طلعنا الصباح وحنا نستناو على الثمنية دخل الطبيب عند مسلم شوي وخرج قالنا راه تحسن خير من لبارح مزال عندو مشكلة شوي في كتفوا ورقبتوا يطول شوي باه يرجع كيما كان . المهم كي فاتت سلامات ومخسرناهش هادي هيا الفايدة الحمد الله يا ربي . هو راح واصيل قالي سيبو يخي طمنتي عليه هيا دوك نوصلك للدار . روحنا للدار لقيناهم كامل نايضين وقيلا لا مرقدوش أصلا بقاو يسقسو فينا وش درنا وعلى مسلم انا خليتهم وطلعت لشمبرة تاعي دوشت ودخلت في فراشي تعبانة من سهرة حابة غير نرقد . تفتح الباب لقيتها مرت خالي هازة سنيوة تاع ماكلة ضربتني منها ريحة الكبدة مشوية ولي سكالوب قاتلي جيبتلك الكبدة كولي باه ترجعي صحتك شوي . قتلها خالتي والله ما راني قادرة وزيد على الصباح غير خلي برك . طل عليا من الباب قالي غير كولي مناش ناقصين تزيدي دوخي وتتفرعيلنا في الطريق كيما لبارح والله ما رانا قاعدنلك . قلقني شنفت عليه قتلوا شكون لي قالك اقعدلي يخي صامط . قالي علابالي سامط المهم كولي برك بحالتك هادي يدخلك لانيمي لبارح متعشيتيش مليح . قاتلوا مرت خالي خيرها والله ماننساه كون مش هيا لبارح منعرف وش كان راح يصرى في وليدي. قدمت فوق سرير على ركابيا عنقتها قتلها متقوليش هكدا بلا مزيتي هادي غير انتم لي عندي في هاد الدنيا وانتي راكي في مقام ماما . قاتلي والله حتا انتي في حسبة بناتي ربي يطولي لعمر ونخرجك انا بيدي عروسة ونشوف ولادك قتلها ان شاء الله. ضحكت قتلها ان شاء الله . نطق هو قالها يما كي تكمل ماكلة راني جبت حليب تاع المعيز مديلها تشرب منو . قتلوا وشنو حليب تاع واش . قالي تاع المعيز عمرك ما سمعتي بيه . قتلوا انا جوليا نشرب حليب تاع معزة معمر شعر والله ما ندوقوا ياعق يعيف . ضحكت مرت خالي قاتلي شكون لي قالك فيه شعر والله نظيف يهبل استناي دوك نهبط نجيبلك منو والله ما تفرقي بين وبين حليب نورمال. خرجت وهبطت باه تجيبلي . قتلوا يعني ما لقيت ما تجيبلي . قالي يزي بلا تفشاش علاه راكي عايفاتوا انا ديما نشربوا . قتلوا على هادي راك بالحجم هدا تمضغنا وتاكلنا نورمال يا خويا غوريلا اكلي لحوم البشر . عاد يضحك بالصوت قالي خمسة في عينيك وش راح تحسيديني . قتلوا متخافش منعاينكش . قالي المهم اشربيه كيما قتلك قتلوا اممممم بربي ياسر وشوي . جا خارج شفت البورتوكلي لي شريتهالوا نسيت ما مديتهالوش . قتلوا استنى . تلفتلي قالي واش . وقفت من بلاصتي هزيتها ومديتهالوا قتلوا هاك . شاف معاها في يدي وحكمها. قالي وشنو هادي قتلوا بورتوكلي كيما راك تشوف ولا متعرفهاش هديك لي يلصقوا فيها المفاتيح . تبسم قالي والله . درتلوا براسي ايه قتلوا شريتهالك المرة لي فاتت ونسيت باه نمدهالك . قالي وعلاه حتى شريتهالي . قتلوا اوففف انت تبقا تسقسي احكمها ولا رجعها متبقاش تسقسي فيا . قالي قولي علاه شريتهالي . قتلوا اووووف كاااادو زعما كي عاونتني وديما تعاوني شريت وحدة ليك و وحدة لمسلم . شفت معاه قتلوا هاه باه متقولش بلي منحبكش . بقا يتبسم ويشوف معاها حسيتو فرح بيها بزاف شاف معايا قالي كثر خيرك اسيدي . وحطها في جيبو . حبيت نقلقوا قتلوا برك . قالي وش برك . قتلوا هدا ماتقولي وزيد تحطها في جيبك . قالي وش راح نقولك مثلا ولا حابتني نحطها فوق راسي ونمشي . قتلوا نكار الخير عل الأقل قولي يكثر خيرك لالة جوليا ربي يخليك ربي يحفظك . ضحك قالي شغل جيت نطلب فيك وعطيتيني روحي ابنتي ارقدي خير . وجا خارج سوطيت بيسك هو طويل عليا بستوا على خدو . قريب طحت عليه حكمني على ضهري بيديه لزوج ويشوف معايا حاير في الجاست لي درتهالوا . لحقت علينا اسمهان بهديك الوقفة كانت جايبتلي الكاس تاع الحليب بقات تشوف معانا عينيها يخرجوا في النار تشوف فينا بغل ولى هو عدل روحوا وخرج هيا خبطت الباب وراه وخبطت الكاس فوق طابل تاع الكوافاز قاتلي جوليا راكي تلعبي بالنار. قتلها وش راكي تقولي وش تقصدي .قاتلي نخرجلك فيها ديراكت اصيل تاعي من اول نهار قتلك راه عجبني وعيني فيه يعني غير بعدي عليه بيسك لي جاست لي راكي ديري فيهم معاه راني فايقتلهم غير متلعبيش معايا كلش نسمح فيه غير اصيل انسايه سينو ومتتوقعيش وش ندير . قتلوا شوفي صباح ربي تعبانة ولي فيا يكفيني روحي اخرطي بعيد. قاتلي راني نبهتك حطيها منقوشة في وذنك كلشي ديتيه مني بصح باه تدي مني اصيل حب حياتي موحال تصرى لوكان نشوفك جثة قدامي . خرجت وخبطت الباب وراها.
