وصلنا الحديقة فيها كراسة مقابلة لبحر قالي اهبطي راح نتلاقاو هنا ، هبطت حكمنا بلاصة قريبة للبحر وقعدنا مقابلين بعضنا . انا دورت راسي نتفرج على البحر ما بين ما جات رسام. دورت على غفلة لقيتوا يشوف معايا قالي فواش راكي تخممي هكددا من قبيل وانا نهدر معاك مسمعتينيش. قتلوا والوا منيش نخمم جيست مسمعتكش برك . قالي وشبيك جوليا بين لبارح وليوم دبلتي علاه ، قاتلي يما لبارح في ليل مقدرتيش ترقدي . قتلوا مكان والوا . منعرف وش كان راح يهدر بصح سكت كي شاف ريان جات وقفنا سلمنا عليها وقعدت بجنبي مقابلاتوا قاتلي وش راكي جوليا لباس. قتلها الحمد الله . قاتنا اسمحولي علابالي طولت عليكم شوي بصح شدوني في الخدمة بسيف باه خرجت قتلها نورمال مام حنا معدناش بزاف من لي وصلنا . تبسمت قاتلي مليح ، كاسكات تاع اصيل جاتك بزاف شابة . تبسمت معاها وسكتت وقلت في قلبي هادي طفلة متغيرش خلاص ولا مش حاسبتني من صنف لبنات كون انا حبيبي مد لوحدة كسكاتو ولبستها نقصلها راسها حيرتني فيها قلبها قلاصو . شافت مع اصيل وضحكت قاتلوا صيبو انت هنا فضت المهمة تاعك جبتلي صحبتي تقدر تروح . ضحك حتى هو قالها هكا مالا قاتلوا وي هكا عندي حكايات تاع بنات راح نحكيوهم انا وجوليا مش هكا جوليا انا تبسمت برك . قالها اوكي مالا انا نروح راني خليتهالك امانة منبعد كي تكملوا راني نجي نديها . دارتلوا براسها ايه قاتلوا متهني كي نكملوا قعدتنا راني نعيطلك . شاف معايا قالي تهلاي في روحك وراح . تنهدت هيا قاتلي نقعدوا براحتنا خير . ضحكت قتلها بصحك قولتيلوا روح قاتلي واش وقيلا ما بغيتيش عليه . درتلها براسي ايه ضحكت قاتلي ميزعفش مني متخافيش اصيل يعرف عقليتي قاتلي ايه احكيلي ازرع ينبت راني نشوف فيك مكيش في حوالك ليوم غير الخير متقوليليش الحب والعشق لي دار فيك هكدا وبايتة تبكي عليه . قتلها لا وش من حب راكي تحكي ، انا وين وانتي وين . قاتلي مالا وشبيكي حالتك هكا ، احكيلي ياك رانا صحبات حتا اصيل ليكيديتو علينا غير باه تحكي براحتك قتلها والله انا و منيش عارفة وش بيا . قاتلي احكيلي الشي لي مقلقك وانا نقولك وشبيك . قتلها حبيت نلقا بابا .شافت معايا وسكتت . قتلها حبيت نعرفو ونشوفوا ونحكي معاه . تنهدت قاتلي ديريني في مقام اختك لكبيرة واسمعي كلامي معندو ما يفيدك كي تتلاقايه وتحكي معاه كملي حياتك متزيديش تخممي فيه . قتلها بصح هكدا راني حاسة روحي ضائعة حاسة روحي بلا هوية بلا هدف بلامصير معندي حتى مستقبل حاسة راني ما بين سما ولأرض ماتقدريش تحسي وش راني حاسة غير واحد يجبدلي عليه نموت ونحيا حابة غير نشوفوا لوكان مرة وحدة ويبرد قلبي . قاتلي انتي دوك في مرحلة صعيبة عندك فراغ بزاف في حياتك لازم تسيي تعمريه بأي حاجة هكدا باه تفيتي عليك تخمام الزايد والتخمام سلبي تاع انتي بلا مستقبل وانتي معندك حتى هدف لازم تلقاي حاجة تعيشي علجالها وتطمحي توصليلها . بقات تنصح فيا وش ندير وانا نسمعلها نحاتلي شوي الكأبة لي كنت فيها . قاتلي حاولي كيفاه تقدمي في حياتك من لي عرفتك وانتي حابسة في نفس البلاصة ونفس التخمام عيشي حياتك كيما عايشين لبنات لي في سنك ، اخرجي حوسي . بقيت معاها شوي قتلها نروح نشري حاجة ناكلها من لي فاست فود هدوك بيسك مكليتش مليح في الغدا وجعت . قاتلي لا غير متروحيش اصيل وصاني قالي متخليها تتحرك لحتى بلاصة ، دوك انا نروح نشريلك وانتي ابقاي هنا . قتلها علاه حتا منروحش منيش صغيرة وراح نضيع في الطريق . قاتلي انا مدخلنيش هو وصاني ، انا دوك نشريلك وش حابة . قتلها اشريلي طاكوس وكوكا والماء . جيت راح نمدلها حقهم حلفت قاتلي انا نشري من عندي جبدت البرتموني تاعها من الساك وراحت بيسك الحوانت شوي بعاد . بقيت انا نتفرج على الناس و البحر ما بين ما جات حتى لمحت ورق خارجين شوي من الساك تاعها خفت لا يطيحولها هزيت الساك باه نعدلهم . شفت على النية الورقة كشغل اوردونونس مكتوب فيها اسم العيادة واسم الطبيبة ريان ولقمتها وتحتها مكتوبة طبيبة نفسية . انا قريتها حكمني شوك جبدت لورق كل من ساكها نقرى فيهم ونتبث لقيتها صح طبيبة نفسية للعلاج من الازمات ومنعرف وش . يعني هيا هدا الوقت كامل وانا نحكيلها ونحسابها تنصح فيا هكاك وهيا ضهرت طبيبة واصيل جابني عندها تاع بلعاني يحسابني مهبولة . رجعت لوراقي تاعها لبلاصتهم وبقيت نستنا فيها تجي . مطولتش شوي وجات قعدت محبيت نبينلها والوا . قتلها ريان نسقسيك وش تخدمي انتي . شافت معايا مفاجئة .بقات تمهمه من بعد قاتلي نخدم استادة . قتلها استادة ولا طبيبة نفسية . تبسمت وقاتلي نخدمهم لزوج . قتلها راكي تتمسخري بيا ولا وشنو . قاتلي جوليا هدني روحك دقيقة . قتلها انا كنت نحكيلك بنيتي على اساس صاحبتي وراكي تنصحي فيا وانا نسمعلك وانتي راكي حاطتني مهبولة وجاية نداوي روحي عندك ، أصيل هو لي قالك راهي مهبولة ياك وارواحي داويها ودرتولي قالب وهو يجيبني عندك ويروح وانتي ...... منيش مصدقة . قاتلي اصبري مقولناش راكي مهببولة جوليا انتي تحتاجي واحد يعاونك باه تعيشي الاز وانا راني نعاون فيك . قتلها متبرريش لروحك ، انا لباس عليا وماقوتلكش عاونيني انا كنت نحكيلك بنيتي ودرتك صاحبتي ونجي نفرغلك قلبي وانتي وياه متفاهمين على راسي حابين تخرجوني مهبولة تاع بسيف . قاتلي اقعدي جوليا الناس تشوف معانا دوك نعيط لأصيل وهو يجي يفهمك . قعدت وانا نرجف رجيف هكدا وصلت بيه كي ما لقاش كيفاش يتهنى مني راح يخرجني مهبولة ونداوي عند طبيبة.
