مفهمتش كيفاش لقيت روحي قاعدة بجنب اسمهان . نشوف في ماما قدامي تجاهد باه تخرج كلمة من فمها حالتها منقدرش ننساها طول حياتي العرق في جبينها بصح هكاك وغير شافتني ضحكت قاتلي جيتي بنتي. درتها براسي ايه ودموعي على خدي ولساني ينطق في واش راني نخمم لقيت روحي نقول بلا ما نجيب خبر لعمري يا ربي لا يا ربي لا رميت روحي فوقها نبكي نعنق فيها ونقولها ماما متخلنيش . قاتلي انتي بنتي لعزيزة من بعد شافت معاهم قاتلهم بنتي امانة في رقبتكم جوليا امانة خليتهالكم . وصاتهم غير عليا انا كأنها حست بواش راح يصرالي من بعد موتها كأنها حست بعدابي بعد فراقها كأنها حست بشي لي راح نعانيه من اقرب الناس ليا . من ورا كلامها هدا حبست الهدرة قدم خالي الكبير حكملها يدها شهدلها ،صاي راحت ماما لحنينة العزيزة لي كنت عايشة علجالها راحت لي كانت تحميني لي كانت تخاف عليا شكون بقالي حتى واحد. بقيت وحدي بلا كتاف كتافي بردو لمن نشكي شكون لي يسمعني في حضن شكون نبكي علجال شكون راح نحارب الدنيا شكون لي راح يحن عليا . بقيت نعيط وانا حاسة كأنوا واحد راه يكوي فيا بالنار حاسة بوجيعة مستحيل نقدر نوصفها يحسوا بيا غير لي جربوا هاد االاحساس ربي يحفظ امهات المسلمين كامل وربي يرحم جميع موتانا . محبيتش نطلقها كل مرة يدين يجبدوني عليها و نرجع نلصق فيها اسمهان تغاشات ديراكت وخرجوها . بقيت غير انا نعيط ونبكي لاصقة فيها نوض فيها كيما كل مرة بصح هاد المرة محبتش تنوض ، حتى حسيت بيدين جبدوني وعنقوني يد تمسح على شعري ويد تمسح على ضهري قتلوا ماما راحت بقيت وحدي(وصح مغلطتش كي قلت بلي بقيت وحدي ملڨري عندي اسمهان اختي و مع الوقت تعرفوا صح بلي بقيت وحدي ) صوتوا في وذني يقولي اشش اهداي انا معاك مدامني انا حي مستحيل تبقاي وحدك انا في كتافك انا راح نكونلك كلشي . بعدها حسيت بأبرة في دراعي ودخت ما جبت خير لوالوا .
بعد ثلاث سوايع باه فطنت لقيت روحي في الشمبرة الدنيا ظلمة وصوت لبكا تاع نسا وصلني راسي ثقيل ويوجع عييت نهزو من المخدة بقيت كيما راني دموعي يجريو على خدي بلا حساب تفتح الباب دخلت مرت خالي لكبير قاتلي نضتي بنتي جات ليا تتحضن وتبوس وتصبر فيا وانا منيش معاها ڨاع دايخة حاسة روحي ضايعة قتلها اسمهان وين راهي قاتلي راهي رقدت شوي مسكينة ماهيش قادرة تصبر . سكتت نخمم حابة نعيط ونبكي ونخرج الغصة لي في قلبي بصح مقدرتش تعبانة وجسمي كامل فاشل من المهدئ . قاتلي انا نروح نشوف الناس انتي ابقاي هنا دوك تجي ليك وحدة من لبنات تقعد معاك . درتلها براسي ايه هيا خرجت وانا قعدت وحدي حتى جاو لبنات كل مرة وحدة فيهم تواسيني وتصبرني وانا في عالم ثاني حتى شفت مسلم دخل جا ديراكت عندي قعد بجنبي في السرير. حط يدو على شعري شفت معاه قتلوا ماما ماتت صح؟. تنهد قالي ما ديريش في روحك هكدا جوليا هدا قضاء وقدر اجلها وصل ربي يرحمها ويثبتها عند سؤال علابالي بزاف صعيبة بصح لازم تصبري هدا امتحان وراح نفوتوا عليه كامل . قتلوا بصح علاش انا علاش ماما انا لي لازم تموت منقدرش نتخيل حياتي بلا بيها علاش مش انا لي متت قبلها منيش قادرة نصبر حاسة حاجة غامتني حابة نرقد ما نوضش ولا نوض ويكون كلش كابوس وجاز . مسحلي الدموع من وجهي قالي متقوليش هكدا حرام . شفتوا جبد إبرة من جيبو راح يديرهالي في ذراعي قتلوا وش راح دير . قالي مكيش مليحة جوليا من الاحسن تهداى وترقدي شوي ترتاحي . قتلوا لا منيش حابة نرقد اديني نشوف ماما . قالي قولي لااله الا الله محمد رسول الله . قلتها قالي صحيتي لازم تصبري . قتلوا ايه . بقا معايا شوي حتى جات مرت خالي قاتلي راه وقت دفينة . عاونتني هبطت وانا كي الجثة لي يشوفني يجي يواسي ويعزي وانا معلاباليش قاع وش نقوللهم قعدت انا اسمهان معنقين بعضانا حتى جابوا ماما في صندوق جابو الحنانة تاعي في صندوق جابوا نور حياتي وعينيا وجنتي في صندوق هنا صاي مقدرتش نصبر هنا تأكدت من الواقع المر لي راني نعيش فيه الوقت لي فات كامل كنت نصبر في روحي بلي راني نحلم بالاك راهي راقدة وراح تنوض بالاك دخلت غيبوبة دوك تفطن بصح دوك تأكدت ، الوقت هدا عقلي طار من راسي منقدرش نوصف الحالة لي كنت فيها لي كانو قاعدين كامل بقاو غير يبكيو شفقة عليا مش على ماما لي ماتت نسمع فيهم يقولوا اليتيم يتيم الام لي راحت يماه راحت عليه الدنيا . غير جاو بخرجوها طحتلهم فوقها قتلها غير ماما متخرجش من هنا ولا نخرج معاها دوك تبرد وحدها . حتى دخل اصيل ومسلم وسيم بقا اصيل يجبد فيا على الصندوق وحكمني تاع بسيف وهو يعيط على مرت خالي يقولها كيفاش مخلينها هكدا طلعيها لفوق حكميها يعود كشما يصرالها . وصح بيسك كنت نطير وحدي تقول ركبوني الجنون مخي طار . كي مقدرش يركحني ولا طلعني لفوق هكاك لحقوا مسلم ووسيم حكموني حتى ضربلي مسلم الابرة في ذراعي باه ركحت ودخت
