صدمة صدمة حكمتني متوقعتش بلي راح تكون ردة فعلو هكدا ماغضنيش كي ضربني ڨد ما غاضتني كي راه مش مصدقني بلي ما عندي حتى ذنب هادشي اثبتلي بلي ماعندوش الثيقة فيا ، حكمتني هستيريا تاع بكا لكوراج لي بقالي من الشي لي صرالي جا هو وكملو انهاريت مقدرتش نسكت قاع خرجو بقا معايا مسلم قالي مديريش عليه هو هكدا مهبول على روحو وزاد عليه الحال والله من خوفوا عليك دارلك هكدا انتي ماشفتيش كي سمع بيك بلي تخطفتي ومالقيناكش كيفاش صرالو خاصو غير مقتلش حتى خدمتو سمح فيها وجا هنا مكانش بلاصة ومحوسش عليك فيها . قتلوا بصح انا وش ذنبي انا علاه ياك انا لي عانيت وحدي علاه زهري هكدا انا ڨاع جيتو ضدي واحد ماراه حاس بشي لي راني نعيش فيه بقيت نهارين تمنيت الموت فيهم كنت كل دقيقة نقول دوك نخسر حياتي وواحد ما علابالو بيا ، قالي علابالي جوليا وراني حاس بيك انتي قولي شكون هو برك والله نجيبهولك مقطع ونرميه تحت رجلك انتي غير قولي الصح . شفت فيه مترددة من بعد قتلوا منعرفوش والله ما نعرفو وجامي شفتوا كان مغطي وجهو علاه مراكمش مصدقيني . تنهد قالي يعني راكي مصرة على هدرتك جوليا ، و مزلتي تخبي مي ديريها مليح في بالك بلي راح نلقاوه راح نلقاوه حتى وراكي تخبي عليه ، انتي دوك حبسي علينا هدا البكا وابراي بالخف وكملي حياتك شغل ماصرى والو بيسك مستحيل واحد يزيد يقرب ليك . بقيت نشهق غايضتني عمري احساس بالحقرة والذل جامي يخطيني قلبي معمر من الدنيا . كي شافني مزالني نبكي قالي خلاص جوليا بزااف .قتلوا تعيش خليني وحدي . وقف قالي معليش مي ما تحطي والوا في بالك ياك الزينة . درتلوا براسي ايه برك. خرج وخلاني غارقة في تخمامي ياك كي تكوني تبكي تتفكري غير الحوايج السلبية لي تخليك تزيدي تبكي تلم عليا كلشي تفكرت ماما والشئ لي صرالي خص غير مبكيتش دم هداك النهار حتى غفيت على دمعتي . جات نوضتني اسمهان كانت جابتلي العشا مبغيتش بقيت مغمضة عينيا بصح راني نايضة ، كل مرة تجي ليا وحدة تحاول فيا على العشا مي محبيتش لابيتي مغلوقة وين راه القلب لي يقدر يخمم في الماكلة . كي بقات تحاول فيا مرت خالي نضت جابتلي لبلا تاع الماكلة شربت شوي تاع لاسوب غير على خاطرها كملت هزت هيا لي بلا وخرجت وانا نضت دخلت للدوش نغسل يدي . خرجت لقيتو في الشمبرة واقف غير شفتوا نكدب عليكم خفت منو خفت لا يزيد يضربني ولا يبقا يسقسي جيت راجعة سبقني حكمني على ذراعي قالي حبسي قتلوا اطلقني وش راك حاب تكمل لي خليتوا قبيل . قالي اركحي نهدر معاك . قتلوا معندك حتى هدرة معايا . قالي وشبيك خايفة قتلك راح نهدر معاك برك . دورت وجهي محبيتش نشوف في وجهو دورلي وجهي ليه وقربلي حتى عدنا نتنفسو نفس النفس شميت فيه ريحة عرفتها بلي شارب قالي علاش مش حابة تشوفي في وجهي. خزرت فيه عينيه حمرين قتلوا اطلقني وبعدني . قالي قبيل مكنتش صاحي وش راني ندير مكنتش باغي نضربك كنت مقلق بزاف . دورت وجهي وبكيت قالي غادي نلقاه وراس لي عزاز عليا غادي ندمو على نهار لي دسيدا يدنى لحاجة تخصني ودموعك يخلصهم بدمو دمعة دمعة . عنقني بدراعو جا وجهي في صدرو وليت نبكي بالصوت هادي هيا لحنانة تاع اصيل لي كنت نحوس عليها نطقت بالبكا قتلوا ستنيتك بزاف تجي ليا ، كنت نقولو اصيل يلقاني ويقتلك من نفشل تجي انت بين عينيا ندير الكوراج بيك نبقا نتعافر معاه منخليش يدير وش حاب حتى يضربني . زير عليا حتى وجعني قالي اششش انتي متبكيش انساي كلشي ، انا نسيك في كلشي وهو حسابو عندي طبس وجهو ليا باسني من وجهي كامل خدودي عينيا فمي ، انا مستسلمة ليه ملڨري علابالي شي هدا غالط مي نحبو نستعرف بلي حبيتوا عشقتوا كي شفتوا طول فيها دزيتوا شوي على صدرو قالي اركحي قتلوا اصيل راك شارب . ضحك قالي حلوة حلوة سكر هادي هيا الرشقة لي راني نحوس عليها ,متخافيش مزلت صاحي منيش سكران . قتلوا صاي اطلقني بعد عليا شوي بقا يمسح على وجهي بيدو ويعبز على خدودي حتى ضحكت . قالي هكدا اضحكي وانساي كلشي ، قوليلي حبس راسك من لوجاع قاتلي يما راه واجعك . قتلوا اممم يوجع بزاف مقديتش حتى شربت ثلاث حبات تاع دوا باه حبس . قالي غدوا نرجعك للطبيبة . قتلوا ايه.
غدوة الصباح حبيت نهبط نفطر معاهم تحت كرهت و انا قاعدة غير في شمبرة وحدي ، قعدت فطرت معاهم لحكاية مجبدوش عليها أبدا شغل ما صرا والوا ، بلاصتي ديما حدا مسلم كان جابلي لي كراب ولي ڨوفر انواع اشكال يقولي كولي ، انا وياه علاقتنا سبيسيال بزاف واحد ما يقدر يناقش فيها غير اصيل من نطلع راسي نلقاه يتخنزر فيا ومشنف من بعد هز روحوا وخرج خلاص .انا كملت فطرت وقعدت شوي في الصالة بصح بالي باقي مع اسمهان من نهار لي جبت وهيا انورمال سيرتو ليوم من لي نطلع راسي نلقاها تشوف فيا ، يديها يرجفوا شغل خايفة من نسقيها وشبيك تقولي والوا مي تعيا وتبان .
