بقينا غير نخمموا مين نلقاو الصوارد ، فات نهار كامل، ملقينا حتى حل لي نقصدوه يردنا
رحنا عند كامل معرفنا ولي يسمع قيمة الصوارد يقول معنديش حتى وحدة نصحتني قاتلي روحي للجمعيات الخيرية هما يدبرولك بصح قادرة يطولوا عليك. كي رحت للجمعيات وسقسيت قالولي قادر يبقاو حتى شهر ولا شهرين باه يلايموا الصوارد . خرجت الوراقي ودفعت الدوسي في الجمعية الخيرية . ورجعنا للسبيطار غير وصلنا لقينا الطبيب قالنا لازم العملية تكون هاد النهارين صاي يماكم متقدرش تزيد اكثر من هكدا بلا عملية .
هو قالنا هكدا وعقل ما بقا في راسنا غير نخمموا ونبكيو تاع الصح حسيت روحي يتيمة وبلا عايلة . قاتلي اسمهان وش نديرو دوكا . قتلها معلاباليش منيش قادرة نخمم . قاتلي زيدي تفكري كاش واحد من معارفك ياك انتي صحابك كل عندهم دراهم . قتلها شكون لي راح يعطيني هدوك دراهم كاملين نرهن روحي عندهم وما يعطوليش . تفكرت هداك البوليسي لي عطاني لاكارت تاعوا فيها النميرو هداك هو آخر امل عندي ، وقفت قتلها اسمهان راني تفكرت واحد يقدر يعطيني قاتلي شكون ياك كنتي تقولي ميعطونيش . قتلها لا هدا سير متأكدة يعطيني انتي وحدي لوراقي باه نخرجوا ماما من هنا وانا نروح نجيب الصوارد ونجي . حكمتني على يدي قاتلي جيجي عندك كشما تعملي . قتلها وش راح نعمل مفهمتش قاتلي راكي فاهمة قصدي ،شكون راح يقبل يعطيك هادوا الصوارد بلا مقابل فهممتي . قتلها متخافيش علابالك منحبش لحرام . قاتلي وكيفاش راكي متأكدة بلي راح يمدلك. قتلها كي نرجع نفهمك دوك راني رايحة. خرجت من السبيطار حكمت تكسي ديراكت للكوميساريا وين يخدم . وصلت دخلت سقسيت على البيرو تاعوا بيسك نسيت . قالولي على لبلاصة بصح قالولي هو خرج مكانش قلتلهم نستناه هنا حتا يجي بقيت نستنى فيه وانا خايفة ، خفت لا يقولي لا هدا هو آخر امل ، بصح لازم نحطوا قدام امر الواقع ونقولوا بلي علابالي بلي هو ولد خالي هكدا ميقدرش يقولي لا . بقيت قاعدة ستنيت شي نص ساعة. حتى نشوف فيه داخل حتى وصل عندي شافني خفت لا يكون نساني بصح تبسم قالي راكي تستناي فيا . قتلوا ايه . قالي الخير ان شاء الله فتح الباب تاع البيرو قالي فوتي مرحبا بيك . تبسمت معاه دخلت ورايا وغلق الباب راح قعد في البيرو تاعوا وانا قعدت مقابلاتوا . بصح بقيت ساكتة معرفتش كيفاش نبدا نهدر خفت من بعد قتلوا ياك متفكرني . تبسم معايا قالي كيفاش ننساك جوليا ### هكدا . درتلوا براسي ايه روحت شوي كي مزال متفكرني. قالي ياك لاباس . قتلوا لاباس . من بعد قالي ياك مدرونجاكش هداك تاع المرة لي فاتت .قتلوا لا . بقيت نعصر في صوابعي قريب نكسرهم من الستراس تاع الصح معرفتش نبدا نهدر . قالي وش تشربي. قتلوا والوا . هز التلفون تاع البيرو وعيط على واحد قالوا جيبلي قهوة والكاس جي . من بعد بقا يشوف مع يديا قالي بالعقل راكي قريب تكسري يديك قولي وش تحتاجي متحشميش مني مدام جيتي عندي معنتها راكي محتاجتني في حاجة هكدا . قتلوا ايه . شجعني بكلاموا قالي ايه قولي فاش محتاجتني بربي ان شاء الله نعاونك . فرحت كي قالي هكدا . دموعي وحدهم هبطوا وانا نشهق قتلوا ماما. قالي وشبيها ماماك . قتلوا في سبيطار راح تموت . تخلع قالي وش بيها وش صرالها . قتلوا طلعتلها لاطونسيو في راسها لازم عملية . قالي بالعقل تهدني واحكيلي وحدة وحدة ما تخافيش . حكيتلوا كيفاش كي نضنت ولقيتها طايحة وكيفاش ديتها للسبيطار وكيفاش تمرمدنا وحدنا باه نغيضوا ويقبل يمدلي الصوارد حكيتلوا التفاصيل كاملة وزدت فيها شوي . ناض من البيرو تاعوا وجا قعد مقابلني قتلوا مالقيتش منين نجيب حق العملية . قالي متخافيش انا نتكفل بصح درك معنديش هاد الصوارد كاملين كلهم راهم في لابونك وياها نجبدهم طول شوي . قتلوا بصح الطبيب قالي لازم غدوة دير العملية متقدرش تستنى . بقا يخمم شوي من بعد قالي دقيقة برك . هز التلفون يعيط . حتى سمعتوا قالوا الوا اصيل راك هنا في الخدمة . نسمع فيه رجعلوا. قالوا ايه راني هنا علاه قالوا تقدر تجيني للبيرو تاعي راني محتاجك ايرجوا . قالي منيش قاعد درك من بعد نعدي عليك . قالوا لا راني محتاجك درك بعد حاجة ايرجوا . نسمع فيه طيحلوا قالوا راح تشقيني ### . ضحك وقالوا ارواح برك تخلي خوك الصغير وهو محتاجك . قالوا كوبي راني جاي . كوبا وقالي متخافيش بربي ان شاء مفروزة . بقيت ساكتة ونستنى محبيتش هداك يسمع مزلت متفكرة كي حكالوا علينا ردة فعلوا كيفاش كانت . شوي وسمعت الباب تفتح طلعت راسي شفتوا داخل خاطر كنت قاعدة مقابل الباب لابس كيف الخطرة لي فاتت كلش اسود وكوديوس في رجليه مع فاست تاع الجلد . غلق الباب و بقا يشوف معايا ويثبت من بعد غمز لمسلم قالوا شكون هادي . وراح قعد في البيرو قالوا مسلم هادي جوليا . قالوا وشكون هادي جوليا قالوا لي حكيتلكم عليها هديك المرة في ليل . قالوا ممم ومسح على لحيتوا قالوا علاه شقيتيني ازرب خليني راجع عندي خدمة . قالوا محتاج دراهم سلف . شفتوا جبد بورتفوي من جيبوا و نطق وهو يعيط قالوا وين راحوا دراهمك انت كل مرة تجي تطلب جدي انا . قالوا مسلم اصبر سع نقولك قداه محتاج من بعد عيط على روحك. بقيت نتفرج فيهم علاقتهم مع بعضهم هايلة يا ريت عندي خويا حتى انا . قالوا اصيل شحال تحتاج . تبسم مسلم وقالوا محتاج 169 مليون ونحتاجهم ليوم ولا غدوة الصباح ماكسيموم . لوخر خبط البيرو قالوا راك ###$$ وش راح دير بيهم هادوا كامل . قالوا راني قتلك محتاجهم ايرجوا ياك راح نرجعهملك . اصيل شاف معايا علابالي بلي فهم انا لي طلبتوا فيهم وانا لي مستحقتهم بصح مهدرش قالوا معنديش دوك اصبر منا للسمانة الجاية . قالوا كيفاش منا للسمانة الجاية كون ما جيت مزروب بيهم راني جبدت من لابونك بصح انا راني مزروب بيهم وعلابالي بلي انت تخبي دراهمك في الدار غير اعطيني ياك راح نرجعهملك . قالوا معنديش دوك قتلك اصبر للسمانة الجاية . نطق مسلم قالوا اصيل راني سيريوا والله محتاجهم ايرجوا علاه راك تمكر ياك سلف . شاف معايا قالو كي تعود تحتاجهم في حاجة تستاهل راني نمدلك بصح دوك معنديش . ناض من بلاصتوا . انا حسيت بلي صاي آخر امل عندي راح ومعاه تروح ماما ونتيتم مرة آخر . نسيت كلش نسيت كرامتي ونسيت كبريائي كنت نخمم غير في ماما وفي حياة ماما وحياتي بلا ماما . طلعت راسي خزرت معاه قتلوا ماما راح دير عملية ولازم غدوة . شاف معايا وهو واقف ديجا هو طويل وزيد انا قاعدة عاد يبانلي عملاق . قالي مناش جمعية خيرية هنا . نطق مسلم قالوا اصيل وش هاد الهدرة . قالوا انا لي عندي قلتوا معنديش دراهم كي تحتاجهم في حاجة تخصك ارواح ادي قد ما تحب . كمل يمشي خارج انا حسيتوا مرمد بكرامتي الارض حقدت عليه بصح نطقت قتلوا تخلي عمتك تموت . حبس ودار شاف معايا . قالي معنديش عمة. قتلوا عندك عمة وانا بنت عمتك . قالي تفكرت صح عندي عمة جابت طفلة بالحرام وقيلا انتي ياك. قالوا مسلم اصيل راك زدت فيها بزاف . دموعي هبطوا تاع الصح حڨرني هدا لقريب قالي هكدا والبعيد كيفاش يقولي . قلبي تعمر من جيهتوا كون نلقى الموت نحطها عليه . قتلوا ايه انا هو بنت الحرام ،بصح اعطيني الدراهم ماما راح تموت نعطيك لي تحب نرهن روحي عندك غير اعطيني والله نخدم ليل ونهار نرجعهملك ، ادا ماتت ماما ما يبقالي حتى واحد . بقا يشوف معايا ، من بعد نطق قالي معنديش وكيما قتلك ماناش جمعية خيرية هنا . نطق مسلم قالوا اصيل وشبيك دير هكدا اعطيها وانا غدوة نرجعهملك . وانا بقيت غير نبكي بصوت حسيتوا حاقد علينا ملڨري ما درنالوا والوا جا راح يخرج قتلوا ربي يعيشك نبوسلك رجلك اعطيني والله نرجعهملك علاه راك دير هكدا ترضاها ليماك واختك . قالي معنديش اختي بنت حرام وتبع الرجال باه يفرنوا عليها ، روحي لي كنتي تخرجي معاهم ويصرفوا عليك يخلصولك حق العملية . هنا فهمت بلي cv تاعي وحياتي كاملة علابالو بيها . سكتت مالقيت ما نقول مسحلي بكرامتي الارض جامي في حياتي أثر عليا كلام كيما كلاموا كنت ديما نتعرض للتنمر من لي عرفت صلاحي يضحكوا عليا ويقولولي بنت حرام بصح نورمال بصح هو جرحني تاع الصح بهدرتوا قلبي حسيتوا تقطع حبيت نرغي على طول صوتي ونقول علاه علاه انا لي لازم نعيش هكدا . بقيت ساكتة ونشوف معاه وهو يشوف معايا عينيه مركزين معايا غير انا . حكمني مسلم على كتفي قالي متخافيش من هنا لليل نفكرهم الدراهم نجيبهم حتى من تحت الارض . رجعت قعدت وهبطت راسي ساكتة وحاقدة على الدنيا بنت الكلب لي ديما تعطيني غير الكفوف كف ورا كف بصح المرة هادي غير حسيتها دارتلي بالظهر وقاتلي كيما جيتي غلطة عيشي غلطة .
