بقيت قاعدة في الصالة معاهم تحت ، بصح راسي راسي قتلني مش يوجع شغل يفيبري حاسة روحي حاكمني مونك تاع حاجة وليت غير نشرب كاش دوا يحبسلي الشي لي راني حاسة بيه . شربت قهوة شربت دولبران دوا تاعي لي عطاهولي الطبيبة والوا محبش . اسمهان غير تشوف معايا وتميز . مقدرتش نكمل نقعد معاهم راح نخبط راسي في الحيط باه يحبس . قتلهم نطلع نرقد شوي عييت . طلعت للشمبرة صيبو وليت نبكي دمعة وخنونة وليت نرعش ملقيتش كيفاش نهدي روحي معلاباليش حتى وشبيها حالتي هكدا لعرق يهبط من وجهي كي الماء وجهي حمر . ندور في الشمبرة كل زوج دقايق نشرب حبة تاع دوا والوا باقي ويزيد عليا الحال ما فهمت والوا . سمعت ريمة جات دقدق في الباب باه نهبط نتغدا روحت نجري للسرير رقدت وغطيت روحي خفت لاتشوف حالتي هكدا وتبدا تحوس تفهم وانا أصلا معلاباليش وش بيها حالتي هكدا . دخلت كي شافتني مغطية وراقدة راحت خرجت . بقيت هكاك بلاصة ما راهي واسعتني ندور شعري راح نقلعو كرزت . عاود تفتح الباب لقيتها اسمهان دخلت وغلقت الباب . بقات واقفة تشوف معايا وتبكي . مسحت دموعي وقتلها وشبيك انتي حالتك هكدا وش كاين كشما دارولك من لي جيت وانا نشوف فيك انورمال . زادت في بكاها قاتلي جوليا اسمحيلي والله ما كنت علابالي راح يصرا هاك. قتلها مفهمتش على واش نسمحلك وش عملتي . صونا تلفونها جبداتو من الجيب ترجف مديتهولي قاتلي هاكي . حكمتو عليها وانا متعجبة من حالتها جيست ما حطيتو في وذني سمعت صوتوا عليلو قالي يضحك راه حاكمك المونك ههههه من هدا الوقت لليل كون ما تكونسوميش لادوز تاعك عقلك يطير يفيقو بيك كامل بلي تدروقي ، نسيت مقتلكش بلي رجعتك وحدة مدمنة تدروقي، ياك قتلك راح نتلاقاو بعد ثلاث ايام و لا نسيتي. هادي كانت اكبر صدمة ليا تاع الصح تعرفوا واش جمدت وانا نشوف فيها سمعتوا قالي اختك حبيبتك كومبليس معايا ، لعشية نتلاقاو حدا داركم لقديمة ، كان ماتجيش راكي علابالك وش يصرى . كوبا وانا مزالني بنفس لابوزسيون نفس ومتقدرش نجبدو من الصدمة لي راني فيها اختي ديرلي هكدا اختي دمرتني بيديها ، نطقت كلمة وحدة قتلها علاش. بقات تبكي قاتلي معلاباليش بلي راح يدير لك هكدا قالي نخوفها برك باه ترجع معايا مكنتش علابالي بلي راح يدير هكدا ورحمة يما ماكنتش علابالي. قتلها ياك انا اختك علاه درتيلي هكدا ياك انا اختك جابتنا كرش وحدة كنا نرقدو في فراش واحد علاه قولي علاه علاه . تهسترت وليت نندب في وجهي جات راح تقدملي دزيتها طاحت ونطيح فوقها نهز ونخبطت نضرب وين جات وجها دمدمتهولها راسها نهز ونخبط مع الارض هيا تعيط وانا غير كلمة علاه في فمي اكثر حاجة تكسر الانسان هيا الخدعة كي تجيك من انسان قريب ليك وانا جاتني من اختي كاين انسان اقرب ليك من خوك ؟ مكانش على هادي صدمتي مكانتش ساهلة تهسترت ودمرت ، جاو البنات بقاو مدهوشين من المنظر تخيلو كنت قاعدة فوقها وراسها في يدي نهز ونخبط وهيا وقيل داخت ولا بيسك مكانتش تتحرك وجها كامل دم وكانت موتها بين عينيا .بعدوني من فوقها بالكشايف ومرت خالي وسطاني تندب هادي مهبولة معيشينها معانا في دار شوفوا وش دارت في اختها قتلت الطفلة عيطو لامبيلونس وقيل ماتت . انا خليتهم ودخلت للدوش غلقت الباب و قعدت في الارض نشوف مع يديا معمرين بشعرها ودمها . معلاباليش شحال بقيت في الدوش وانا تايهة مخي غايب غير نشوف من بعد كاأنو رجعلي الادراك رجعت نرغي مش نبكي قلبي طلع بقيت غير نتقيا كلشي فرغتوا ومزلت نتقيا مالقري ما قاعد يخرج والوا من فمي . صوت يطبطبو في الباب تاع الدوش مرت خالي قالت لبنتها عيطي يجو يكسرو لباب الطفلة بيها حاجة راهي مهيش في عقلها يعود كشما يصرالها . عيطو لأصيل قالولوا كلشي خمس دقايق جا يمكن كان قريب . جا يسقسي في مرت خالي قالها وش صرى وش كاين قاتلو والله مانعرف يا وليدي سمعنا عياطهم دخلنا لقيناها فوقها وحلتها كامل دم ومن بعد من دخلتت للدوش وهيا ترغي وتتقيا راهي قريب في نص ساعة وهيا هكدا . جا يطبطب ويعيط جوليا افتحي الباب . بقا يعيط من بعد كي عرف بلي مش راح نفتحلو كسر الباب برجلو ودخل لقاني على ركايبي قاعدة مقابلة البنوار مزالني نتقيا ونبكي عينيا راح يخرجو من القي ملڨري والوا ما قاعد يخرج من فمي طبس ديراكت يمسح على كرشي بيدو قالي خلاص خلاص مكاين والوا حبسي متخافيش راني معاك . انا ما شفت معاه ما سمعتلوا عقلي في العالم الموازي . بقا يمسح على كرشي بيد وجبد تلفونوا باليد الثانية مدو لريمة قالها عيطي لريان قولها تخف تجي للدار ايرجو . هما خرجو وهو بقا معايا عنقني من لور ويمسح على كرشي بيدو قالي جوليا حبسي حبسي ضريتي روحك ، خلاص ماصرا والوا كلشي يفوت هيا كوراج ياك حبيبي . بديت نهدا وتروح عليا هديك الهستيرية تاع القي جبدني بالعقل ودورني ليه وانا مزالت فيا هديك شهقة وترجيعة شفت معاه فمي يرجف يديا يرجفوا قتلوا اصيل علاه يصرالي هكدا علاه انا ياك مزالني صغيرة علاه ربي يعاقب فيا وش درت انا . عنقني ويبوس حسيت روحي غايضاتوا تاع الصح بيسك حالتي كانت تشف العدو بقا يقولي غير كلشي يفوت راني معاك ديما . دخلت مرت خالي قاتلوا راهي جات ريان . هزني هكاك خرجني للشمبرة حطني فوق السرير لقيت ريان واقفة عطيتهم بظهري وتكمش في بلاصتي قالها راهي عندها نوبة تاع هلع ما بعد الصدمة شوفي كيفاش ديرلها كالميها . جبدت دارتلي إبرة وسيروم قاتلوا وش صرا حتى وصلت الحالة هادي قالها معلاباليش قالولي ضاربت مع اختها من بعد غلقت على روحها في الدوش . قاتلوا ياك قتلك بعدوها على الستراس يا اصيل خويا قتلك طفلة راهي في الدونجي . مسح على وجهو قالها معلاباليش كانت صباح لباس عليها مام لبارح كانت نورمال مافهمتش وش صرى قريب لا قتلت اختها وهيا شوفي وجها كيفاه . انا كنت مغمضة عينيا ونسمع فيهم.
