من وراها طلعت للشمبرة تاعي فتحت الصاشي نشوف وش فيها ماكلة لقيت طاكوس وليموناد وحتى قرعة تاع الماء .طحت فيها عمية كليت حتى كملت كلشي ورجعت تكسلت في سريري نخمم كيفاش راح نفوت ايماتي هنا وحدي عاود صونا تلفوني شفت النميرو عرفتوا هو هزيت قالي تعشيتي. قتلوا ايه . قالي مراكيش صغيرة حتى تبكي . قتلوا وشنو . قالي علابالي بلي كنتي تبكي قبيل وراني نقولك مراكيش صغيرة حتى تبكي قتلوا حتى هادي راح دخل روحك فيها ديجا علاه راك تعيطلي انت سبة في كلشي كون مش انت راني وسط عايلتي . قالي وينا عائلة كلهم ماراهمش حابينك وسطهم انتي مهما ديري راح تبقاي غريبة عليهم . قتلوا منيش غريبة . قالي واحد ما راه متقبلك كلهم يشوفوا فيك بلي راح تجيبيلهم العار . سكتت جرحني بهدرتوا زدت حقدت عليه اكثر كون نلقى الموت نحطها عليه . قالي شبيك سكتي جرحتك بهدرتي بصح هادي هيا الحقيقة لازم تتقبليها . كوبيت عليه رجعت نبكي بالصوت حتى الصباح باه غفيت شوي ونضت ليوم نبدا اول نهار لازم نكون واجدة . وجدت روحي بالخف وخرجت لقيت الطفلة لي جابتلي لعشا واقفة فوتها ديراكت بلا ما نهدر معاها اي عبد عندو علاقة معاه راهو عدوي . وصلت وين نقرى دخلت قعدت وحدي حتى جاو مجموعة تاع بنات ومعاهم ذراري قعدوا بجنبي يتحاكاو ويضحكو تمنيت حتى انا نكون مهنية كيفهم هكدا نضحك ومعلاباليش بالدنيا قعدت نسمع في حكاياتهم ومغامراتهم حتى دخل البروف وبدا الكور . قرينا كي كملنا خرجت تغديت ورجعت قريت من بعد روحت للاقامة سماطة تقتل نهار كامل وانا غير وحدي مش موالفة هكدا كنت ديما مع صحابي هنا منعرف حتى واحد . فوتت سمانة هكدا حتى نهار وصلت دخلت للاقامة لقيت هديك الطفلة لي جابتلي العشا قاعدة وحدها فتت عليها سمعتها عيطتلي جوليا دورت ليها قاتلي إدا ما عندك والوا ارواحي اقعدي معايا نڨصرو خير ما تبقاي وحدك . جات في وقتها حتى انا كنت قالقة وقانطة قابلتها وقعدت كانت حاطة التبناج شيكولا وشيبس وعفايس اخرين . قاتلي كيفاش فات نهارك ليوم والفتي شوي .قتلها فات عادي . قاتلي حقا انا اسمي خولة . قتلها متشرفين . قاتلي انا نقرى دوزيام . حسيتها حابة تجبد معايا الهدرة وتصاحبني علابالي علاه غير باه تبقى توصل في خباري لاصيل. قتلها وين تعرفي اصيل انتي. ضحكت قاتلي مايروحش مخك بعيد راه صاحب خويا برك . قاتلي وانتي نورمالمو ولد خالك ياك . قتلها ايه . قاتلي دورك رانا صحبات في أي وقت تحتاجيني تلقايني متحطيش روحك وحدك انا راني هنا معاك . قتلها مرسي بزاف . صونا تلفوني لقيتوا مسلم فرحت هزيت عليه بقيت نحكي معاه قالي اذا قدرت غدوة نجي عندك ندورو . قتلوا صح قالي ايه باه نوريلك لبلايص على الأقل ادا حتجتي حاجة تعرفي. قتلوا ايه غير ارواح فديت هنا وحدي . قالي معليش غدوة ان شاء راني نجي عندك تهلاي في روحك ومتخرجيش في ليل قبل المغرب تحكمي شومبرتك ومتزيديش تخرجي . ضحكت قتلوا علابالي هيا باي وسلم عليهم. كوبيت قاتلي هدا مسلم. قتلها تعرفيه. قاتلي ايه راني قتلك صحاب خويا كان يخدم معاهم بصح هو بدلوه بعيد . بقيت قاعدة معاها حتى قرب المغرب طلعت للشمبرة تاعي بدلت قشي لبست بيجامة وقعدت نكونكتي مع رؤيا ونسمع في الغنا حتى صونا تلفوني لقيتوا اصيل . محبيتش نهز عليه علابالي دوك يبقى يسمم فيا بهدرتوا حتى يبكيني باه يبرد مفهمتش علاش يحب يجرحني فرق كبير بين مسلم هو . مسلم تاع الصح نحسو خويا من نهار لول لي شفتوا فيه دار بلاصة في قلبي . بقا يعيط ويعاود وانا محبيتش نهز . حتى دخلني ميساج هزي عليا . وليت هزيت قالي علاه محبيتيش تهزي . قتلوا راني هزيت وش تحتاج . سكت من بعد قالي كيفاش فات نهارك . دورك هدا فارغ شغل حتى كل يوم يعيط و يحوس يفهم كيفاش فات نهاري والله عيت نفهمو هاد العبد .قتلوا نورمال . قالي مليح وبلا خلطة. قتلوا علابالي. قالي راه وقت لعشا روحي تعشاي وكوبا . وشبيه هدا والله مهبول . خرجت هبطت تعشيت مع خولة في ريسطو من بعد طلعت ديراكت رقدت . في الصباح وجدت روحي وقعدت عيطت لمسلم قالي راني قريب نوصل اخرجي استنايني في الباب. شحال فرحت هزيت ساك تاعي هبطت نجري عندو لقيتوا وصل . وواقف يستنى فيا روحت ديراكت عنقتوا حتى هو بادلني يضحك. قالي متقوليليش بلي توحشتيني. قتلوا نقولك الصح والله غير توحشتك حتى اكثر من اسمهان اختي . ضحك . قالي حتى انا توحشتك . ركبت معاه في طونوبيل قالي ليوم نفوتوا نهار برة ياك معندكش قراية قتلوا لا ماعنديش . فوتت معاه نهار يهبل حوسنا كلينا مشينا شرالي حوايج ، محسيناش ڨاع بالوقت حتى بدات تظلم الدنيا كي عاد في الشتا غير وصلت الخمس بدات الشمس تغيب . رجعنا مروحين جبدت تلفوني من الساك غير فتحتوا لقيت شي عشرين ابال من عند اصيل ، دورتوا لمسلم قتلوا شوف خوك عيط عشرين مرة وانا مسمعتوش وقيلا كشما صرا . قالي اصبري دوك نعيطلوا نفهم وش كاين . عيطلوا غير هز عليه نسمع فيه يعيط ويسب ،حرت شبيه هدا . قالو راهي معاك . قالوا ايه راهي معايا علاه. قالي كي تجي عندي ونتفاهموا دوك رجعها من بعد نتفاهموا . قالوا مسلم وشبيك انت غير الخير ياك راهي معايا مع ولد خالها علاه راك تعيط والتاكل في روحك . قالوا ناكل في روحي اصبر برك من بعد نتفاهموا دوك مانهدرش معاك ، كوبا عليه . قتلوا مسلم وش كاين . ضحك قالي مكاين والوا . قتلوا وشبيه اصيل كان يعيط . قالي هو هكدا متحطيش في بالك معاه خويا مهبول مع الوقت تعرفيه مليح. قتلوا منعرفوا مايعرفني منيش ناقصة مهابل في حياتي انا أصلا بروحي راني منيش نورمال .ضحك قالي علاه مكيش نورمال . قتلوا منعرف انا هكدا نشوف روحي ، عمرك شفت وحدة تحب تشوف الدم وجروح انا نحب نشوف . سكت يشوف معايا . من بعد قالي راكي تهدري بصحك . شفتوا حاير مستعجب ملڨري كنت نهدر صح قتلوا نضحك برك وقيلا راك صدقت هدرتي . حتى هو ضحك قالي والله قريب صدقتك . كنا ديجا وصلنا للاقامة تاعي قالي صاي وصلنا . قتلوا خسارة نهار فات بالخف محسيتش ڨاع بالوقت معاك تاع الصح فوتت احسن نهار في عمري . قالي كل سمانة نجي عندك نفوتوا نهار هكدا . قتلوا دير فيا مزية خاطر مزلت ما عرفت حتى واحد نفوت معاه الوقت هنا من غير وحد الطفلة بعثهالي خوك وقيلا اخت صاحبكم اسمها خولة . قالي وي عرفتها المهم قوليلي اصيل ديما يعيطلك . قتلوا من لي جيت كل ليلة يعيط خوك هدا فارغ شغل . ضحك قالي المهم انتي تهلاي في روحك ، وادا حتجتي دراهم عيطيلي نبعثلك اوكي . قتلوا اوكي مرسي بزاف على ليوم . قالي بلا مزية وش قلنا راكي اختي .
