كي جيت خارجة معاه قتلوا دقيقة استناني نروح للتوالات ، غير دخلت للتوالات بكيت دم قلبي هادي اخرتي نبيع روحي بصح مش بيدي بسيف عليا فوق قلبي مقدرتش نشوف روحي في المراية حاشمة من روحي كيفاش راح نقابل الناس كيفاش راح نقابل ربي . مسحت دموعي وخرجت لقيتوا واقف يستنى خرجنا ركبت معاه في الطونوبيل قالي اول مرة . ما درت حتى ردة فعل . تبسم قالي عندي الزهر . تقززت منو ومن نفسي . بقيت ساكتة وهو يهدر معايا والتلفون تاعي غير يصوني . قالي شوفي شكون يعيطلك . جبدتو من الصاك لقيت بزاف لي ابال من عند اسمهان ومن نميرو جديد اول مرة نشوفوا . رجعت التلفون للصاك. قتلوا نميرو منعرفوش .بقيت نشوف مع طريق بلاصة جامي شفتها بديت نحس بالخوف ، خوف اكثر من اني راح نخسر شرفي خوف انو قادر يقتلني ويقطعني ويرميني وواحد ما يجيب خبري ، ڨاع الافكار الباشعين جاو في بالي حكمني رعب جمدت في بلاصتي ، ندامة تاكل فيا وش راح ندير . حسيت حط يدو على ساقي قالي فاش راكي تخممي درتلوا براسي والوا. وصلنا لبلاصة غير باطيمات ونصهم فارغين والحالة ضلمة دخلنا طلعنا للدار كانت في ايطاج الثالث . فتح الباب وشعل الضو قالي ادخلي دخلت دار كانت فرغانة فيها غير فوتاي في الصالة وسرير في الشمبرة برك . قعدنا في الصالة شوي وهو يهدر و انا ساكتة خايفة قلبي يرجف وحدو قالي روحي وجدي روحك . وقفت وهزيت صاكي معايا مالقري معندي ما ندير بيه بصح قلبي حسني بلي لازم نهزو معايا . دخلت للتوالات يديا يرجفوا غسلت وجهي مع غلقت الماء سمعتوا يهدر بالتلفون قال غير ارواح راني فكرت فيها وحدة نروبلوها الليلة . سكت شوي من بعد قالوا راني نستنى فيك . سمعت هدرتوا لعبت عليا الدوخة قعدت فوق الكرسي تاع التوالات وانا نندب في وجهي وش درت في روحي كيفاش غرني الشيطان ودرت هكدا . غافلة نخمم في حل و انا نبكي بالشهقة ، صونا تلفوني جبدتوا لقيتوا نفس النميرو لي كان يعيطلي
هزيت سمعت صوت عرفتوا ديراكت مسلم قالي جوليا وين راكي وين روحتي من الصباح وانا نحوس عليك . بكيت قالي علاه راكي تبكي وين راكي اهدري . قتلوا مسلم .قالي ايه مسلم علاه راكي تبكي قولي وين راكي حبسي لبكا وقولي . قتلوا معلاباليش وين راني . سكت فهمها قالي و مع من راكي .كيف كيف بقيت ساكتة . قالي شوفي اخرجي و دوك نجي عندك نديك .قتلوا منقدرش نخرج لازم نجيب دراهم العملية. سمعت صوت اصيل قالوا اعطيني انا نهدر معاها . شوي وسمعت صوتوا قالي جوليا اخرجي راني جاي عندك . بكيت قتلوا صاي فات الحال . قالي ما فات والوا اخرجي .قتلوا وماما .قالي صاي ماماك راهي دخلت تعمل العملية . قتلوا راك تكدب عليا . قالي ما رانيش نكدب عليك قتلو لا راك تكدب قتلي الصباح منمدلكش الدراهم ياك حاولتك ومحبيتيش تمدلي . قالي والله غير يماك راهي دخلت للعملية راني حلفت . سمعت الباب تاع تولات يطبطب وهو يقولي علاه طولتي . سمعت اصيل يعيط قالي نقتلك سمعتي تخرجي عندو نقتلك ابقاي وين راكي دوك نجي عندك وش اسمها لبلاصة لي راكي فيها .رجعت نبكي على زهري الكلب وش ندير دوك حصلت معلاباليش حتى اسم لبلاصة وش هيا . قتلوا معلاباليش . قالي نورمال ماصرا والوا افتحي GPS وابعثيلي localisation تاعك ميساج . قتلوا منعرفش . بقا يتمتم عرفتوا راهو يسب فيا من بعد قالي شوفي ديري كيما نقولك اوكي قتلوا ايه . بقيت ندير كيما يقولي وهداك ورا الباب يقولي مع من راكي تهدري اخرجي . كملت قالي وين راكي قاعدة دوك .قتلوا في تولات .قالي ابقاي في بلاصتك حتى نجي يصرا وش يصرا متخرجيش صحا .قتلوا ايه .كوبا بقيت حاطة يدي على قلبي نحسب في الوقت يا ربي وما يطولش بزاف صاي توبة لانزيد نعاود حاجة كيما هادي . فاتت ربع ساعة وهداك محبش يحبس من طبطيب. في الباب بقيت غيرر ساكتة ما رجعتلوا حتى كلمة . شوي وسمعت واحد يهدر معاه عرفتو صاحبوا لي عيطلوا قبيل جا عندو . زدت خلعت اكثر من قبل جاو في زوج للتوالات قالوا صاحبوا راك بصحك تتستنى فيها تفتح كسر الباب وخرجها بسيف عليها ديجا المتعة كاملة كي تعود هيا مش قابلة راك فاهم . ورجعوا يضحكوا . انا نسمع في كلامهم وندعي في ربي يخلصني منهم مالقري راني في توالات بصح مكانش دعاء ومدعيتوش ومكانش سورة وماقريتهاش رعب جامي عشتوا في حياتي ومانظنش ادا نزيد نعيشوا . بقاو يخبطوا في الباب برجليهم انا رحت نجري للافابوا هزيت الجيلات تاع الحفافة تفتح الباب بعد ما تكسر . قتلهم واحد ما يقرب.ضحك قالي ادا ماراكيش حابة علاه قبيل طايحتلي فيها قحبة وتساومي فيا . بكيت قتلوا خليني نخرج من هنا بطلت منيش حابة . قالي بصح انا حاب مكانش خرجة من هنا حتا ندي لي حاب عليه يا تجي برضايك يا تجي بسيف عليك . جا راح يقربلي قتلوا غيرر ما تقربش راني عيطت لابوليس قريب يوصلوا . غفلني وتلاح على شعري قالي يا هاملة تعيطي لابوليس راح تباصيني بقا يجر فيا من شعري وصاحبوا هز التلفون تاعي لقاه مفتوح شاف في ليزابال قال لصاحبو راهي صح كانت تهدر بالتلفون وباعثة ميساج ب localisation تاع الدار . طلقني طحت في الارض ضربني برجلوا على كرشي عيطت عيطة وحدة قالي نلقاك نلقاك وتخلصيها غالية بزاف اشفاي على وجهي مليح . خرج هو صاحبوا يجروا خافوا صح لا يلحقوا عليهم لابوليس . بقيت في الارض مطيشة كرشي راح تتقطع عليا من الضربة لي ضربهالي بصح المهم فاتت الحمد الله يا ربي. سمعت صوت جري في دروج عرفتهم وصلوا دخل عندي مسلم هو لول جا ديراكت عندي قالي جوليا راكي مليحة ياك معملولك والوا . درتلوا براسي لا وتحضنتوا نبكي كون مش هو راني رحت فيها . مسحلي على شعري قالي خلاص ما صرا والوا ما تخافيش فاتت سلامات الحمد لله . طلعت راسي لقيت اصيل واقف في الباب ويشوف معانا وليت بعدت على مسلم ، حكملي وجهي قالي ياك واحد ما قاسك . قتلوا لا .قالي الحمد الله هيا اوقفي نخرجوا من هنا . وقفت وانا حاكمة جنبي . وهداك يشوف معايا كون جا يقدر راهو قتلني . هزيت الفاست تاعي والصاك والتلفون وخرجنا . ركبنا في الطونوبيل اصيل كلمة ما نطقهاش غير مسلم لي يسقسي فيا حتى حكيتلوا كلش من لول لخر . قالي الحمد لله لي فاتت هكدا بصح مزلتي متفكرة إسموا يخلصها غالية كي مد يدو عليك . قتلوا لا منيش متفكرة . وصلنا للسبيطار لي حطوا فيه ماما باه دير العملية . نطق اصيل قال لمسلم اهبط .جيت راح نفتح الباب باه نهبط حتى انا قالي انتي احكمي بلاصتك . قالوا مسلم علاه .قالوا مدخلكش اهبط اقعد مع اختها راهي وحدها . قتلوا حابة نشوف ماما . قالي اغلقي فمك وانت اهبط وش راك تستنى .قالوا اصيل وش راح دير خلي الطفلة تهبط تشوف يماها من بعد ساهل ديجا شوف حالتها كيفاش . قالوا قتلك مدخلش روحك هيا اهبط . خفت منو تاع الصح هدا نبقى معاه وحدي أصلا وجهو وحدو يخوف حكمت في يد مسلم قتلو نروح معاك . غلق الباب على جيهة تاعي ستنى حتى هبط مسلم وديمارا ديراكت وانا جامدة في بلاصتي تهنيت من لي فاتوا طحت في هدا لي يخوف اكثر منهم ، شفت مع يدو وهو يسوق خممت ديراكت كون يضربني بيها قادر يقتلني نورمال . وصلني لدارنا قالي اهبطي بدلي الخماج لي راكي لابستوا ، هبطت حتى هو هبط ورايا كنت راح نقولوا علاه لاحقني بصح سكتت .فتحت الباب ودخلت دخل ورايا غلق الباب . قالي حبسي نهدر معاك . حبست قالي شوفي غير تفوت العملية تاع يماك منزيدش نشوف خليقتك ولا نسمع اسمك بيك بيماك بأختك و مسلم منزيدش نسمع بلي هدرتي معاه . شوكاني قتلوا مفمتش قالي كيما فهمتي ترجعي تنساي بلي عندك عايلة فهمتي اختك ديجا ماعلابالهاش ويماك ماعلابالهاش بلي تلاقيتي بينا يعني تغلقي فمك ماني حاب حتى واحد يسمع . بقيت ساكتة ، قدملي قالي فهمتيني وش راني نهدر ، نشريلكم دار في ولاية خلاف تروحوا تعيشوا فيها ونديرلكم شهرية كل شهر تكون بين يديكم . قتلوا علاه علاه راك حاب واحد ما يسمع . قالي مدخلكش ديري وش نقولك وتغلقي فمك . قتلوا بصح منيش حابة نروح من هنا . خنقني بيد وحدة قالي شوفي مش كي راني نساعف فيك وما حاسبتكش على الشي لي درتيه ليوم تطيري ، اسمك لي تمشي بيه هو اسمنا مش على عقاب عمري تجي فرخة كيفك تمرغ بأسمنا الارض ، راح تروحوا من هنا وعيني عليكم نسمع بيك درتي حاجة هكا ولا هكا الموس يمشي على رقبتك نقتلك وواحد ما يسال عليك فهمتي ، ومسلم تنسايه منزيدش نلقاك هدرتي معاه . بكيت قتلوا علاه راك دير هكدا . قالي انا منيش مسلم تفوتيها عليا بزوج دمعات فعايل #### راني قاريهم وحافظهم .
