بعد ما طلعت مع ريمة للشمبرة تاعها بدلت حوايجي وعطاتني لبست تريكوا كلغولي باه يغطيلي رقبتي كي كملت قاتلي علاه عملك هكدا . قتلها حكاية بيني وبينوا سكتت فهمتني بلي مش راح نهدر .قاتلي هيا نهبطوا
غير هبطنا قبل ما ندخلوا قلتلها لي صرا يقعد بيناتنا .قاتلي علابالي كوني متهنية دخلت للصالة قعدت بجنب خالي هدرت تلقائيا بلا مانخمم يمكن من الخوف لي حسيتوا قبيل قتلوا خالي بغيت نقولك بلي راح ندير اقامة جامعية في ولاية خلاف . شاف معايا مستعجب قالي علاه ياك راكي تقراي في الجامعة هنا . بقيت نخمم وش نقولوا المهم نقنعوا باه نروح ونتهنا قتلوا لا كنت حابة ندير تخصص بصح مكانش هنا وكي كانت ماما مريضة محبيتش نروح ونخليها بصح دوك مدام انتم راكم معاها كي نروح بالي متهني عليها . تنهد قالي وش راح نقولك بنتي مدام لحكاية فيها مستقبلك ديري لي ساعدك . تبسمت وشفت مع اسمهان لقيتها تخزر معايا حايرة في الحكاية لي خرجتلهم بيها . كملنا نهار متجمعين في الصالة هما يهدرو واسمهان ديجا تأقلمت معاهم وعجبتها الڨصرة بصح انا كنت قاعدة معاهم غير بالجسم برك عقلي راه يخمم بعيد . وصل وقت لعشا ولازم يتلموا كل على الطابلة تاع الماكلة ستنينا حتى جاو الرجال لي نعرف من بينهم غير مسلم واصيل الباقي مزال منفرقش بيناتهم . قعدوا بدينا ناكلو نطق خالي قال لمسلم من غدوة تفركت لبنت عمتك على جامعة لي فيها التخصص لي حابة تقراه. شاف معايا قالي علاه انتي حابة تبدلي الجامعة .قتلوا ايه راح ندير اقامة جامعية . فهمها ديراكت علاش حابة نروح ندير اقامة . قالي زيدي خممي مليح علاه حتا تخلي هنا عايلتك وتروحي لبلاصة ما تعرفي فيها حتى واحد . قتلوا لا خلاص انا قررت ديجا من بكري وانا مخططة هكدا . قالي اوكي كيما حبيتي . شفت مع اصيل لقيتوا يشوف معايا متبسم بأستهزاء علابالي يكون فرحان راح يتهنى مني أصلا هدا واش كان يحوس . كملنا وكل واحد طلع لشمبرتوا ، دخلت الشمبرة شوي ولحقت اسمهان قاتلي علاه قلتي بلي راكي حابة ديري اقامة . قتلها انا حبيت هكدا .قاتلي بصح جامي هدرتي على الحكاية هادي وانتي أصلا من وقتاه تهمك القراية ياك حتى الجامعة موالفة تروحيلها مرة كل شهر .قتلها هادي حياتي وانا باغية هكدا مدخليش روحك فيا . قاتلي ماما ماراحش تخليك . قتلها ماما انا نعرف كيفاش نقنعها . قاتلي راكي حابة تروحي باه تلقاي راحتك وتكملي في الشي لي كنتي ديري فيه سهرات وخرجات وسكرات خاطر هنا صاي كاين شكون يعسك . قتلها صحيتي راكي جبتيها دوك خليني نرقد اخرجي واغلقي الباب وراك .غير خرجت في رقدت في بلاصتي نخمم حتى داتني عيني ورقدت ، تقلبت وانا راقدة لمحت خيال تاع عبد قاعد في الفوتاي يشوف معايا . تقعدت نجري شعلت الفيوز دو نوي . لقيتو هو هدا والله راح يولي كابوس حياتي .قتلو وش راك دير هنا اخرج من شمبرتي ولا نعيط نلم عليك الناس . كان قاعد حط رجل فوق رجل معرض روحوا فوق الفوتاي تقول راهي شمبرتوا . تبسم قالي عيطي وش راكي تستناي . سكتت نشوف معاه بخوف باينة راح نخاف وهو قبيل قريب جيفني قدامهم و ما خافش . قتلوا وش تحتاج مني ياك سمعتني قلت لخالي بلي راح نروح من هنا ياك هدا وش كنت تحوس خليني في حالي علاه راك جايبها ورايا . وقف وقدملي قالي اممم فكريني الصباح وش كنتي تقولي . سكتت ضحك قالي واش القط كلا لسانك وين راهي جوليا تاع الصباح لي كانت تقولي نجيبك تحت رجلي امممم قولي بالاك تحسابيني واحد من نقوشا تاع كرتيك لي كنتي تبعثيلهم تصاويرك باه تخليهم يصرفوا ويفورنوا عليك ولا راكي حاسبتني معلاباليش بفعايلك لموسخة كيفك وكيف يماك . بقيت ساكتة نشوف معاه بخوف مهما نلعب روحي منخافش بصح في الصح انا اكبر وحدة خوافة سيرتوا في المواقف كيما هكدا نلقى روحي وحدي وليت ندعي في ربي غير يخرج . غفلني حكمني على شعري . عيطت قتلوا اي اطلقني اطلق شعري قالي ششش انا #### كيفك تقولي نجيبك تحت رجلي انا لي نعفس عليك برجلي ومكانش شكون يسالني ، ادعي ربي لي مخرجتش فيك ڨاع هبالي سينو تشوفي وجهي الثاني. ضربني على خدي بيدو قالي لعب هدا لي راكي تلعبي فيه مراكيش قدو تريحي عاقلة حتى تروحي من هنا مزالك صغيرة على #### لي راكي ديري فيه . طلقني وخرج رحت نجري وراه غلقت الباب بالمفتاح والله ما راه نورمال امبوسيبل يكون صحيح في مخو داخلي للشمبرة في نص الليل بقيت قاعدة للصباح نوم ما شفتوش .
