غير شربتها رقدت ولا لصقت كيما يقولوا للصباح متقلبتش معلابالي بوالوا مع نضت تفكرت اصيل قالي الصباح نروح شفت الساعة لقيتها زوج تاع النهار اوووو تقول كنت ميتة نضت نجري للشمبرة تاعو فتحتها مكانش.هبطت عند مرت خالي سقسيتها قاتلي راح الصباح زعما جا ليك للشمبرة ينوضك قبل ما يروح بصح قالي بلي محبيتش تنوضيلو . عاودت طلعت للشمبرة فشلانة دخلت لقيتو حاط المفتاح تاع الكوفر تاع فوق الكوافاز . وليت هزيت التلفون عيطتلوا يصوني ميهزش باين يخدم . وليت دخلت للدوش غسلت وبدلت خرج لقيتو عاودلي . هزيت عليه كان معيطلي واتساب فيديو مع هزيت قالي صحا النوم يا فنيانة قتلوا علاش رحت قبل ما نشوفك قالي ونبقا نستنى فيك حتى تنوضي على زوج تاع النهار وقيلا نخدم في رزق بابا ديجا جيت نوضتك ومحبيتيش . قتلوا ما فقتش بيك قالي لقيتك راقدة تقول ماكلة لا دروق ريوقك يسيلو. غير قالي هكدا قلبي ضرب في الألف غميتها بضحكة قتلوا كنت حابة نودعك قبل ما تروح قالي معليش بالاك منطولش ونولي المهم انا ودعتك ، راني خليتك المفتاح قتلوا علابالي شفتو قالي كيما تفاهمنا جوليا. تنهدت بحرقة في قلبي و قتلوا ان شاء الله قالي متخمميش بزاف غير نرجع نديك معايا زدت حكيت معاه شوي كوبا . فاتو ليام منيش حابة نقولها بصح انا وليت مدمنة مع الاسف يوم بعد يوم وانا نكونسومي في هداك الدوا لي عطاهولي ، بكل استسلام كنت كل عشية لازم نشرب وحدة يمكن على خاطر انا لقيت راحتي بيه غير نشربو ننسى كلشي نتلاقا بماما .ايه كنت كل ما نشربهم نشوف ماما نهدر معاها نحس روحي طايرة في السما مكانش لي يقلقني ولا يطيحلي مورالي ، تسقسوني على اصيل كل يوم يعيطلي نحكيو شوي ويكوبي معندوش الوقت حاصل مع الخدمة يعيط غير يطمن عليا برك ، ريان كل ثلاث ايام تجي عندي تبقى تهدر تهدر وتروح . وليت ديما وحدي من شمبرتي منخرجش غير للماكلة برك صحتي نقصت وليت ديما شاردة نخمم علابالي بروحي رايحة للهاوية معندهاش نهاية . فاتو عشرين يوم فضلي وش كنت نشرب لازم نروح نجيب من عندو حتى هو كان يحسبلي فيهم غير وصلت عشرين يوم عيطلي قالي غدوة نتلاقاو لعشية كيف المرة لي فاتت بصح المرة هادي مش باطل منيش نخدم عليك نحتاج حقهم وحق لي فاتو . بكل خضوع قتلوا ايه وشحال حقهم . قالي حبة على 500الف وانتي احسبي نحتاج كاش وعلى مرة وحدة ومعاهم بونيس كي تجي راكي تمدهولي . في العشية قلت لوسيم ادا تقدر تديني لدارنا لقديمة بغيت نفرزها . قالي معليش نديك بصح روحي قولي لعمي (على خالي وحيد ) هبطت للبيرو تاعو دقدقت ودخلت لقيتوا يهدر بالتلفون ويدابز ما شفنيش سمعتو يقول في التلفون ماعندك حتى حاجة عندي ودير لي تقدر عليه . كوبا مع دور شافني وجهو هرب منو لون قالي جوليا وقتاه جيتي قتلوا درك وين دخلت ، حسيتو تنهد براحة قالي كشما سحقيتي خالو قتلوا والوا جيست حبيت نروح لدارنا لقديمة توحشت . قالي معليش بنتي قولي لوسيم يروح معاك قتلوا ايه هو لي راح يوصلني . خرجت من عندو وطلعت لشمبرة اصيل فتحتها وفتحت لخزانة لكوفر تاع دراهمو حاطو فيها عندي المفتاح خلهولي قبل ما يروح للخدمة . فتحتها وانا مترددة خايفة هزيت عشر ملاين خبيتهم تحت تريكو وقفلت كلش كيما كان وخرجت لقيت وسيم يستنى فيا تحت خرجنا وصلني قتلوا روح على روحك انا راني راح نطول راح نسيق ونطوي القش منعطلكش معايا روح من بعد نعيطلك ارجعلي قالي معليش.هو خرج وانا بقيت نستنى في عليلو شوي وجا يدقدق فتحتلو. دخل غير شافني دنى ليا باغي يسلم عليا بعدت قتلوا يالله اعطيني صوالحي وادي صوالح واخرج قالي ماشي بساهل هكدا . قتلوا وش تحوس اكثر ادا على الدراهم جبدتهم ورميتهملوا على وجهو قتلوا هاك واكثر من حقك اشبع بيهم . رجع يقربلي وانا نبعد ضحك قالي والبونيس . قتلوا وش من بونيس .قالي انتي البونيس نحتاج حقي منك . قتلوا مافهمتش وش قصدك. قالي قصدي متعيني فهمتي دوك .
