ريان دارتلي سيروم وهو يهدر حاب يفهم وش صرالي مي انا كنت غير شاردة الضربة لي جاتني من اسمهان واعرة بزاف متوقعتهاش منها اختي هادي ديرلي هكدا مال البراني وش يدير ، كيفاش حتا قدرت تتفاهم معاه على راسي ، لازم نلقى حل منقدرش نخليه يستغلني كيما يحب وهيا حسابها معايا من بعد ، قعدو قعدوا كي ماداو منعندي لا حق لاباطل خرجو ، هما وانا رقدت مفطنت حتى للصباح نضت لقيت تلفون تاع اسمهان بقى مرمي في الارض من بارح عيطتلوا هز عليا يضحك قالي رجعلك عقلك . قتلوا من بعد نتلاقاو كيما قتلي لبارح . قالي ايه ارواحي لداركم لقديمة تلقايني نستنى فيك . كوبيت وقعدت نخمم في حياتي كيفاش راهي ماشية بالمقلوب حاسة ربي يعاقب فيا على غلطة لي دارتها ماما نتاجاتي اكبر هم عندهم كيفاش يخرجو وش يلبسو وانا حاسة روحي كبرت عشر سنين قبل عمري . شفت مع روحي في المراية وجهي مندوب لي طراس تاع ظوافري في خدي . دخلت للدوش غسلت وجهي حرقني بدلت حوايجي لازم نخرج قبل ما يشوفوني لبست سروال و تريكو هزيت معايا لاليم تاع الظوافر حطيتو في جيب السروال ومقص صغير تاع الحواجب حطيتو في صدري . وهبطت بالعقل في الدروج ندعي في ربي واحد ما يفيقلي من زهري لقيتهم كامل متلمين في الصالة خرجت ديراكت حكمت تكسي ديراكت لدارنا لقديمة خمس دقائق وصلت لقيتو في الدرجة يستنى فيا . قدمت عندو قتلوا هيا قول وش تحتاج خليني رايحة قالي افتحي الباب ندخلوا نحكو لداخل . قتلوا معنديش المفتاح . قالي بلا كدب جوليا هيا افتحي ولا راح تندمي . وليت جبدت المفتاح من الجيب فتحت دخلت ودخل ورايا بقيت واقفة بحدا الباب . قالي قدمي عندي علاه راكي خايفة مني . محبيتش ولي جبد من جيبو صاشي صغيرة ترونسبارو فيها حبات تاع دوا جاييين حمر وبيض . قالي هاكي هادو المرة هادي كادو من عندي المرة الجاية نحتاج حقهم . قتلوا احكم خماجك عندك منحتاجش . ضحك قالي على من راكي تكدبي جوليا عليا ولا على روحك ، راكي مونك من هنا ليل كون متشربيش وحدة عقلك يضيع ويفيقو بيك كامل بلي انتي وحدة متسوايش وتكنسومي capable يرموك في كاش سبيطار باينة مش راح يخلوك في وسطهم . قتلوا انت رخيس وكلب دوك نروح نشكي بيك وخلي لي يصرا يصرا مستحيل نخليك تستغلني كيف ما حبيت نقولهم كلشي . خنقني من رقبتي جيفني قالي زعما راح تخوفيني روحي اشكي ، اختك راهي معايا شركة وانت فطواتك من غدوة يكونوا في لي ريزو صوسيو كل لي يسوا ولي ما يسواش راح يتفرج عليك وانتي بين يديا نقلب فيك كيما نبغي ديري عقلك في راسك كون تشكي بيا نروحوا فيها في ثلاثة مش غير انا . قتلوا انت مش راجل قالي اممم علابالي عمري جيبي الجديد لي مش راجل هدا راح تولي كلبة عندو . من الغش جبدت لاليم و ضربتو بيها في يدو جبد عليا يسب ويكفر قالي تندمي عليها ادا مخليتيكش تجي تحاولي فيا منيش علي اشفاي رمالي الصاشي في وجهي وخرج . قعدت في الارض نخمم يا ربي سلكني منو كون نقول بلي مكنتش خايفة منو نكون نكدب كنت نرجف خفت بزاف ومعرفتش روحي حتى كيفاش جاني الكوراج و ضربتو . لميت روحي ووقفت هزيت الصاشي هديك دسيتها في صدري وخرجت روحت للدار غير دخلت لقيت الدنيا مقلوبة قابلني خالي وحيد اول مرة من لي عرفتو يرغي فيا كيما ليوم قالي وين كنتي جوليا كيفاش تخرجي وما تقوليلناش مراكيش عايشة وحدك هنا كل مرة نقول صغيرة مي هاد المرة صاي بزاف مراناش ناقصين مشاكل اوزني تصرفاتك مراحش نبقاو لاهيين غير بيك . نطق اصيل قالوا خلاص بابا وش كنت نهدر من قبيل . القنطة حكمتني قتلوا معليش خالي كيما تحب. طلعت لفوق مع دخلت لشمبرة لقيتوا لحقني. قالي وين كنتي قتلوا في دارنا لقديمة قالي علاه مقلتليش بلي راكي رايحة. قتلو ياك مارانيش محبوسة هنا حبيت نروح و روحت . قالي مقتلكش بلي راكي محبوسة كون قلتيلي راني وصلتك انا. قتلوا وانا كنت حابة نروح وحدي . قالي صحا معليش. كان هاز صاشي قالي هاكي دواك. قتلوا تاع واش قالي مهدئات اشربي منهم هاد السمانة . حطهم فوق الكوافاز وراح قعد فوق السرير قالي مش راح تحكيلي وش صرى حتى درتي هكدا لبارح قتلوا معلاباليش نفحتلي في راسي ندير هكاك ودرت هدا ماكان.
