بعد ما شريت لاكرام رجعت داخل عند لبنات شافت فيا ريمة قاتلي جوليا شكون هداك لي كان يهدر معاك من كنتي تشري قتلها يقرى معايا برك وكي شافني جا هدر معايا هما قعدوا ياكلوا وانا سماطتلي حكمني تأنيب الضمير من هدرتوا وزيد وسوسني خفت لا كشما يقول ولا كشما يديرلي حبيت غير نروح غير كملوا لبنات قتلهم نروحوا برك انا عييت رقبتي وجعتني . قالولي ايه عيطنا لأصيل باه يجي يروحنا . شوي وجا ركبنا حنا من لور وريمة قداموا . قالنا واش حوستوا مليح قاتلوا ريمة وي روعة شرينا كلشي وزيد تحويسة مع جوليا تهبل نعود ديمة نخرج معاها . شاف معايا في التروفيزار قالي وشبيك ساكتة انتي ، كشما صرى . قتلوا لا والوا جيست عييت برك حابة نروح رقبتي وجعتني . قالي معليش دوك شوي ونوصلوا للدار . وصلنا للدار هما دخلوا للصالة قعدوا يتحاكاو على وش درنا وانا قتلهم نطلع نريح شوي في الشمبرة تعبت . طلعت بدلت وتكسلت في سريري نخمم في هدرتوا خوفني قلبي حاسني راح يدير حاجة ياربي كل ما نقول بلي تڨدتلي ليوم وزهاتلي دنيا تخرجلي حاجة تفسد عليا مفهمتش من تفكرني بعد هاد الوقت كامل ، مكانش حاجة ندمت عليها اكثر من اني ستغليتو وهو كان معايا بنيتوا . وصل وقت العشاء هبطت لقيتهم قاع متلميين جيت حدا مسلم وقعدت هداك غير يشوف ويميز نحسو يغزل كي يشوفني مع مسلم مفهمتش علاه . حطلي مسلم لي سكالوب في صحني وقالي مراكيش عاجبتني ليوم وشبيك غير ساكتة الصباح كنتي نورمال . قتلوا والوا عيينا بزاف ليوم . قالي راكي سير . قتلوا والله وزيد قلقني هدا لي في رقبتي حاسة واحد خانقني . قالي مالا وش نقول انا لي راح نبقا نص عام وانا رافد يدي لا خدمة لا صدمة . حطيت يدي على كتفو نواسي فيه علابالي مسكين قلقان من حالتوا . قتلوا معليش بالخف يفوت الوقت وترجع لخدمتك . ضحك معايا قالي حتى دمك مانفعنيش باه نبرا بالخف . ضحكت معاه وكملنا حكايات فات العشا انا طلعت لشمبرة وخليتهم رايحين يسهروا ، بصح انا تعبانة حبيت نرقد . رقدت شوي فطنت على واحد ينوض فيا فتحت عينيا لقيتوا اصيل عاودت تقلبت ورجعت نرقد . بقا يحرك فيا قالي نوضي تشوفي نهدر معاك . فطنت قتلوا يا عبد ربي جاتك الهدرة غير في ليل خليني نرقد . قالي نهدر معاك وارجعي ارقدي على روحك .شفت معاه قتلوا أهدر اسيدي اني نسمع. قالي شوفي راهم بعتولي على خدمة في ولاية بعيدة شوي وقادر نطول ما نجيش عندك لا كشما ديري في غيابي نسمع عليك كلمة نعدمك . عدلت روحي قتلوا وين رايح قالي راني قتلك خدمة في ولاية بعيدة . قتلوا شحال راح تبقى راح طول بزاف . قالي والله جوسيبا شحال راح نبقى بالاك شهر بالاك ثلاثة على حساب الخدمة لي عندي . سكتت قالي كيما وصيتك الخرجة وحدك ممنوع ادا على القراية يوصلك واحد من الولاد راني موصيهم وبلا مشاكل كي تحتاجي حاجة قولي لمسلم هو يفريهالك .. شفت معاه قتلوا لازم تروح ، علاه ميبعتوش واحد آخر في بلاصتك . تبسم قالي انا قلت دوك تفرحي كي راح تتهناي مني . قتلوا علاه نفرح شكون عندي من غيرك انا . مسحلي عل شعري قالي المهم هاكي هادو . شفت في يدو مفتاح قتلوا تاع واش هدا قالي تاع الكوفر لي في الشمبرة وقت ما تحتاجي دراهم اجبدي قد ما تحبي لبغا تجبديهم كامل بصح ما تطلبي حتى واحد ياك ما تمدي يدك وما تقبضي دراهم من حتى عبد يا لوكان بابا فهمتي . قدمت عنقتو قتلوا تعيش متروحش منيش باغية تروح وتخليني وحدي هنا والفتك ديما معايا . قالي جوليا لازم الخدمة خدمة بصح انتي ريحيلي قلبي من جيهتك برك اسمعي كلامي ما ديري حتى حاجة بلا علمي والخرجة وحدك ممنوع راني نوصي ونعاود ، راني وصيت يما عليك واحد ما يدور بيك هنا . هزيتلوا براسي ايه وعاودت عنقتو قتلوا راح نتوحشك والله . قالي مام انا شوفي في اي وقت عيطي راني نهز عليك لوكان مهزيتش راني نعاودلك في اقرب فرصة و كيما قتلك مسلم هنا في بلاصتي تحتاجي حاجة ولا واحد قلقك قوليلو ياك . قتلوا ايه وقتاه تروح . قالي واحد ساعة ونقلع . قتلوا اففف دموعي هبطوا وحدهم . قدم باسني على خدودي بحنانة قالي تهلاي في روحك . قتلوا مام انت تهلى في روحك وكي نعيطلك ارفد عليا . وقف قالي هيا نخليك كملي رقادك . هو خرج وانا حكمتني الكآبة بقيت نستنى حتى فاتت ساعة نسمع في هدرة تاع مرت خالي ومسلم واصيل عرفتوا رايح لبست بليغتي وخرجت لقيتهم تحت يودعوا فيه حتى وصلت داتلي قدمت عنقتو وهو بشبشلي شعري وقال ليماه يما كيما وصيتك قاتلوا روح متهني ولدي. هو خرج وحنا كل واحد رجع لشمبرتوا .
