بقا يشوف معايا من بعد فتح الباب وخرج ، صاي آخر امل ضاع مبقالي حتى حل . لحقوا مسلم يجري سمعتوا قالوا وشبيك درتيلها هكدا عيب عليك الطفلة صغيرة تقولها هديك الهدرة علابالك عمرها غير 19 سنة ، وزيد بالزيادة بنت عمتك . قالوا مدخلش روحك راني قتلك اجبد على ### علاه جاية عندك . قالي كيفاش علاه جاية عندي راهي بنت عمتنا يا عبد ربي لمن راح تروح كي ما تجيش عندنا تروح عند الغريب . قالوا تروح عند لي كانت تروح عندهم ويصرفوا عليها . قالوا من جبتها هاد الهدرة انت . قالوا انت راك بهلول لي يجي يلعبها عليك وهديك لي راهي تستت لداخل وطيح في الدموع تديك للواد وترجعك عطشان وماتقوليش صغيرة . هي صح صغيرة بصح فعايلها كبار ، اسمنا مرغت بيه لرض كي يماها لحرام يمشي في دمها. وقفت مسحت دموعي هزيت ساكي لي مزالت فيه عشرين الف لخرة حق الترونسبور . خرجت لقيتهم قدام الباب يهدرو خزرت فيه جا ماشي سبقتوا وعديت عليه حكمتوا على دراعوا وهو حبس شاف معايا قتلوا ذنبي في رقبتك وخرجت لحقني مسلم يجري . حكمني قالي جوليا وين رايحة قتلك اصبري انا نجيبلك الدراهم .تبسمت معاه قتلوا عمري ماننسى وقفتك معايا بصح كثر خيرك راهي عيطتلي تاع الجمعية الخيرية دوك هما يهدروا مع الكلينيك وديرولها العملية باطل . قالي صحا بصح متزعفيش من هدرة اصيل هو ديما هكدا يجرح بالهدرة بصح حنين وقلبوا كبير دوك تلقايه ندم على هدرتوا . قتلو مزعفتش نورمال والفت أصلا هو قال الحق. جات تكسي ركبت فيها وخليتوا واقف. طريق كامل وغصة في قلبي حاسة قلبي راح يحبس من القهرة غير وصلت للدار دخلت ديراكت للدوش فتحت الما بارد وقعدت نحاول بالاك تبرد نار القهرة لي شعلت في قلبي رغيت وعيطت وبكيت وخبشت دراعيا حتى سال منهم الدم هادي هيا عادتي هكدا نفرغ قلبي . دوك وين حسيت روحي تنفست كملت دوشت وانا نشوف في روحي في المراية انا الغالطة لي روحت عندهم من لول مدامني بنت حرام مصيري راح نروح للحرام . كملت خرجت لبست غوب صواري ميني وطالوا درت مكياج وطلقت شعري. وخرجت من دار . كانت 8 تاع الليل واسمهان عندها ساعة وهي تعيط بصح مقدرتش نهز عليها ، حكمت تكسي وصلني لابشع بلاصة معروفة بزاف اشهر ملاهي في الولاية يكونوا فيه غير جماعة الدراهم والطبقة البرجوازية
دخلت وانا معولة نلقى واحد يخلصلي حق العملية ونعطيه لي حب عليه . مع دخلت قابلني واحد حاط الحطة مع شفت معه غمزلي صاي هدا هو المطلوب أصلا يبان مرفه ومن لبستوا من نوع هداك الانوش لي ما يفهم فيها والو يعني قادر نعقبها عليه. رجعتلوا الغمزة وقعدت مقابلاتوا . شوي وجا عندي قالي اهلا الزين راكي وحدك .قتلوا وي وحدي قالي نقعد . ضحكت معاه قتلوا تفضل . قعد قالي علابالك عجبتيني . قتلوا صح قالي وي فضيتي فيا . قتلوا حشمتني . قالي نورمالمو الزين هدا مايحشمش . قدمتلوا قتلوا ماتجبليش حاجة نشربها . قالي عيب عليا نجيبلك اغلى شراب هنا . قتلوا لا انا منشربش . جابلي جي شربت وهو قعد يشرب في شراب وانا فوق قلبي نستنى غير وقتاه نتفاهم معاه على الدراهم ، شوي وحط يدو فوق يدي قالي علابالك هنا الغاشي بزاف وش قولك نكملوا السهرة عندي في الدار . قدمتلوا قتلوا شد مد . ضحك وغمزني قالي قداه السومة . قتلو شوف انت زعما شحال نسحق .قالي انتي تسحقي بزاف بزاف .جبد كرني د شاك . قالي اكتبي قد ما تحبي بصح كل يوم راكي فاهمتني .قتلوا وي فهمتك .انا كنت نخمم غير في ماما وصاي همي كامل اني نوجد الدراهم قبل مايطلع الصباح . كتبت 180 مليون . قتلوا هكدا مليح . قالي وي مليح هيا نخرجوا . قتلوا هات الشاك . تبسم قالوا لا الزين نفوتوا الليلة ونشوف . قتلوا وش لي يضمنلي قالي مكانش ضمان . شفت معاه من بعد قتلوا ايه. معندي حتى حل آخر ربي لي شاهد . خرجت معاه وانا حاسة واحد حاطلي موس في قلبي .
