا أنا لا ماما قتلها ماعندها ما دخلها أصلا هادي دارنا وكان تهدر معاك ولا كشما تحل فمها فهميها قدرها . ضحكت قاتلي حابتني نتعارك معاها. قتلها ايه متسكتيش على حقك قاتلي علابالي أصلا هيا ما تقول والوا غير تشنف برك متكسريش راسك . قتلها المهم من بعد راح يخرجني مسلم ندورو تروحي معانا . قاتلي انتي وش بينك وبين مسلم راكي غير لاصقة فيه وهو يضل يهدر عليك . ضحكت قتلها ما بيناتنا والوا بصح يعجبني ونحبوا هو اول واحد عطاوني ووقف معايا بلا حتى مصلحة. قاتلي صح هو عاقل ومتربي حتى انا يعجبني. شافت معايا من بعد قاتلي واصيل . قتلها وشبيه . قاتلي وش بينك وبينو . قتلها بيناتنا غير المشاكل ميحملنيش تقول راني قاعدتلوا فوق قلبوا ،كون يصيب ينفيني من الدنيا حتى انا نكرهوا ومنحملوش وكون نصيب منشوفوش . قاتلي بصح انا راني نشوف في عكس وش راكي تهدري . قتلها ملا انتي عورة . عادت تضحك قاتلي هيا نهبطوا نتغداو . هبطنا تغدينا كامل ومن بعد طلعت رقدت حتى العشية باه نضت بدلت قشي لبست لبسة تاع برة درت شوي مكياج و حكمت شعري كوتشوفال وهبطت لقيت غير خالي قعدت معاهم والباقي مكانش كل واحد وين راح حتى دخل اصيل ومسلم من برة . قالي مسلم الله الله راكي موجدة روحك للخرجة قتلوا وي راني واجدة غير نستنى فيك برك . قالي نطلع نجيب مفتاح الطموبيل ونروحوا. هو طلع واصيل جا يهدر معايا قالي وين رايحة . قتلوا مسلم راح يديني ندورو . جبد دراهم من جيب مدهملي قالي احكمي واشري وش حبيتي . شفت معاه حايرة كنت نحسابوا راح يقولي متروحيش . وليت حكمت عليه الدراهم حتى هبط مسلم منعرف وش هدر معاه وبقا يوصي فيه من بعد خرجنا . حوسنا حتى عيينا باه روحنا للدار لقيناهم كامل راقدين غير خالي واصيل قاعدين في الصالة . قالنا خالي طولتوا برة . قالوا مسلم محسيناش بالوقت وزيد تعشينا هداكا هو . انا قتلهم تصبحوا بخير وطلعت بدلت حوايجي ودخلت نرقد مع ماما عنقتها وانا نشم في ريحتها لي منشبعش منها ورقدت . الغدوة فوتت نهار كامل مع ماما واسمهان . بعدها رجعني اصيل للاقامة وقالي الجمعة الجاية راني نجي نديك تهلاي في روحك وادا سحقيتي حاجة عيطيلي حتى على الوحدة تاع ليل قتلوا عبالي مرسي . جبدني عندو وسلم عليا قالي كيما وصيتك وكي نعيط هزيت عليا درتلوا براسي ايه وهبطت دخلت ديراكت عند فيفي لقيتها في حالة غير تبكي حبيت نفهم منها وشبيها قاتلي والوا . بقيت ننسيستي علاها غير باه تقولي حتى قاتلي الخبر لي صدمني قاتلي جوليا لبارح خسرت روحي خسرت كلشي تمسخر بيا وكلحني قالي منديرلك والوا وانا صدقتوا وش راح ندير خاوتي يقتلوني جوليا . بقيت مصدومة منيش مصدقة . مفقتش مع روحي لقيت روحي نضرب فيها بالكفوف كف ورا خوه وانا نعيط قتلها كيفاش خليتيه يتمسخر بيك كيفاش خليتيه يلمسك . وهيا غير تبكي حتى حبست وحدي قعدت نشوف فيها قلبي يتقطع عليها. قاتلي كيفاش ندير دوك . قتلها متخافيش مدام انا معاك راح نلقاو حل راح نهدر معاه انا ونفهموا بلي لازم يتزوج بيك . قاتلي ايه لازم والله خاوتي يقتلوني . قتلها خلاص تهدني ما راحش يصرى والوا نهار الخميس نعيطلوا ونروح نهدر معاه اوكي هيا دوك نوضي اغسلي وجهك . بعدها ناضت غسلت ورقدت وانا معاها وفوتت معاها ثلاث ايام غير هكدا . حتى نهار الاربعاء نشفا على هداك النهار كي ليوم وراح يبقى هداك نهار اسوء نهار في حياتي من وراه ما شفت يوم فرحت فيه بسك نهار هداك راحت فيه شمعة حياتي وضوها راحت لي كنت صابرة على هاد الدنيا علجالها .
