غير طلع الصباح لبست قشي وهبطت تحت عندهم لقيتهم نصهم مازالوا ما ناضوش بصح كاين هدرة في كوزينة . دخلت لقيت لبنات معاهم مرت خالي لكبير. غير شافتني قاتلي صباح الخير جوليا ادخلي اقعدي . قتلها صباح النور وقعدت على الكرسي . بقيت قاعدة ساكتة نسمع في هدرتهم فهمت بلي عصام متزوج مع هديك صوفيا ومروان متزوج مع قمرة ومتزوجين بعد قصة حب كبيرة وعايشين حتى هما هنا في الدار. وصلت الثمنية تاع الصباح حطو الفطور في الطابلة وقعدوا قاع يشربوا في قهوتهم. قتلوا خالي راني حابة نروح عند ماما .قالي معليش ورا الفطور دوك يوصلكم واحد من الذراري . كملنا الفطور وقف وسيم كان رايح الجامعة يقرا قالي هيا نوصلكم في طريقي . نطق اصيل قالوا روح شوف قرايتك يروح عليك الحال دوك انا نوصلهم في طريقي .قالوا معليش وخرج .لي روماركيتوا من لي جيت عندهم انهم ڨاع يسمعوا لكلاموا وڨاع يقولوا خويا مفهمتش زعما يقدروه كي عاد هو لي كبير فيهم ولا يخافوا منو. وقف شاف مع اسمهان وقالنا هيا .وانا مخزرش فيا كشغل انا مشتاقة لوجهوا أصلا وجهوا يقطع الرزق مع صباح ربي هزيت ساكي وخرجنا انا واسمهان لقيناه يستنا فينا في الطونوبيل ركبت اسمهان بجنبوا وانا ركبت لور . طريق كامل وهما يحكيو يعني اسمهان لي تجبد معاه في الهدرة. وانا ساكتة نتفرج من التاقة منيش حاملة حتى نلمح وجهوا بعد الرعب تاع لبارح كل ما تفكر كيفاش دخل للشمبرة وقاعد على راحتوا لحمي يفور عليا هدا ما يخاف ما يحشم . بعد ما وصلنا وراح . مشينا انا واسمهان طالعين عند ماما قاتلي جيجي كشما صرا بينك وبين اصيل حتى راه هازك في خشموا هكدا . قتلها ما صرا والوا هو لي منعرف عليه ماراهش حاملني . قاتلي منعرف تبان صرات بيناتكم حاجة .قتلها وش راح يكون بيناتنا راني قتلك مراهش حاملني كيما قاع لي في هديك الدار ماراهمش حامليني وراكي تعرفي وشنو السبة بلا ما نزيد نقولك . قاتلي الله يسهل عليهم يحملوا ولا مايحملوش هديك دارنا كيما هما وراح نعيشوا في رزقنا . وصلنا عند ماما لقيناها قاعدة قعدنا معاها بقينا نحكيو حتى جبدتلها على موضوع تاع الاقامة . قاتلي طيح السما على الارض متروحيش . قتلها انا قررت هادي حياتي . قاتلي والله ما نرضى عليك لا دنيا لا اخره ما صبت لقيت بلاصة قلبي يطمن عليكم فيها وانتي مزالكي حابة تروحي تهملي في الغربة . بقيت نحاول فيها قتلها خليني مرة نقرر حاجة انا حابتها انا راني حابة نروح لبلاصة واحد ما يعرفني فيها حابة نبعد من هنا . قاتلي بصح .قتلها والله نوعدك ما ندير حتى حاجة راح نقرى وكل عطلة نجي عندك . قاتلي بصح قلبي ميطمنش عليك وانتي بعيدة عليا نعرفك طايشة ومخك طاير من راسك علابالي راح تحصلي روحك في كاش حاجة راكي انتي ممو عينيا تصرالك حاجة نموت والله . قتلها والله ندير عقلي ومايصرا والوا متخافيش عليا وزيد راني اقامة في جامعة يعني ما عندي وين نروح من القراية الاقامة حتى صحابي قاع هنا يعني راح نروح وحدي باه تطمني اكثر. تنهدت قاتلي ادا راكي حابة منوقفش في طريقك بصح اوعديني تحافظي على روحك .قتلها وعد كوني متهنية . رجعنا للدار لقينا مسلم قالي صاي راني لقيتلك جامعة فيها التخصص لي راكي حابتوا من السمانة الجاية تقدري تبداي يعني ما بيد ما دفعتي الدوسي تاعك وطمنتي على عمتي اكثر . قتلوا ربي يخليك ليا ديما توقف معايا . قالي راني قتلك راكي في مقام اختي يعني في أي حاجة تلقايني في كتافك . وصح فاتت هديك السمانة تطمنت على ماما اكثر رتاحت بزاف على بكري ودفعت الدوسي وقبلوني . صباح لي راح نروح فيه نضت بكري وجدت الفاليزات تاعي وهبطت لقيتهم كيف العادة قاع فوق الطابلة يشربوا في قهوتهم قعدت فطرت معاهم كملنا قلت لخالي مسلم مراهش هنا يوصلني قالي مسلم عندو خدمة دوك يوصلك اصيل . قتلوا معليش . نطق خالي قالي شوفي ادا معجبتكش الحالة لهيك قوليلي من غدوة نرجعك هنا . قتلوا علابالي . سلمت عليه وخرجت لقيتوا راكب في الطونوبيل تاعوا يستنى . غير وصلت فتحلي حطيت حوايجي وركبت لور شاف معايا في الطروفيزور قالي شوفار تاعك وقيلا اركبي لقدام منيش نخدم عندك .محبيتش ناقشوا هبطت ركبت بجنبوا. ديمارا يسوق حط غنيا يغني معاها وانا غير ساكتة نستنى غير وقتاه نوصل . صونا تلفوني حكيت شوي مع صحبتي رؤيا وزيد حكيت مع ماما ومزال ما وصلنا مليت من نفس القعدة وهو صدعني بالغنا . شاف معايا قالي بالاك تحطي في عقلك بلي كي راكي بعيدة راح تلقاي راحتك ، عيني ووذني عليك نسمع عليك كلمة ندفنك في بلاصتك . مقيمتوش أصلا بقيت ساكتة خليتوا يهدر كيما بغا.
شوي ووصلنا دخلنا للاسيتي لي راح نقعد فيها حبس هبطت بقيت نشوف مع الحالة باين كلشي بسيكيريتي يعني دنيا آمنة . حتى هو راح يحكي مع العساس عطالو لمفاتح تاع الشمبرة وانا خرجت فاليزة تاعي وطلعت خاطر شمبرتي في تروازيام . شوي ولحقني دخلت شفتها شومبرة نورمال كيما قاع الاقامات تاع دزاير الحاجة لي مليحة انو نظيفة مصبوغة وواجد فيها كلشي سرير وفراش . نطق قالي عجباتك . شفت معاه درتلوا براسي ايه وسكتت . عاود خرج شوي ورجع في يدو حوايج بقا يبدللي في المفتاح تاع الباب. حتى كمل عطالي المفتاح قالي هدا المفتاح يبقى ديما في يدك ما تمديه لحتى واحد وادا ملقيتهش ولا تبحرلك قوليلي وانا ندبر راسي . حبيت نقولوا علاه راك دخل في روحك من بعد سكتت منيش حابة تكسار الراس معاه. قالي اكتبي النميرو تاعي عندك كي تحتاجي حاجة ولا تصرا حاجة عيطي ديراكت . قتلوا خلي برك راه عندي نميرو تاع مسلم . حكمني على ذقني قالي وانا قلت تعيطي عندي مش عند مسلم تفاهمنا درتلوا براسي ايه . جبد دراهم من جيب تاعو حطهم فوق السرير. قالي هادو خليهم عندك راح تحتاجيهم. قتلوا خلي ما . شاف معايا بشوفة سكتني قالي انتي جيتي هنا باه تقراي حطي هاد الشي منڨوشة في وذنك عيني عليك نسمع عليك حاجة متسلكيش من يدي تخلصي لقديم والجديد.
من وراها هو راح وانا بقيت نفرز في الشمبرة حطيت كلشي في بلاصتوا كملت قعدت في سريري نخمم هكدا فضتلي وحدي منفية في ولاية منعرف فيها حتى واحد وانا لي كنت حاطة في بالي بلي صاي لقيت عائلة وراح نعيش في وسطهم كيما ڨاع الناس بصح الظاهر ربي مكتبلي ديما نبقى وحدي منبوذة من ڨاع الناس نخلص في ذنب معندي حتى دخل فيه . غير طاح الليل طاحت الوحدة والغربة والخوف من بلاصتي متحركتش بكيت مخي راسي . صونا تلفوني. لقيتها اسمهان حكيت معاها هي وماما كملت كوبيت ورجعت لدموعي . عاود صونا تلفوني هزيت ديراكت في بالي اسمهان لي عاودتلي. قلت الو . سمعوا قالي علاه مهبطيش تتعشاي . عرفتوا من صوتوا بلي هو بصح شكون لي قالوا بلي متعشيتش . قتلوا وين علابالك انت . قالي راني قتلك عيني ووذني عليك يعني اخبارك ڨاع يوصلوني ، قولي علاه متعشيتيش . قتلوا معينيش شبعانة .قالي اهبطي لتحت دوك تجي طفلة تعطيك الماكلة تعشاي فهمتي .اففف دورك هدا وش دخلوا في جدي نتعشا ولالا. قالي هيا اهبطي الطفلة راهي تستنى فيك .كوبيت ولبست بنتوفتي وهبطت بالبيجامة لقيت وحدة واقفة وين الباب تاع pavillon عرفتها هيا خاطر هازة صاشي فيها الماكلة حكمتها عليها قتلها مرسي قاتلي بلا مزية حنونة اي حاجة تسحقيها راني هنا راني غير في pavillon لي مقابلة شومبرة 60.
