بعد ما سمعت وش كانوا يهدروا بقيت مشوكية هادوا يهدروا عليا ولا على شكون رجعت للبيرو بعد ما روحت للطوالات وبقيت نخمم في وش سمعت كيفاش نعرف ادا كانوا يهدروا عليا ولالا ، حتى تفكرت كي قالوا خرجها وابعثها لدارهم يعني ادا جا هداك البوليسي وخرجني نعرفها بلي كانوا يهدروا عليا وبلي هدوك ولاد خالي و الواقع المر بلي هما أصلا مش قابلين اي علاقة بينا سيرتوا هداك لي إسموا اصيل. بقيت نستنى حتى جا هداك البوليسي قالي طولت عليك. قتلوا لا . قالي اسمحيلي كنت مديرونجي المهم وقتاه تجي اختك .قتلوا شوي وتجي . قالي معليش ما بين ما جات اختك نكمل نريقلك لوراقي تاعك وتخرجي . قتلوا صح قالي ايه انا نكمل نفرزلك لحكاية. غير قالي هكدا تأكدت بلي هو ولد خالي . قتلوا مرسي . قالي بلا مزية . بصح غاضتني بزاف حنا عايشين في الهم وهما معلابالهمش بينا وحتى هداك كي عرف مقبلناش ونكرنا . بقيت نستنى في اسمهان وهو يهدر معايا نرجع عليه كلمة ونقص الهدرة كي شافني منيش حابة نهدر سكت . شوي وجات اسمهان دخلت للبيرو قاتلي جوليا راكي مليحة تحضنتي قاتلي خفت عليك بزاف خلعتيني .قتلها راني مليحة متخافيش . قاتلي غير يطلع الضو نديرلك محامي متقعديش نهار هنا في هاد البلاصة . نطق البوليسي قالها خلاص راني فريت الحكاية يوصل الصباح وتخرج اختك . شكراتوا اختي وقعدت معايا وهو عاود خرج قاتلي شكون هدا مين تعرفيه كيفاش حتى فرزلك الحكاية . قتلها منعرفوش هو وحدوا حب يعاوني . قاتلي منعرف علاه راني حساتك مخبية عليا حاجة بصح تعيا وتبان . قتلها متبدايش اسمهان خليني في حالي لي فيا يكفيني . قاتلي من بعد نزيدوا نتفاهموا على المشكلة لي درتيها هدا كل جراير صحابك المافيا قتلك راهم يجيبولك المشاكل. بقيت ساكتة مصمطتها حتى وصلت الستة تاع الصباح عاود رجع . قتلوا نقدرو نروحوا قالي ايه تقدري دوك نقول لواحد يوصلكم . قاتلو اسمهان يعطيك الصحة تعبناك معانا قالها بلا مزية كي مشينا باه نخرجوا حبسني عطاني كارت فيزيت تاعوا قالي ادا سحقيتي حاجة عيطيلي هدا النميرو تاعي ولا ارواحي هنا تلقايني حتى ادا ملقيتينيش تلقاي صحابي هنا اوكي . حكمت عليه النميرو وانا غصة في قلبي قتلوا ايه معليش .خرجت من عندوا واسمهان عقابي حابة تفهم علاه عطاني النميرو تاعوا بقيت ساكتة غير هي لي تهدر وحدها وصلنا للدار . لقينا ماما مزالت راقدة دخلت عندها عنقتها ورقدت وانا نخمم في الحكاية لي صراتلي حتى غفيت فقت على الوحدة لقيت واحد ما كاين في دار ماما تخدم واسمهان تقرى ، صبيت حليب شربت وانا نخمم ادا نحكي لماما ولا لا . تفكرت كارت فيزيت تاعو هزيتها قريت الاسم مكتوب مسلم وش الاسم هدا غريب اكثر من مولاه ومكتوب النميرو تاعوا كنت راح نرميه من بعد عاودت خبيتوا قادر نحتاجوا .في العشية روحت ماما من خدمة دخلت ديراكت رقدت وهادي مش عادتها ، دخلت عندها عنقتها قتلها ماما لاباس . قاتلي لباس العزيزة تاعي قتلها علاه راكي راقدة قاتلى راني تعبانة برك هدا ما كان . قتلها ملا كملي ارقدي حتى نطيبلك عشا الله الله نحي عليك التعب . قاتلي صحيتي بنتي . خرجت وخليتها رجعت رقدت. طيبت العشا كي جات اسمهان حطيتوا باه نتعشاو ورجعت للشمبرة تاع ماما نوضتها محبتش تنوض بقيت نوض فيها هيا والوا تقول عليها جثة دموعي هبطوا وبقيت نحرك فيها وانا خايفة وليت نعيط على اسمهان ونقولها اسمهان اجريلي ماما ماتت . تخلعت جات تجري عندي بقات تفيق فيها قاتلي متخافيش راهي دايخة طلعتلها لاطنسيو برك روحي جيبيلي الثوم والبصل .جبتلها وش قاتلي وبقينا معاها حتى فاقت . حبينا ندوها للسبيطار قالتلنا لا منروحش راني غيرمن تعب برك دخت . الغدوة الصباح نضت لقيتها راحت تخدم ،عيطتلها قتلها علاه روحتي للخدمة وانتي مريضة . قاتلي راني لاباس تنحى عليا التعب وصبحت مليحة .قتلها تهلاي في روحك متعبيش روحك بزاف .قاتلي صحيتي بنتي . كوبيت ولبست قشي روحت نقرى . فاتوا سمانتين نفس الروتين حتى نهار في الليل كنت راقدة نسمع في صوت حاجة طاحت في الارض نضت مخلوعة من النوم جات ديراكت ماما في بالي نضت نجري بالحفا جيت راح ندخل الكوزينة نلقاها طايحة مغاشية في الارض . بصح المرة هادي على قد ما حاولنا معاها باه تفطن مافاقتش ولينا عيطنا على جارنا عندو طونوبيل عاونا هزيناها وديناها للسبيطار وحنا بالبيجامات ما رانا جايبين خبر لحتى حاجة غير الخلعة لي في قلوبنا بالنسبة لينا ماما هي كلشي الا صراتلها حاجة راح نلقاو روحنا وحدنا واحد لا سامع بينا تروح علينا ماما نضيعوا صح ساعات نلومها ونقولها. انتي السبة بصح تقدم ماما هي لي نقدر نضعف قدامها ونتحاما بيها . وصلنا للسبيطار وحنا نتباكاو دخلوها ديراكت للبلوك . بقينا قاعدين بحدا الباب معنقين بعضانا ونبكيو خايفين وحدنا واحد لا راه معانا حتى جارنا لي وصلنا قعد شوية وراح . خرج الطبيب قالنا لازم تجيبولي دوا هدا ومطولوش رجع دخل . بقينا حنا نقلبوا في ريسانا معندنا حتى دورو كلش خليناه في الدار ، حتى صوارد لي عندنا في دار مش بزاف ميكفوش . كانت الربعة تاع الصباح قلت لاسمهان دوك نروح للدار نجيب الصوارد نشروا بيهم الدوا لي خص وغير يطلع الصباح نبيع الخاتم تاع الدهب ونكملوا لي بقا . قاتلي انا لي نروح نخاف في هاد الليل كشما واحد يتبعك . راحت للدار مطولتش بزاف بدلت حوايجها و شرات الدوا وجات . عطينا هداك الدوا للطبيب وبقينا نستناو هوما محبوا يقولنا والوا غير داخلين خارجين وحالة تاع سبيطار الدولة من نجيو نسقسوهم ينوضوا يشنفوا وما يقولوا والوا . حتى وصلت العشرة تاع الصباح . قاتلي اسمهان روحي بدلي حوايج وبيعي الخواتم وارجعي . حكمت تكسي روحت للدار بدلت قشي بالخف وهبطت عند الصايغي بعت لخواتم تاع الدهب تاعي انا واسمهان كانت شراتهم ماما قالتنا شي نهار نحتاجوهم . عاودت حكمت تكسي ورجعت للسبيطار مع دخلت قابلتني اسمهان تبكي والطبيب يقولها معليش وكاين امل .انا غير سمعت هكدا قلبي طاح في الارض قتلها اسمهان علاه راكي تبكي وش كاين وشبيها ماما. قاتلي وهي تبكي ماما راح تموت راح تموت . قتلها وش راكي تقولي انتي . قالي الطبيب يماكم لازمها عملية ارجوا على راسها . قتلوا ايه ديرها وش راك تستنى راك تستنى فيها حتى تموت . تبسم حسيتوا ضحك عليا .قالي العملية تندار في كلينيك بريفي وتسقام 159 مليون . غير سمعت سومتها دخت من راح نجيبو حنا هاد الصوارد كاملين نبيعوا رواحنا ومانجيبوهمش . شعلت فيه قتلوا علاه ما ديرهاش انت هنا ياك انت طبيب .قالي معندناش الموهلات والمستلزمات باه نديرها هنا لازم كلينيك بريفي .قتلوا يسموكم طبة في الباطل ما فيكم حتى فايدة شاطرين غير تفوخوا علينا بالطابلية .قالي احترمي روحك .قتلوا منحترمش وش راح تعمل . جبدتني اسمهان من يدي قاتلي جيجي يزي بلا تبهدايل لي فينا يكفينا مش ناقصين مشاكل . خزرت فيها قلتلها من راح نجيبو حق العملية حصلنا . قاتلي ياربي من جاتنا هاد الموصيبة وش راح نعملوا .
