حتى الثلاثة تاع صباح وهما يسكتو شوي وينوضوا يتعايطو كلاو بعضاهم لبنات طلعوا قعدو عندي ، اسمهان كيف كيف من لي شافتني وهيا غير تبكي حتى شوفاتها ليا انورمال من نقولها وشبيك تقولي خفت عليك بزاف ، فرحت من كلامكها على الأقل مزلت عزيزة عليها وحست بغيابي وخافت عليا ، بقاو معايا حتى سمعنا صوت الطونوبيل خرجت طلت ريمة على التاقة شافت قاتلي اصيل هو لي خرج كيف عادتو ميزيدش يجي حتى للصباح . جات مرت خالي وجها حمر باين عليها بلي مقلقة بزاف قالتلهم هيا اخرجو خلو جوليا ترقد بزاف عليها السهرة راهي مريضة ، تفركتو خرجو بقات معايا هيا دارتلي الدوا والبومادة ليدي خاطر كانت مجروحة من الخيط ودارتلي لوجهي ثاني . قاتلي كانو لولاد جايين يشوفوك ويطمنو عليك بصح انا قتلهم راهي راقدة خلي حتى الصباح شوفي بنتي ادا تعرفي هدا لي خطفك قوليلي متخبيش عليا ياك انا في مقام يماك خلي يخلص حق لي دارو فيك . سكتت بقات شغل تحاول فيا قاتلي متخافيش نورمال ادا كنتي تعرفيه وغدرك تصرى نورمال مزالكي صغيرة واي وحدة في بلاصتك تقدر تصرالها متخافيش قوليلي انا نعرف كيفاش نصرف ونقولهم بالعقل خير من يعرفوا وحدهم من بعد يولوا عليك انتي . بقيت ساكتة ونتفكر في كلامو كي كان يهدد فيا كلشي نتفكر فيه كي الخيال في مخي حتى وجعني راسي . كي شافتني ساكتة قاتلي معليش دوك ريحي ارقدي بصح غدوة ادا جا سقساك مسلم قوليلو كلشي فهمتي في مصلحتك بنتي لازم يتعاقب على الشي لي دارو فيك .ليلة هديك رقدت معايا ، تالمو تعبانة حتى التقلاب ومتقلبتش حتى للصباح باه فطنت كانت العشرة لقيت ريمة دخلت لي الفطور حطتهولي نوضتني غسلت وجهي وهيا حاكمتني بيسك منقدرش نوازن روحي كون تطلق يدي نطيح في الارض ، رجعت بالخف غير باه نفطر ونشرب الدواء ملڨري شربتو حتى لبارح بصح الوجاع باقي ويزيد . كملت قاتلي جوليا راهي جات وحدة تطل عليك. قتلها شكون . قاتلي على ما اضن اسمها ريان قالت بلي تعرفيها وجات مع اصيل راهي طالعة عندك . شوي ودقدقت ودخلت جات ديراكت سلمت عليا قاتلي الحمد لله على سلامتك خفنا عليك جوليا . درتلها غير براسي قعدت بجنبي لي السرير . قاتلي وش راكي دوك ياك لباس مش موجوعة بزااف قالولي بلي صرالك ارتجاج . قتلها لا مش بزاف قاتلي معليش تفوت كيفاش راكي حاسة روحك دوك . فهمت عللواه راهي تحوس قتلها مراني حاسة بوالوا . قاتلي معليش ندخلوا في الموضوع ديراكت قوليلي متخبيش عليا لي خطفك تعرفيه ، علاه حتى خطفك وش قالك الا مايكون قالك حاجة ولا عرفتي عليه حاجة ووين داك ،احكيلي لازم تحكي كلش انتي ترتاحي وحنا نعرفو لي دار فيك هاد العملة وباه متصعبيهاش راه بعثني اصيل يعني تحكيلي انا طفلة كيفي كيفك خير من تحكيلو هو بالاك تحشمي منو ماتقدريش تحكي كلش بالتفصيل وهدا في مصلحتك انتي . قتلها معلاباليش مني متفكرة والوا. قاتلي حاولي تتفكري الا مايكون قالك حاجة جوليا لازم تتفكري . قتلها معلاباليش قتلك معلاباليش . بقات تشوف مع عينيا وتميزز هبطت عينيا منها قاتلي متتقلقيش بصح ادا راكي خايفة منو ولا راه مخوفك بحاجة ، ما يقدر يدير لك والوا جوليا رانا كامل معاك ظالمة ولا مظلومة مدام عندك عايلة كيما عايلتك واحد ما يقدر يأذيك . قتلها لكان كملتي تقدري تخرجي . شافت فيا وتبسمت قاتلي معليش نخليك تريحي ونعاود نوليلك . قتلها ما عندك علاه تولي عندي . ناضت خرجت تنهدت قلبي خرج خفت بزاف تخلط عليا كلش ما فهمت نحكيلهم ولا نخبي كيما قالي خايفة يفضحني هدوك تصاور كون يشوفهم اي واحد راح يصدقهم . بقيت غير نطلع ونهبط كلشي مخلط عليا حاسة واحد راه يخبطلي في مخي داخل نضت بسيف حاكمة في سرير نحوس على دوايا هاد دواء غير زادني مانفعني ما والو تقول راني نشرب في الماء ملڨري معنديش نص ساعة من لي شربت حبة .
