بارت 37
خرجنا من الدار انا ركبت وهو غلق الباب بالمفتاح وجا ديمارا ، يسوق تلفتلي قالي ديري سنتورة راح نفوتوا على الباراج. طلعت يدي باه نجبد سنتورة بقا يشوف مع يدي وليت هبطتها باه ميشوفهاش مجروحة ويبقا يسقسي . هكا شوي حسيت بيه فرينا على الجنب وحكملي يدي طلع التريكو قالي وشبيها يدك من . قتلوا وشبيها ما بيها والوا . قالي منيش نقصر معاك شبيها يدك . قتلوا والوا تجرحت بالباب تاع الخزانة .قالي راكي تقعدي بيا هادي تاع واحد خبشك بضفارو كيما لمرة لي فاتت . قتلوا انا لي خبشت روحي تسالني . شاف معايا سكت من بعد قالي علاه . قتلوا هكدا برك صنعة والفتها ادا تقلقت . بقا يفوت في يدو على الجرح . قالي من وقتاه والفتيها . قتلو من لي كنت صغيرة والله معلابالي وقتاه المهم من لي عرفت صلاحي نديرها . قالي علابالك بلي حرام . شفت معاه. قالي هدا يسموه تعديب الدات وربي يحاسبك عليه .قتلوا بصح انا منفيقش بروحي كي نديرها ساعات نرقد نوض نلقاهم هكا . تنهد من بعد جبد بومادة من كوفر تاع طونوبيل قالي هاكي ديريها باه ميبقاش السيكاتريس. وصلنا للدار قبل ما نهبط حبسني قالي غدوة صباح على 10وجدي روحك . قتلوا علاه وين رايحين راح ترجعني الجامعة . قالي لا غدوة وتعرفي هيا دوك انزلي ترقدي راح الحال . قتلوا وانت مش راح تنزل . قالي لا عندي خدمة . قتلوا خدمة ولا رايح عند حبيبتك . شاف معايا داهش قالي وين علابالك انتي . قتلو سمعتك لبارح تهدر معاها متخافش ما نقول لحتى واحد .ضحك قالي هيا برك انزلي خليني رايح . انا دخلت وهو راح
