وقفت من بلاصتي قتلوا راك تسحت فيا . قالي مدوريش الهدرة من راسك انا قتلك منحبش المشاكل هنا فهمتي ولا لا. قتلوا أصلا انا مارانيش قاعدتلكم هنا غدوة نرجع للاقامة . خليتوا وطلعت لشمبرة تاعي قعدت بقيت نستنى ونحسب حتى لعشرة علابالي دوك يجي يبدا يعيط . وصحا شوي ولقيتوا لحقني زدم ديراكت قالي وش قلتي ترجعي للاقامة وش هدرت انا مش قلت الاقامة تنسايها . قتلوا شوف انت لي سحتتني وين راح نروح انا كي منروحش نبقا في الاقامة. ضربني بصباعوا على جبهتي قالي مسحتكش قتلك متزيديش تديري معاهم المشاكل راكي انتي لي تبروفوكي فيهم باه يكرهوك ، غير مكان لاه تقوليلي خاطيني شفتك بعيني كيفاش طيحتي التلفون تاعها من الطابلة. قتلوا حتى هيا الصباح بقات ترمي عليا في الكلام. قالي وش قتلك قتلوا بقات تهدر قدام لبنات وقاتلي عينك في مسلم ولقاك اصيل عندو في الشمبرة في ليل وانتي مش مربية ،قتلوا شفتي قتلك مش راح ينساو لحكاية ويقعدوا يهدرو عليها ، وانت هو السبة . قالي دوك نهدر معاها هيا متزيد دور بيك وانتي متزيديش دوري بيها.
